Salmo 118 (117)
Tayta Dios kuyakuq kanqan
1 Allillata ruraq kanqanpita Tayta Diosta agradëcikuyay.
Kuyakuq kayninqa imaypis manami ushakantsu.†
2 Israel runakuna niyätsun:
“Tayta Diospa kuyakuyninqa mana ushakaqmi kaykan”.
3 Aarónpita aywaraqkunapisa niyätsun:
“Tayta Diospa kuyakuyninqa mana ushakaqmi kaykan”.
4 Tayta Diospita mantsapakuqkuna llapanpis niyätsun:
“Tayta Diospa kuyakuyninqa mana ushakaqmi kaykan”.
5 Llakikuycho karmi Tayta Diosta mañakurqä.
Wiyamarmi ñakanqäpita jipimashqa.
6 Tayta Dios noqawan kaptinmi imapitapis mantsarïtsu.
Runakuna conträ shäriyaptinpis manami llakikütsu.†
7 Noqataqa Tayta Dios manami kacharimantsu.
Paymi imaypis yanapaykäman.
Kikïmi rikashä chikimaqnïkunata ushakätsinqanta.
8 Runaman yärakunantsikpa trokinqa Tayta Diosman yärakunqantsikmi mas alli kaykan.
9 Reykunaman yärakunantsikpa trokinqa Tayta Diosman yärakunqantsikmi mas alli kaykan.
10 Maytsay nación soldädukunami atacayämänanpä tumapäyämarqan.
Tsaynö kaykäyaptinmi Tayta Diospa jutincho llapanta ushakätsirqä.
11 Tsay soldädukunami atacayämänanpä jiruruypa tsaparäyämarqan.
Tsaynö kaykäyaptinmi Tayta Diospa jutincho llapanta ushakätsirqä.
12 Imayka abëja juntaqnömi juntapäyämarqan.
Tsaynö kaykäyaptinmi kashata nina ushaqnö llapanta ushakätsirqä.
Tayta Diospa jutinchömi llapanta ushakätsirqä.
13 Paykunaqa ichikllapami vinciyämarqantsu.
Tsaynö kaptinpis Tayta Dios yanapamaptinmi vincirqä.
14 Tayta Diosmi imaypis kallpata qaraman.
Paytami imaypis alabä.
Paymi imapitapis salvamaqnï.†
15 Tayta Dios munanqannö kawaqkunami toldunkunacho kushikuykäyan.
¡Tayta Diosmi munayninwan llapanta vincishqa!
16 ¡Tayta Dios munayyuq kanqanqa mantsariypämi!
¡Tayta Diosmi derëcha kaq makinwan llapanta ushakätsishqa!
17 Noqaqa manami wanushärätsu.
Tayta Dios ruranqankunata willakunäpä kawashärämi.
18 Tayta Dios pasaypa castigamarpis wanuypitaqa tsapämashqami.
19 ¡Templupa punkunta kichapaykallämay!
Tayta Diosta agradëcikunäpämi yaykuyta munaykä.
20 Tsay punkumi kaykan Tayta Dios kaqman yaykuna punku.
Tsay punkupaqa yaykuyan pay munanqannö kawaq runakunallami.†
21 Tayta Dios, mañakunqäta wiyamanqaykipitami qamta agradëcikü.
Noqata salvamanqaykipitami päkillä nï.
22 Wayi shäritsiqkuna “kay rumiqa manami allitsu” nir jitariyanqanmi wayi esquïnan cimientuchöna churaraykan.
23 Tsaynö kananpä Tayta Diosmi kamakätsishqa.
Tsaypitami pasaypa espantashqa kaykantsik.†
24 Kay junaqqa Tayta Dios yanapamanqantsik junaqmi.
Tsaypita kushikur alabashun.
25 ¡Tayta Dios, salvaykayällämay!
¡Llapan rurayanqäpis alli kananpä yanapaykayällämay!
26 Tayta Diospa jutincho shamuq runa alabashqa kaykullätsun.
Tayta Diospa wayinchömi qamkunata kushishqa chaskiyä.†
27 Tayta Diosllami rasunpa kaq Diosqa.
Paymi alli kawayta qaramashqantsik.
Tsaynö kaykaptinqa altarpa waqrankuna kaqyaq llimllakunata aptashqa yaykushun.b
28 Tayta Dios, qammi Diosnï kaykanki.
Agradëcikurmi qamta alabashayki.
29 Allillata ruraq kanqanpita Tayta Diosta alabashun.
Kuyakuq kanqanqa imaypis mana ushakaqmi.