Salmo 119 (118)
Palabranpita Tayta Diosta alabanqana
Álef
1 Kushishqami kawayan Tayta Dios munanqannö kawaq runakuna.
Paykunami Tayta Diospa leyninkunata cumpliyan.
2 Kushishqami kawayan Tayta Dios mandanqankunata cumpliqkuna.
Paykunami llapan shonqunkunawan payta ashiyan.
3 Imaypis llutankunata manami rurayantsu.
Tsaypa trokinqa Tayta Diosta cäsukurmi imaypis allillata rurayan.†
4 Tayta Dios, qammi yachatsikuynikikunata qellqatsirqayki mana qonqaypa cumpliyänäpä.
5 ¡Ima allirä kanman estatütuykikuna ninqanta cumpliptï!
6 Mandamientuykikunata cumplirqa manami imapitapis penqakushätsu.
7 Ninqaykikunata yachakurqa llapan shonqüwanmi qamta alabashayki.
8 Estatütuykikunataqa imaykanöpapis cumplishämi.
¡Ama kachaykallämaytsu!
Bet
9 ¿Imanöparä jutsa rurayta chölu kacharinman?
Jutsa ruraytaqa kacharinqa palabraykita cäsukurmi.
10 Llapan shonqüwanmi qamta ashï.
Mandamientuykikunata imaypis cäsukunäpä yanapaykallämay.
11 Jutsata rurar contrayki mana kanäpämi palabraykita shonqücho imaypis yarparaykä.
12 Tayta Dios, pïmaypis alabaykulläshuy.
Estatütuykikunata yachaykatsillämay.
13 Noqaqa llapan ninqaykitami willakuykä.
14 Imayka riquëzakunata tarir kushikunqäpitapis masmi kushikü mandanqaykikuna ninqannö kawar.
15 Yachatsikuyniki ninqannö kawanäpämi imaypis yarpachakü.
Munanqaykinö kawanäpämi imaypis tantiyakü.
16 Estatütuykikunata cumplirmi kushikü.
Palabraykitaqa manami imaypis qonqashätsu.
Guímel
17 Sirviqniki karmi qamta rugakü alli kawayta qaramänaykipä.
Palabraykitaqa imaypis cäsukushämi.
18 Ñawïta kichaqnö shumaq tantiyaykatsillämay.
Tsaynöpami leynikicho kushikuypä kaqkunata tantiyashä.
19 Kay patsachöqa qorpallami kaykä.†
Mandamientuykikunata mana qonqanäpä yanapaykallämay.
20 Llapan shonqüwanmi imay hörapis ninqaykikunata cumpliyta munä.
21 Yachaq tukuqkunataqa imaypis castigankimi.
Mandamientuykikunata mana cäsukuyanqanpitami maldicionashqa kayanqa.
22 Runakuna chikiyämar manakaqman mana churayämänanpä tsapaykallämay.
Noqaqa mandanqaykikunata cäsukuykämi.
23 Munayyuq runakunami conträ shäriyänanpä willanakuykäyan.
Tsaynö kaptinpis sirviqniki karmi estatütuykikunata cumplinäpä imaypis yarparaykä.
24 Mandanqaykikunata cumplirmi kushikü.
Alli kawanäpämi tsaykuna tantiyatsiyäman.
Dálet
25 Wanukuykänami.
Awnimanqaykinö alli kawayta qaraykallämay.
26 Yarpachakunqäta willaptïmi wiyamar yanapamashqayki.
Estatütuykikunata yachaykatsillämay.
27 Yachatsikuynikikunata tantiyaykatsillämay.
Espantaypä ruranqaykikunatami imaypis yarparäshä.
28 Pasaypa llakikuyllawanmi aywapakaykä.
Palabraykiwan shakyaykatsillämay.
29 Jutsa rurayllacho mana kawanäpä yanapaykallämay.
Kuyapämar leynikikunata tantiyaykatsillämay.
