Salmo 115 (113b)
Tayta Diosllaman yärakunqan
1 Tayta Dios, manami noqakunatsu alabashqa kayäman.
Tsaypa trokinqa pïmaypis qamta alabayäshuy.
Kuyakuq kanqaykipita y ninqayki rasun kaq kanqanpita alabayäshuy.
2 ¿Imanirtä runakuna asipämar “¿maychötä Diosniki?” niyäman?
3 Tayta Diosnintsikqa ciëluchömi kaykan.
Llapan munanqantami payqa ruran.
4 Runakuna adorayanqan ïdulukunaqa qorillapita y qellayllapitami kayan.
Tsaykunataqa runakunallami rurayan.
5 Shimin kaptinpis manami parlayantsu.
Ñawin kaptinpis manami rikayantsu.
6 Rinrin kaptinpis manami wiyayantsu.
Senqan kaptinpis manami muskiyantsu.
7 Makin kaptinpis manami yatayantsu.
Chakin kaptinpis manami puriyantsu.
Manami imatapis tsaykunaqa parlakuyantsu.
8 Ïdulu munayniynaq kanqannömi ïdulukunata ruraqkunapis kaykäyan.
Ïdulukunaman yärakuqkunaqa ïdulunöllami llapanpis kayan.†
9 Israel runakuna, ¡Tayta Diosllaman yärakuyay!
Paymi yanapamantsik y escüdunö imapitapis tsapämantsik.
10 Aarón casta sacerdötikuna, ¡Tayta Diosllaman yärakuyay!
Paymi yanapamantsik y escüdunö imapitapis tsapämantsik.
11 Tayta Diospita mantsapakuqkuna, ¡payman yärakuyay!
Paymi yanapamantsik y escüdunö imapitapis tsapämantsik.
12 Tayta Diosmi yarparaykämantsik.
Paymi Israel runakunapä bendicionninta churamun.
Aarónpita aywaraqkunapäpis bendicionnintami churamun.
13 Tayta Diosqa paypita mantsapakuqkunapämi bendicionninta churamun.†
Imaykayuqkunapäpis y imaynaqkunapäpis bendicionninta churamunmi.
14 Tsurintsikkunapä y willkantsikkunapä bendicionninta churaykallämutsun.
15 Ciëluta y kay patsata kamaq Tayta Dios bendicionninta qamkunaman churaykallämutsun.
16 Ciëluqa Tayta Diospami kaykan.
Kay patsataqa runakuna täyänanpämi kamashqa.
17 Pamparaykaqkunaqa manami Tayta Diosta alabayannatsu.
18 Noqantsikmi itsanqa Tayta Diosta imaypis alabashun.
¡Aleluya!