Salmo 20 (19)
Reyta yanapananpä Tayta Diosta mañakunqan
(1) Cantaqkunapa mandaqninpämi. David qellqanqan salmu.
1 (2) Ima ñakaycho karpis rugakuptiki Tayta Dios yanapaykulläshuy.
Jacob yärakunqan Tayta Dios tsapaykulläshuy.
2 (3) Sióncho kaykaq templunpita patsa yanapaykulläshuy.
3 (4) Paypä ofrendata apanqaykita yarpaykullätsun.
Sacrificiuta altarcho rupatsinqaykitapis chaskiykullätsun. Selah
4 (5) Shonquyki munanqannö kaykullätsun.
Imata ruranaykipä yarpanqaykipis kamakaykullätsun.
5 (6) Contraykikunata vincinqaykita wiyar kushikushun.
Tayta Diosnintsikpa jutincho bandërakunatapis kushishqa jawishun.
Mañakunqaykitapis Tayta Dios chaskiykulläshuy.
6 (7) Musyämi akranqan reyta Tayta Dios yanapananpä kanqanta.
Paymi santu ciëlupita patsa mañakunqanta wiyanqa.
Munayninwanmi contrankunata vincinanpäpis yanapanqa.
7 (8) Wakinqa guërra carrëtankunallamanmi yärakuyan.
Wakinnami cawallunkunaman yärakuyan.
Noqantsikmi itsanqa Tayta Diosnillantsikman imaypis yärakuntsik.†
8 (9) Cawallunkunaman yärakuqkunataqa contrankunami chipyaq vinciyanqa.
Noqantsiktami itsanqa pipis vincimäshuntsu.
9 (10) Tayta Dios, contrankunata vincinanpä reyta yanapaykullay.
Yanapayämänaykipä mañakayämuptï wiyaykayällämay.