30 Munanqaykinö kawaytami munä.
Ninqaykikunata cäsukurmi kawashä.
31 Tayta Dios, mandanqaykikunatami qoyay qoyay cäsukuykä.
Penqakuyman ama churaykallämaytsu.
32 Allikunata yarpätsimaptikimi shonqü pasaypa kushikun.
Tsaymi mandamientuykikunata imaypis cäsukushä.
He
33 Tayta Dios, estatütuykikunata yachaykatsillämay.
Yachatsimaptikiqa wanunqäyaqmi cumplishä.
34 Leynikikunata cäsukunäpä tantiyaykatsillämay.
Tsaynöpami llapan shonqüwan cumplishä.
35 Mandamientuykikunata cumplinäpä yanapaykallämay.
Cumplirmi kushishqa kawashä.
36 Mandanqaykikunata ruranäpä yarpaykatsillämay.
Ama munaykullaytsu suwakuypa imaykayuq rikakunäta.
37 Ama munaykullaytsu mana allikunata rikanäpä.
Ninqaykinö alli kawanäpä yanapaykallämay.
38 Sirvishuqnikikunata awninqaykita cumpliykullay.
Mantsapakushuqniki kaykaptïqa yanapaykallämay.
39 Ninqaykikunaqa allimi kaykan.
Qamta cäsukunqäpita asipäyämaptin yanapaykallämay.
40 Yachatsikuynikitaqa llapan shonqüwanmi kuyä.
Munanqaykinö kawanäpä yanapaykallämay.
Vav
41 Tayta Dios, kuyapämarniki yanapaykallämay.
Awnimanqaykinölla salvaykallämay.
42 Yanapamanqaykita rikarmi manakaqman churamaqkuna upällakuyanqa.
Noqaqa palabraykimanmi imaypis yärakü.
43 Palabraykita imaypis willakunäpä yanapaykallämay.
Ninqaykikunamanmi yärakü.
44 Leynikikunata cäsukurmi imaypis kawashä.
45 Yachatsikuynikikunata cumplirmi imaypis añaw kawashä.
46 Mandanqaykikunatami reykunatapis yachatsishä.
Yachatsir manami pipitapis penqakushätsu.
47 Mandamientuykikunataqa kuyämi.
Cumpliptïmi shonqü kushikun.
48 Mandamientuykikunata kuyarmi kushishqa chaskikü.
Estatütuykikunata cumplinäpämi imaypis yarpachakü.
Zayin
49 Sirviqniki kaptï awnimanqaykita yarpaykullay.
Noqaqa qammanmi yärakamü.
50 Awnimanqaykikunami imaypis shakyätsiman.
Llakishqa kaykaptïmi consulaman.
51 Yachaq tukuq runakunami wajupaykäyäman.
Wajupäyämaptinpis leynikikunata cäsukuykämi.
52 Tayta Dios, yarparaykämi unay castäkunata ninqaykita.
Tsaykunata yarparkurmi imaypis kushikü.
53 Mana alli ruraq runakunami pasaypa ajanätsiyäman.
Leynikikunatapis manami cäsukuyantsu.
54 Karu markacho karpis estatütuykikuna alli kanqanpitami cantukunatapis cantaykä.
55 Tayta Dios, paqaspapis qampämi yarparä.
Imaykanöpapis leynikikuna ninqantami cäsukushä.
56 Yachatsikuynikikunataqa imaypis wiyakushämi.
Jet
57 Tayta Dios, qamllami herenciä kaykanki.
Palabraykita imaypis cäsukunäpämi awnï.
58 Llapan shonqüwanmi qamta mañakamü.
Awninqaykita cumplir yanapaykallämay.
59 Imanöpis kawanqätami yarpachakushqä.
Tantiyakushqämi mandanqaykikuna ninqannö kawanäpä.
