Salmo 135 (134)
Tayta Diosta alabanqan
1 ¡Aleluya!
Tayta Diosta alabayay.
Sirviqninkuna, Tayta Diosta alabayay.
2 Tayta Diospa wayincho kaqkuna, payta alabayay.
Tayta Diosnintsikpa wayin patiucho kaqkuna, payta adorayay.
3 Allillata ruraq kanqanpita Tayta Diosta adorayay.
Kuyakuq kanqanpita salmukunata cantar alabayay.
4 Jacobpita aywaraq runakunatami paypa kayänanpä Tayta Dios akrarqan.
Israel runakunatami akrarqan herencian kayänanpä.
5 Musyämi Tayta Dios munayyuq kanqanta.
Payqa llapan dioskunapitapis mas munayyuqmi.
6 Ciëlucho, kay patsacho, lamarcho y wanwanyaykaqkunachöpis Tayta Diosqa munanqantami ruran.
7 Kay patsapa kuchunpitami pukutayta shäritsin.
Tamyamunanpäpis maqakatsimunmi.
Churarätsinqanpitami wayratapis jipimun.†
8 Egipto runakunapa mayor tsurinkunatami wanutsirqan.
Uywankunapa punta kaq wawankunatapis wanutsirqanmi.
9 Faraón y mandashiqninkuna rikayänanpämi Egiptucho mantsakaypä kaqkunata rurarqan.†
10 Atska nacionkunachömi runakunata wanutsirqan.
Munayyuq reykunatapis ushakätsirqanmi.
11 Tsay reykunami kayarqan amorreo runakunapa mandaqnin Sihón, Basáncho taq rey Og y cananeo runakunapa mandaqnin reykunapis.†
12 Tsay runakunapa nacionninkunatami kuyanqan Israel runakunata rikatsirqan herenciankuna kananpä.
13 Tayta Dios, mana ushakaqmi kaykanki.
Qamqa imayyaqpis yarpashqami kanki.
14 Tayta Diosqa kuyanqan runakunata yanapanqami.
Sirviqninkunataqa kuyapanqami.†
15 Juklä nación runakuna adorayanqan ïdulukunaqa qorillapita y qellayllapitami kayan.
Tsaykunataqa runakunallami rurayan.
16 Shimin kaptinpis manami parlayantsu.
Ñawin kaptinpis manami rikayantsu.
17 Rinrin kaptinpis manami wiyayantsu.
Manami jamayninpis kantsu.
18 Ïdulu munayniynaq kanqannömi ïdulukunata ruraqkunapis kaykäyan.
Ïdulukunaman yärakuqkunaqa ïdulunöllami llapanpis kayan.†
19 Israel mayikuna, ¡Tayta Diosta alabayay!
Aarónpita aywaraqkuna, ¡Tayta Diosta alabayay!
20 Leví trïbu runakuna, ¡Tayta Diosta alabayay!
Tayta Diospita mantsapakuqkuna, ¡payta alabayay!
21 Siónchöpis y maytsaychöpis Tayta Dios alabashqa kaykullätsun.
Paymi Jerusaléncho taykan.
¡Aleluya!