Salmo 22 (21)
Pasaypa llakikur Tayta Diosta alabanqan
(1) Cantaqkunapa mandaqninpämi. Tutapa yarqamuq lluytsu niyanqan cantupa tönunwan kay salmuta cantayanki. David qellqanqan salmu.
1 (2) Tayta Dios, Tayta Dios, ¿imanirtä kachariykamashqayki?†
Ay, ¿imanirtä salvaykallämankitsu?
¿Imanirtä llakikur mañakamuptïpis wiyaykallämankitsu?
2 (3) Tayta Dios, junaqpa mañakuptïpis manami wiyamankinatsu.
Paqaspa mañakurpis manami añaw kawayta tarïtsu.
3 (4) Imanö kaptinpis qamqa santumi kanki.
Qamqa reymi kanki.
Qamtami Israel runakuna alabayäshunki.a
4 (5) Unay Israel mayïkunapis qammanmi yärakayämurqan.
Yärakayämuptinmi imapitapis salvarqayki.
5 (6) Mañakayämushuptikimi yanaparqayki.
Qamman yärakamuq kaqtaqa manami kachariykurqaykitsu.
6 (7) Tsaynö kaptinpis noqaqa kurunölla karmi mana cuentashqa kaykä.
Marka mayïkunapis asipämarninmi manakaqman churayäman.
7 (8) Rikamaqkunaqa kushipämarninmi asikuyan.
Umankunatapis awirrämi† niyan:
8 (9) “ ‘Tayta Diosmanmi yärakü’ nirqanchä.
Yärakushqa kaptinqa salvatsun ari.
Rasunpaypa kuyarqa mä, yanapananpä shamutsun ari”.†
9 (10) Tsaynö niyaptinpis qam munaptikimi yurishqä.
Mamäpa millqaynincho añaw kanäpäpis qammi yanapamashqayki.
10 (11) Manaräpis yuriptïmi rikamarqayki.
Mamäpa pachancho kanqäpita patsami Diosnï kaykanki.
11 (12) Taytay, ama jaqiykallämaytsu.
Pasaypa llakikuychömi kaykä.
Jaqimaptikiqa ¡pirä yanapamanqa!
12 (13) Chikimaqnïkunaqa waqrakuq törukunanömi tumapaykäyäman.
Paykunaqa kaykäyan Basáncho kaykaq kallpasapa törukunanömi.
13 (14) Mikukuq leonkunanörämi qayaraykäyan.
Äyakurkurmi noqaman cörriyämun.
14 (15) Tsaymi yaku jichashqa kanqannö kallpäpis kantsu.
Tullükunapis chipyaqmi qotukashqa.
Shonqüpis cëra tsulluqnömi ushakaykan.
15 (16) Shimïpis kankakayparämi tsakiykan.
Qallüpis pasaypa tsakirmi watakaykan.
Wanushqatanömi allpacho jaqiskamashqayki.
16 (17) Chikimaqkunami kanikuq allqukunanöpis jiruruypa tsaparäyäman.
Makïtapis chakïtapis rachirmi ushayämashqa.
17 (18) Tullükunapis yupanakuykäyanmi.
Kushipämarmi rikapaykäyäman.
18 (19) Latsapätapis rakipänakuyashqami.
Mayqanpis apakunanpämi suertita jitayashqa.†
19 (20) Tayta Dios, ama kachämaytsu.
Qammi kallpata qomanki.
Ras shamur salvaykallämay.
20 (21) Runakuna wanutsiyämänanpita tsapaykallämay.
Tsay allqukunapita salvaykallämay.
21 (22) Tsay leonkunapita washaykallämay.
Tsay waqrakuq törukunapitapis qeshpiykatsillämay.
22 (23) Salvakuq kanqaykitami wawqïkunata willashä.b
Paykunawan qorikaykurmi qamta alabashayki.†
23 (24) Tayta Diospita mantsapakuqkuna, payta alabayay.
Jacobpita aywaraqkuna, payta adorayay.
Israelpita aywaraqkuna, payta respitayay.
24 (25) Tayta Diosqa ñakaycho kaqkunata kuyapanmi.
Mana qonqaypami paykunata yanapan.
Mañakuptinqa wiyanmi.
25 (26) Runakuna qorikäyanqanchömi alabashayki.
Mantsapakushuqnikikunapa ñöpanchömi awninqäkunata cumplishä.c
26 (27) Muchuqkunaqa pacha juntami mikuyanqa.
Tayta Diosta ashiqkunaqa paytami alabayanqa.
Paykunaqa imayyaqpis kushishqallami kawayanqa.
27 (28) May nacionpita karpis Tayta Diosmanmi yärakuyanqa.
Pï casta karpis ñöpanman qonqurikuykurmi adorayanqa.
28 (29) ¡Tayta Diosmi mandamaqnintsik rey kaykan!
¡Paypa munayninchömi llapan nacionkunapis kaykan!
29 (30) Tsaymi munayyuq runakuna kushikur adorayanqa.
Llapan runakunapis wanuyänanpä kanqanta tantiyakurmi ñöpanman qonqurikuyanqa.
30 (31) Tsurintsikkunapis Tayta Diostami sirviyanqa.
Paypitami imayyaqpis willakuyanqa.
31 (32) Allillata ruraq kanqaykipitami qepa yuriqkunatapis willayanqa.
Llapantapis cumplinqantami willayanqa.