60 Imanöpapis mandamientuykikunatami cumpliyta munä.
61 Mana alli runakuna imaykanöpa wajupäyämaptinpis leynikikunatami mana qonqaypa cäsukuykä.
62 Pullan paqas shärikuskirmi ninqaykikunata yarpaskir agradëcikü.
63 Llapan mantsapakushuqnikipa amïgunmi kaykä.
Paykunaqa munanqaykinömi kawayan.
64 Tayta Dios, kay patsacho kuyakuynikita maytsaychömi rikaykä.
Estatütuykikunata yachaykatsillämay.†
Tet
65 Tayta Dios, palabraykicho awnimanqaykinöllami sirviqniki kaptï alli rikaykämanki.
66 Yachaq y alli yarpayyuq kanäpä yanapaykallämay.
Mandamientuykikunamanmi yärakü.
67 Unayqa jutsa rurayllacho kawarmi pasaypa ñakarqä.
Kananmi itsanqa palabraykita cäsukur alli kawaykä.
68 Qamqa kuyapäkuq y allillata ruraqmi kanki.
Estatütuykikunata yachaykatsillämay.
69 Yachaq tukuqkuna manakaqta tumpayämaptinpis noqaqa llapan shonqüwanmi yachatsikuynikita cäsukü.
70 Mana alli runakunaqa llutantami yarpäyan.
Noqaqa leynikikunata cumplirmi kushikü.
71 Ñakarpis allipämi ñakashqä.
Tsaynöparämi estatütuykikunata cäsukunäpä tantiyashqä.
72 Waranqanpa waranqanpa qellaypitapis y qoripitapis noqapäqa leynikikunami mas alli kaykan.
Yod
73 Kikikimi makikiwan ruramar kamamashqayki.
Tantiyaykatsillämay mandamientuykikunata yachakunäpä.
74 Palabraykiman yärakuptïmi mantsapakushuqnikikuna noqawan tinkur kushikuyan.
75 Tayta Dios, ninqaykikuna alli kanqantami musyä.
Llutankunata ruraptï allipämi corrigimanki.
76 Llakikuptïpis kuyapämar kushiykatsillämay.
Awnimanqaykinölla yanapaykallämay.
77 Kuyapäkuynikiwan alli kawayta qaraykallämay.
Leynikikunata cumplirmi kushikü.
78 Yachaq tukuqkunaqa penqakuycho kaykuyällätsun.
Paykunaqa manakaqkunatami tumpayäman.
Tsaynö kaptinpis noqaqa yachatsikuynikitami yarparaykä.
79 Mantsapakushuqnikikuna y mandanqaykikunata yachaqkuna noqawan qorikäyätsun.
80 Llapan shonqüwan estatütuykikunata cäsukunäpä yanapaykallämay.
Tsaynö kawarqa manami imapitapis penqakushätsu.
Caf
81 Salvamänaykipä shuyaraykällarmi aywapakaykäna.
Imanö karpis palabraykimanmi yärakuykä.
82 Awnimanqaykita shuyaraykaptillämi ñawïpis tsakaskinna.
Tsaymi llakikur rugakü: “¡Imayrä shamunki shakyaykatsimänaykipä!” nir.
83 Noqaqa qoshniwan yanayashqa uyllunömi pasaypa awkinyashqana kaykä.
Tsaynö karpis estatütuykikunataqa manami qonqätsu.
84 ¡Imayyaqrä tsaynö ñakar kawashä!
¡Imayrä conträkunata castiganki!
85 Leynikikunata mana cäsukuqkuna y yachaq tukuqkunami trampata churapayämashqa.
86 Llapan mandamientuykikunaqa rasun kaqllami.
Imatapis mana nikaptïmi chikimaqnïkuna qatikachäyäman.
Tayta Dios, yanapaykallämay.
87 Ichikllapami wanutsiyämashqatsu.
Tsaynö kaptinpis mana qonqaypami yachatsikuynikita cäsukü.
