Salmo 116 (114—115)
Tayta Diosta agradëcikunqan
1 Rugakunqäta wiyamaptinmi Tayta Diosta pasaypa kuyä.
2 Mañakunqäta chaskimaptinmi imaypis payta mañakü.
3 Wanuypis janächönami karqan.
Pampayämänanpä kanqantanami yarparqä.
Tsaymi pasaypa mantsarir llakikurqä.
4 Tayta Diostami rugakur nirqä:
“¡Tayta Dios, wanuypita salvaykallämay!”†
5 Tayta Diosqa alli shonqu y allillata ruraqmi kaykan.
Payqa kuyapäkuqmi kaykan.
6 Llampu shonqu kaqkunatami Tayta Dios rikan.
Noqatapis kallpaynaq kaykaptïmi yanapamashqa.
7 Tayta Dios yanapamaptinmi kananqa añawna kawä.
8 Wanuypitapis paymi salvamashqa.
Waqaptïpis paymi shoqamashqa.
Mana kachaypami rikamashqa.
9 Kay patsacho kawanqäyaqqa Tayta Diostami imaypis cäsukushä.
10 Pasaypa llakikuycho karpis paymanmi yärakuykä.
11 Ima ruraytapis mana kamäpakurmi nirqä: “Llapan runakunami llullakuq kayan”.
12 Tayta Dios yanapamanqanpita manami imanöpis pägayta kamäpakütsu.
13 Salvamanqanpitami Tayta Diosta imaypis agradëcikushä.
Jutinta joqarirmi payta alabashä.
14 Tayta Diosta awninqätaqa kuyanqan runakuna qorikäyanqanchömi cumplishä.
15 Tayta Diosqa pasaypami kushikun payta sirviq runakuna wanurnin ñöpanman chäyaptin.
16 Tayta Dios, qamtami imaypis sirvishayki.
Sirvishuqniki warmipa wamranmi kaykä.
Janächöna wanuy kaykaptinmi salvamashqayki.
17 Tsaymi agradëcikur sacrificiukunata qampä apamushä.
Jutikita joqarirmi alabashayki.
18 Tayta Diosta awninqätaqa kuyanqan runakuna qorikäyanqancho
19 y Jerusalén chawpincho Tayta Diospa templunpa patiunchömi cumplishä.
¡Aleluya!