Salmo 21 (20)
Reyta Tayta Dios yanapanqan
(1) Cantaqkunapa mandaqninpämi. David qellqanqan salmu.
1 (2) Tayta Dios, yanapanqaykipitami rey pasaypa kushishqa kaykan.
Contrankunata vincinanpä yanapaptikimi pasaypa kushikuykan.
2 (3) Shonqun munanqannömi kamakätsishqayki.
Imata mañakushunqaykitapis manami ñëgashqaykitsu. Selah
3 (4) Vinciskir kutimuptin kushishqami chaskishqayki.
Qori corönatapis jatitsishqaykimi.
4 (5) Mana wanunanpä mañakushunqaykinöllami yanapashqayki.
Kawayta qaraptikimi imayyaqpis kawaykan.
5 (6) Yanapaptikimi pïmaypitapis reqishqa kaykan.
Pïmay respitananpämi yanapashqayki.
6 (7) Mana kachaypami imaypis yanapashqayki.
Ñöpaykicho karmi kushishqa kawan.
7 (8) Tayta Diosmanmi rey yärakun.
Poderyuq Tayta Diosmi payta imaypis kuyan.
Tsaynö kaptinmi imaypis llakishqa purinqatsu.
8 (9) Tayta rey, qammi llapan contrayki runakunatapis ushakätsinki.
Derëcha kaq makikiwanmi contraykikunata ushakätsinki.
9 (10) Juzganqayki junaqmi jornuman qaykuqnö llapanta ushakätsinki.
Tayta Dios pasaypa ajarmi imatapis nina lunyar ushanqannö ushakätsinqa.
10 (11) Contrayki runakunataqa chipyaqmi ushakätsinki.
Tsurinkunata y tsurinkunapita aywaraqkunatapis llapantami ushakätsinki.
11 (12) Contrayki shäriyänanpä mayjina willanakurpis yarpäyanqannö manami kamakätsiyanqatsu.
12 (13) Paykunata flëchaykikunawan atacaptikimi maytsaypapis qeshpir aywakuyanqa.
13 (14) Tayta Dios, munaynikiwan yanapaykayällämay.
Yanapayämanqaykipitami himnukunata cantar alabayäshayki.