88 Kuyapämarniki wanuypita salvaykallämay.
Tsaynöpami mandanqaykikunata imaypis cumplishä.
Lámed
89 Tayta Dios, palabraykiqa imaypis mana ushakaqmi.†
Ciëluchöpis mana ushakaqmi.
90 Awninqaykitaqa imaypis cumplinkimi.
Kay patsatapis mana kuyukuq kananpämi kamashqayki.
91 Mandaptikimi kay patsa kananyaqpis kaykan.
Llapan kamanqaykipis munaynikichömi kaykan.
92 Leynikikunata cäsukurmi kushikü.
Mana cäsukurqa llakikuyllawanmi wanüman karqan.
93 Yachatsikuynikita imaypis manami qonqashätsu.
Tsaykunata cäsukurmi alli kawaykä.
94 Wamrayki kaykaptïqa salvaykallämay.
Yachatsikuynikitami imaypis cumpliykä.
95 Mana alli runakunami wanutsiyämänanpä shuyaraykäyäman.
Tsaynö kaptinpis mandanqaykikunatami cäsukü.
96 Llapanpis ushakaqlla kanqantami rikashqä.
Mandamientuykikunami itsanqa imaypis mana ushakaq kaykan.
Mem
97 Llapan shonqüwanmi leynikikunata kuyä.
Tsaykunapämi imay hörapis yarparaykä.
98 Mandamientuykikunataqa imaypis yarparaykämi.
Tsaymi chikimaqnïkunapitapis mas yachaq kaykä.
99 Mandanqaykikunaman umä churakashqa karmi yachatsimaqnïkunapitapis mas yachaq kä.
100 Yachatsikuynikikunata cäsukurmi yachaq awkinkunapitapis mas yachä.
101 Palabraykita cäsukurmi jutsa ruraykunapita witikushqä.
102 Ninqaykikunatami mana qonqaypa cumpliykä.
Cumplinäpämi kikiki yachatsimashqayki.
103 Palabraykiqa pasaypami mishkin.†
Abëjapa mishkinpitapis masmi mishkin.
104 Yachatsikuynikita yachakurmi mas tantiyakuq rikakü.
Tsaymi llutan ruraykunapita witikushqä.
Nun
105 Palabraykiqa aktsinömi.
Maypa aywaptïpis aktsipämaqnömi.†
106 Jurarmi awnishqä ninqaykikunata cäsukunäpä.
Awninqätaqa imaypis cumplishämi.
107 Tayta Dios, pasaypami ñakaykä.
Palabraykicho ninqannölla alli kawanäpä yanapaykallämay.
108 Tayta Dios, qamta alabanqäta chaskiykallämay.
Ninqaykikunata tantiyaykatsillämay.
109 Chikimaqkunami imaypis wanutsimayta munaykäyan.
Tsaynö kaptinpis leynikikunataqa manami qonqätsu.
110 Mana cäsukushuqniki runakunami trampata churapaykäyäman.
Tsaynö kaptinpis yachatsikuynikita manami qonqätsu.
111 Mandanqaykikunatami herenciatanö chaskishqä.
Tsaymi shonqüpis pasaypa kushikun.
112 Llapan shonqüwanmi estatütuykikunata cumpliyta munaykä.
Wanunqäyaqmi imaypis cäsukushä.
Sámej
113 Allish tukuqkunataqa pasaypami chikï.
Leynikikunatami itsanqa kuyä.
114 Qammi kaykanki pakakunä y tsapämaqnï escüdü.
Awnimanqaykimanmi imaypis yärakü.
115 Mana alli runakuna, noqapita witikuyay.
Noqaqa Diosnïpa mandamientunkunatami cumplishä.
116 Alli kawanäpä awnimanqaykinö yanapaykallämay.
Manakaqllapäqa ama yärakatsimaytsu.
117 Yanapamaptikiqa chikimaqnïkunapa makinpitami salvakushä.
Estatütuykikunatami imaypis cumplishä.
