Salmo 19 (18)
Kamanqankunawan y palabranwan Tayta Dios musyatsinqan
(1) Cantaqkunapa mandaqninpämi. Kay salmuqa Davidpami.
1 (2) Ciëlumi willakun Tayta Dios munayyuq kanqanta.
Azulyaraykaqmi Tayta Dios llapanta kamanqanta musyatsimantsik.
2 (3) Junaqpapis qoyay qoyaymi musyatsimantsik.
Tsakaypapis cada paqasmi tantiyatsimantsik.
3 (4) Manami runa parlanqannötsu parlan ni parlanqanpis manami wiyakantsu.
4 (5) Tsaynö kaptinpis willakuyninqa maytsaychömi musyakaykan.†
Palabrankunaqa patsa kuchunyaqmi chan.
Rupay täkunantapis Tayta Diosmi kamashqa.
5 (6) Tsaypitami tsayrä majatsakashqa chölunö rupay kushishqa yarqamun.
Alli cörriq chölunömi kushishqa cörrin.
6 (7) Ciëlupa jukaq kuchunpita yarqamurmi jukaq kuchunpana jeqan.
Achayninpitaqa manami imapis qeshpintsu.
7 (8) Tayta Diospa leyninkuna kikin Diospita karmi imaypis mushuq kawayman churamantsik.
Tayta Diospa palabran yärakuypä karmi yachayta qaramantsik.
8 (9) Tayta Diospa yachatsikuyninkuna alli karmi shonquntsikta kushitsin.
Tayta Diospa mandamientunkuna püru karmia shakyätsimantsik.
9 (10) Tayta Diospita mantsapakunantsikpä tantiyatsimanqantsikkuna limpiu karmi imaypis ushakantsu.
Tayta Dios ninqankuna rasunpa karmi pay munanqannölla kaykan.
10 (11) Allinnin qoripitapis mas munapaypämi.
Abëjapa mishkinpitapis masmi mishkin.†
11 (12) Jutsata mana rurananpämi leynikikunawan sirvishuqnikita tantiyatsinki.
Ninqaykikunata cumplirqa bendicionnikitami chaskinqa.
12 (13) ¿Pirä tantiyanman jutsata imanir ruranqanta?
Pakayllapa jutsata ruranqäpita perdonaykallämay.
13 (14) Musyaykar jutsata mana ruranäpä tsapaykallämay.
Shonqü munanqanta mana ruranäpä yanapaykallämay.
Tsaynöpami munanqaykinö kawar imatapis contrayki rurashätsu.
14 (15) Parlanqäkuna y yarpanqäkuna munanqaykinö kaykullätsun.
Tayta Dios, qammi tsapämaqnï y salvamaqnï kanki.