Salmo 122 (121)
Jerusalén markata alli rikananpä Tayta Diosta mañakunqan
Kay salmuqa Jerusalénman aywaqkuna cantayänanpämi. David qellqanqan.
1 Pasaypami kushikü “Tayta Diospa wayinman aku aywashun” nimaptin.
2 ¡Jerusalén, punkuykipami yaykayämushqäna!
3 Llapäkuna qorikäyänäpämi Jerusalén marka alli shäritsishqa kaykan.
4 Jerusalénmanmi Israel runakuna trïbunpa trïbunpa witsäyämun.
Tayta Dios ordenanqannöllami alabayänanpä witsäyämun.
5 Jerusalénchömi Davidpita aywaraqkuna alli justiciata rurar mandayan.
6 Tayta Diosta mañakushun Jerusaléncho runakuna alli kawayänanpä.
Jerusalén, kuyashuqnikikuna alli kawaykuyällätsun.
7 Murällayki rurincho taqkuna kushishqa kawaykuyällätsun.
Palaciuykicho taqkunapis añaw kawaykuyällätsun.
8 Castäkuna y amïgükuna raykuqmi nï:
“¡Qam kaqcho taqkuna llapanpis alli kawaykuyällätsun!”
9 Tayta Diosnintsikpa wayin raykuqmi qamcho alli kawayänanpä imaypis mañakulläshä.