118 Estatütuykikunata mana cäsukuqkunataqa rikaytapis manami munankitsu.
Llutanta rurayänallanpämi paykunaqa yarpachakuyan.
119 Mana alli runakunataqa imayka qanratanömi melananki.
Noqaqa mandanqaykikunatami kuyä.
120 Qampita mantsapakurmi pasaypa tsuktsukyaykä.
Tsaymi ninqaykikunata cäsukü.
Ayin
121 Ninqaykikunataqa imaypis cumplïmi.
Ñakatsimaqkunapa makinpita jipiykallämay.
122 Alli kawanäpä yanapaykallämay.
Yachaq tukuq runakuna mana ñakatsiyämänanpä tsapaykallämay.
123 Salvamänaykipä shuyaraykaptillämi ñawïpis tsakaskinna.
Awnimanqaykita cumplinaykipä kanqantami shuyaraykä.
124 Kuyakuq kanqaykiman tupu yanapaykallämay.
Sirviqniki karmi rugakamü estatütuykikunata yachatsimänaykipä.
125 Qamta sirviqnikimi kallä.
Mandanqaykikunata shumaq yachakunäpä tantiyayta qaraykallämay.
126 Tayta Dios, runakunaqa leynikikunata manami cäsukuyantsu.
Tsay runakunataqa juklla castigaykullay.
127 Fïnu qorita kuyayanqanpitapis masmi mandamientuykikunata kuyä.
128 Tsaymi llapan yachatsikuynikita cäsukü.
Llutankunataqa manami rurayta munätsu.
Pe
129 Kushikuypämi mandanqaykikunaqa.
Tsaymi imaykanöpapis cäsukü.
130 Palabraykita yachatsiptinqa runapa shonqun atsikyarkunmi.
Llampu shonqu runapis rasmi tantiyakun.
131 Llapan shonqüwanmi mandamientuykikunata yachakuyta munä.
132 Kuyashuqnikikunata imaypis kuyanqaykinölla noqatapis kuyapämar yanapaykallämay.
133 Awninqaykita cumplir alli kawanäpä yanapaykallämay.
Jutsa ruray ama vinciykallämätsuntsu.
134 Runakuna ñakatsiyämaptin salvaykallämay.
Imaykanöpapis yachatsikuynikikunatami cäsukuyta munä.
135 Kuyakuq kaynikiwan alli rikaykallämay.
Estatütuykikunatapis yachaykatsillämay.
136 Leynikikunata runakuna mana cäsukuyaptinmi pasaypa llakikur waqä.
Tsade
137 Tayta Dios, rasun kaqllatami qamqa juzganki.
Ninqaykikunapis shumaqmi kaykan.
138 Mandanqaykikuna llapanpis alli karmi yärakuypä kaykan.
139 Chikimaqnïkuna palabraykita mana cäsukuyaptinmi pasaypa ajanä.
140 Kutin kutinmi awninqaykikunata cumplishqayki.
Awninqaykikunataqa llapantami kuyä.
141 Manakaqman churayämaptinpis yachatsikuynikitaqa manami imaypis qonqashätsu.
142 Qamqa rasun kaqllatami juzganki.
Leynikikunapis rasun kaqllami.
143 Pasaypa llakikur ima ruraytapis mana kamäpakuptïmi mandamientuykikuna kushikatsiman.
144 Mandanqaykikunaqa imaypis allimi.
Alli kawanäpä shumaq tantiyaykatsillämay.
Qof
145 Tayta Dios, llapan shonqüwanmi qamta mañakamü.
Yanapaykallämay estatütuykikunata cäsukunäpä.
146 Qamtami mañakü salvaykamänaykipä.
Mandanqaykikunata imaykanöpapis cumplishämi.
147 Tsaka tsakalla shärikuskirmi yanapamänaykipä mañakamü.
Palabraykimanmi yärakü.
