Salmo 18 (17)
Chikiqninkunapita salvaptin Tayta Diosta alabanqan
(1-2a) Cantaqkunapa mandaqninpämi. Tayta Diospa sirviqnin David qellqanqan salmu. Saúlpita y llapan contrankunapita salvaptinmi Tayta Diosta David kay salmuta cantar alabarqan.
1 (2b) Tayta Dios, qamtami pasaypa kuyä.
Qammi kallpatapis qaramanki.
2 (3) Tayta Diosqa tsapämaqnï qaqami kaykan.
Payqa pakakunä y salvamaqnïmi kaykan.
Payllami Diosnï kaykan.
Amparakunä qaqami kaykan.
Paymanmi yärakü.
Escüdü karmi tsapäman.
Munayyuq karmi imaypis salvaman.
Payqa altunnincho pakakunä machaymi kaykan.
3 (4) Tayta Diostami imaypis alabashä.
Mañakuptïmi conträkunapita imaypis salvaman.
4 (5) Runata prësu tsariskir wataqnömi wanuypis tsarimayta munarqan.
Imaykatapis apaq juchunömi ushakätsimänanpä karqan.
5 (6) Wanuypis waskanwanmi watamarqan.
Ushakätsikuq trampatami churapämarqan.
6 (7) Wanunäpäna kanqanta yarparmi Tayta Diosta mañakurqä.
Yanapamänanpämi Diosnïta rugakurqä.
Rugakuptïmi templunpita patsa wiyamarqan.
Pasaypa llakikurnin mañakunqätami wiyamarqan.†
7 (8) Patsapis pasaypami kuyurqan.
Jirkakunapa cimientunpis tsuktsukyäyarqanmi.
Tayta Dios ajanaptinmi llapanpis kuyurqan.
8 (9) Senqanpitami qoshnipis yarqamurqan.
Shiminpitami lunyaykaq ninapis yarqamurqan.
Rawraykaq shanshatami aqtumurqan.
9 (10) Ciëlu punkuta kichaskirmi urämurqan.
Chakin jawanchöpis yana pukutaymi karqan.
10 (11) Querubín angelnin muntashqami pajamurqan.
Wayra jananchömi cörrilla shamurqan.†
11 (12) Paypa pakakunanqa pasaypa tsakaymi karqan.
Yanaraykaq pukutaymi payta tsapaskirqan.
12 (13) Illaqukuynö chipipiyllami ñöpanpita yarqamurqan.
Runtu tamyawan rawraykaq shanshallami tamyamurqan.
13 (14) Tayta Dios ciëlupita parlamunqanqa maqakuynömi wiyakämurqan.
Ciëlupitami poderyuq Diospa vozninpis wiyakämurqan.
Runtu tamyawan rawraykaq shansha chawpinpitami wiyakämurqan.
14 (15) Illaqukuyninta flëchatanörä kachamuptinmi conträkuna wakpa kaypa qeshpir aywakuyarqan.
15 (16) Tayta Dios ollqutupämuptinmi lamar rurinpis kamaylla rikakarqan.
Ajanar pükamuptinmi kay patsata tukmaraqkunapis rikakäyarqan.
16 (17) Tayta Diosmi ciëlupita patsa jancharkamarqan.
Lamar rurincho jitarpukashqanö kaykaptïmi makinwan jipimarqan.†
17 (18) Munayyuq conträkunapa makinpitami salvamarqan.
Noqapita mas munayyuq kayaptinpis paymi libramarqan.
18 (19) Pasaypa desgraciacho kaykaptïmi conträkuna atacayämarqan.
Tsaynö kaykaptïmi Tayta Dios yanapamarqan.
19 (20) Yanapamarmi alliman churamarqan.
Kuyamarninmi salvamarqan.
20 (21) Munanqannö kawaptïmi jipimarqan.
Allillata ruraq kaptïmi salvamarqan.
21 (22) Tayta Dios munanqannöllami imaypis kawaykä.
Jutsata mana ruraypami payta imaypis qatiraykä.
22 (23) Ninqankunataqa llapantami yarparaykä.
Estatütunkunataqa imaypis cumpliykämi.
23 (24) Noqaqa pay munanqannömi kawashqä.
Llutan ruraykunapitapis witikushqämi.
24 (25) Allillata ruraq kaptïmi imaykapitapis Tayta Dios salvamashqa.
