Salmo 126 (125)
Tayta Dios yanapananpä mañakunqan
Kay salmuqa Jerusalénman aywaqkuna cantayänanpämi.
1 Karu nacioncho kanqantsikpita Siónman Tayta Dios kutitsimashqa suëñuykanqantsiktami yarparqantsik.
2 Tsaymi pasaypa kushikur Tayta Diosta alabarqantsik.
Juk nacioncho taq runakunapis kaynömi niyarqan:
“¡Mantsakaypä kaqkunata rurarmi paykunata Tayta Dios yanapashqa!”
3 Tayta Dios allimi yanapamashqantsik.
Tsaypitami pasaypa kushishqa kaykantsik.
4 Tayta Dios, ñöpata yanapayämanqaykinölla kananpis yanapaykayällämay.
Tsunyaq jirkaman tamyatsimuptiki raqrakunapa yaku aywaqnö bendicionniki kaykullätsun.
5 Muruy witsan waqarpis cosëchata qorirqa kushikuyanqami.
6 Waqar murukurpis cosëchachöqa trïgu manöjukunata marqashqami kushishqa kutiyämunqa.