148 Awninqaykita yarpararmi kushishqa wararküpis.
149 Tayta Dios, kuyakuq kanqaykiman tupu wiyaykallämay.
Imaypis alli ruraq kanqaykiman tupu alli kawayta qaraykallämay.
150 Chikimaqnïkunaqa janächönami kaykäyan.
Paykunaqa leynikikunata manami cäsukuyantsu.
151 Tayta Dios, qamqa ñöpächömi imaypis kaykanki.
Mandamientuykikunaqa llapanpis rasun kaqllami.
152 Unaypita patsami mandanqaykikunata musyä.
Mandanqaykikunaqa imayyaqpis kaykanqami.
Resh
153 Ñakaypita salvaykallämay.
Leynikikunataqa manami imaypis qonqätsu.
154 Janä shärir salvaykallämay.
Awninqaykita cumplir alli kawanäpä yanapaykallämay.
155 Estatütuykikunata mana cäsukuyaptinmi jutsa ruraqkunata yanapankitsu.
156 Tayta Dios, pasaypa kuyapäkuqmi kanki.
Munanqaykinö kawanäpä yanapaykallämay.
157 Conträkuna y chikimaqnïkunaqa atskaqmi kayan.
Tsaynö kayaptinpis mandanqaykikunatami imaypis cäsukü.
158 Conträkunata rikaptïmi shonqüpis pasaypa ajanan.
Paykunaqa palabraykita manami cäsukuyantsu.
159 Tayta Dios, yachatsikuynikita pasaypami kuyä.
Kuyakuq kaynikiwan alli kawanäpä yanapaykallämay.
160 Palabraykiqa llapanpis rasun kaqllami.
Ninqaykikunaqa imayyaqpis kaykanqami.
Sin/Shin
161 Llutanta mana ruraykaptïmi munayyuq runakuna conträ shäriyan.
Tsaynö kaptinpis palabraykitami cäsukü.
162 Awninqaykikunata musyarmi kushikü.
Atska qellayta tarikuqnömi pasaypa kushikü.
163 Llullakuytaqa manami imaypis munätsu.
Leynikikunataqa pasaypami kuyä.
164 Ninqaykikuna allita ruranäpä tantiyatsimaptinmi imay hörapis qamta alabä.
165 Leynikikunata kuyaqkunaqa kushishqami kawayan.
Paykunataqa manami pipis jutsata ruratsintsu.
166 Tayta Dios, salvamänaykipä kanqantami shuyaraykä.
Tsaymi mandamientuykikunata cäsukur kawaykä.
167 Llapan shonqüwanmi mandanqaykikunata cäsukü.
Tsaykunataqa pasaypami kuyä.
168 Imanö kawanqätapis musyaykankimi.
Yachatsikuynikita y mandanqaykikunata cäsukurmi kawaykä.
Tav
169 Tayta Dios, mañakamunqäta awniykallämay.
Palabraykicho ninqaykinölla tantiyaykatsillämay.
170 Rugakamunqäta chaskiykallämay.
Awninqaykita cumplir libraykallämay.
171 Estatütuykikunata yachatsimaptikimi kushikur qamta alabä.
172 Llapan mandamientuykikunami alli kawanäpä kaykan.
Palabraykita cantarmi llapan shonqüwan alabashayki.
173 Yachatsikuynikita chaskikushqa kaptï shamur yanapaykallämay.
174 Tayta Dios, imayka desgraciapitapis tsapaykallämay.
Leynikikunata cäsukurmi kushikü.
175 Kawanqäyaqqa qamllatami alabashayki.
Ninqaykikunata tantiyatsimar yanapaykallämay.
176 Ima ruraytapis mana kamäpakurmi oqrakashqa üshanö kaykä.†
Tsaynö karpis mandamientuykikunata mana qonqaypami cumpliykä.
Sirviqniki kanqä raykuq shamur yanapaykallämay.