Salmo 114 (113a)
Egiptupita yarqayämunqanta yarpanqan
1 Jacobpita aywaraq Israel runakuna Egiptupita yarqamur nacionninman chäyaptinmi† 2 Tayta Dios täkunan nacionman tikrarqan.
Israel runakunami Tayta Dios mandanqan nación rikakurqan.
3 Israel runakuna shämuykäyanqanta rikaskirmi lamarpis ishkayman rakikarqan.†
Jordán mayupis aywaykarmi patsallancho takyaskirqan.†
4 Jirkakunapis carnishnömi saltaykachäyarqan.
Qaqakunapis ashkashnömi pañaykachäyarqan.
5 Lamar, ¿imanirtä ishkayman rakikashqayki?
Jordán mayu, ¿imanirtä takyaskishqayki?
6 Jirkakuna, ¿imanirtä carnishnö saltaykachäyashqayki?
Qaqakuna, ¿imanirtä ashkashnö pañaykachäyashqayki?
7 Patsa, Jacob yärakunqan Tayta Diospa ñöpancho mantsariywan tsuktsukyay.
8 Paymi qaqapita yakuta pashtatsimurqan.
Rumi kanqanchömi pukyuta yuritsimurqan.†