Jutsaynaq kanqäta musyarmi yanapamashqa.
25 (26) Tayta Dios, kuyapäkuqkunataqa kuyapankimi.
Allillata ruraqkunataqa yanapankimi.
26 (27) Alli kawaqkunataqa allimi rikanki.
Trampösu kaqkunatami itsanqa castiganki.
27 (28) Qollmi shonqukunataqa salvankimi.
Runa tukuqkunatami itsanqa penqakuyman churanki.
28 (29) Tayta Diosllä, aktsinömi noqapä kaykanki.
Tsakäpakushqanö kaptïpis qammi tantiyatsimanki.
29 (30) Yanapamaptikimi atska soldädukunawanpis pelyashä.
Markapa murällan altu kaptinpis achpaypami yaykushä.
30 (31) Tayta Dios munanqannö kawayqa imaypis allimi.
Llapan awninqantapis payqa cumplinmi.
Payman yärakuqkunataqa escüdunömi tsapan.†
31 (32) Tayta Diospita mas juk Diosqa manami kantsu.
Tayta Diosnintsiknöqa manami pipis tsapämantsiktsu.†
32 (33) Tayta Diosqa kikinmi kallpatapis qaraman.
Paypa makincho karmi munanqannö alli kawä.
33 (34) Pay yanapamaptinmi imayka lluytsunö cörrï.
Jirkakunapa purirpis mana llutskaypami purï.
34 (35) Guërracho alli pelyaq kanäpäpis paymi yachatsiman.
Bronci flëchakunata sutar wiksutsinäpäpis paymi kallpata qaraman.
35 (36) Qamqa escüdü karmi imapitapis tsapämar salvamashqayki.
Derëcha kaq makikiwanmi tsararämashqayki.
Kuyapämarmi llapanchöpis yanapamashqayki.
36 (37) Qammi shumaq tantiyatsimashqayki maypa aywarpis munanqaykinö kawanäpä.
37 (38) Chikimaqnïkunatapis qati qatiykurmi ushakätsishqä.
Llapanta wanuskatsirrämi jamashqä.
38 (39) Paykunataqa chipyaqmi wanutsir ushashqä.
Vinciskirmi mashtaraykaqta jaqishqä.
Paykunaqa yapay manami conträ shäriyashqatsu.
39 (40) Qammi guërracho pelyanäpä kallpata qaramashqayki.
Conträkunata vincinäpämi makïman churamushqayki.
40 (41) Vincinäpä yanapamaptikimi kunkapita jarushqä.
Chikimaqnïkunataqa llapantami ushakätsishqä.
41 (42) Paykunataqa qayakuyaptinpis manami pipis yanapashqatsu.
Tayta Diosta mañakuyaptinpis manami cäsushqatsu.
42 (43) Polvuta wayra apar illakätsinqannömi paykunataqa illakätsishqä.
Cällicho mituta lanquqnömi paykunatapis lanqushqä.
43 (44) Israel nacioncho conträ shäriyaptinpis qammi salvamashqayki.
Juk nacionkunapa mandaqnin kanäpämi churamashqayki.
Mana reqinqä runakunami kanan sirviykäyäman.
44 (45) Juklä nación runakunapis munaynïchömi kayan.
Mandaptïqa jinan hörami paykuna cäsuyäman.
45 (46) Tsay jäpa runakunaqa mantsayämanmi.
Qayaptïpis pakaräyanqanpita tsuktsukyarrämi yarqayämun.
46 (47) ¡Alabashqa kaykullätsun Tayta Dios!
¡Alabashqa kaykullätsun tsapämaqnï!
¡Alabashqa kaykullätsun salvamaqnï Tayta Dios!
47 (48) Qammi conträ shäriqkunata castigashqayki.
Llapan nación runakunatapis munaynïmanmi churamushqayki.
48 (49) Qammi chikimaqnïkunapita salvamashqayki.
Conträ shäriqkunapitami libramashqayki.
Wanutsikuq runakunapitapis tsapämashqaykimi.
49 (50) Tsaymi may nacioncho karpis adorashayki.
Llapan shonqüwan cantarmi alabashayki.†
50 (51) Akranqayki reytaqa llapanchömi yanapaykanki.
Davidta y paypita aywaraqkunatami imaypis kuyapaykanki.