Salmo 120 (119)
Tayta Dios salvananpä mañakunqan
Kay salmuqa Jerusalénman aywaqkuna cantayänanpämi.
1 Pasaypa llakikurmi Tayta Diosta mañakushqä.
Mañakunqätami wiyamashqa.†
2 Tayta Dios, llullakuq runakunapita salvaykallämay.
Tumpakuq runakunapita tsapaykallämay.
3 Llullakuq runa, tumpakuq kanqaykipita ¿imatarä tarinki?
4 ¡Alli chölupa afilashqa flëchallantami tarinki!
¡Retämapa shanshallantami tarinki!
5 ¡Allaw noqallä!
¡Meseccho y Cedarcho taykaqnömi kaykä!
6 Chiki runakunapa ñöpancho atska watanami kawaykä.
7 Runakuna alli kawayänantami munä.
Alli kawayänanpä yätsiptïpis chikinakur y pelyallarmi kawayan.