Salmo 17 (16)
Chikiqninkunapita salvananpä mañakunqan
(1a) Kay salmuqa Tayta Diosta David mañakunqanmi.
1 (1b) Tayta Dios, mañakamunqäta wiyaykallämay.
Qayakamunqäta chaskiykallämay.
Rugakamunqäta wiyaykallämay.
Llapan shonqüwanmi qamta mañakamü.
2 Qam musyankimi imanö kanqätapis.
Tsaymi mañakamü janä shäriykunaykipä.
3 Junaqpapis paqaspapis shonqü imata yarpanqantapis musyaykankimi.
Ima jutsätapis manami tarishqaykitsu.†
Llutankunataqa manami imaypis parlashqätsu.
4 Mandamientuykikunata cäsukurmi runakuna llutanta rurayaptinpis llutanta rurashqätsu.
5 Tantiyatsimanqaykinömi imaypis kawashqä.
Ninqaykikunata imaypis cäsukushqämi.
6 Taytay, mañakamunqätaqa imaypis wiyaykämankimi.
Tsayta musyarmi imaypis mañakamü.
Rugakamunqäta wiyar yanapaykallämay.
7 Llapan shonqunkunawan yärakamuqtaqa contrankunapita salvankimi.
Kuyamanqaykita tantiyanäpä noqallätapis salvaykallämay.
8 Ñawi nïñuykitanö cuidaykallämay.
Chipshanta älan rurinman wallpa pakanqannö noqatapis pakaykallämay.†
9 Mana alli runakunapa makinpita tsapaykallämay.
Conträkuna jiruruypa tsapäyämaptinpis salvaykallämay.
10 Conträkunaqa mana kuyapäkuqmi kayan.
Runa tukurmi imatapis parlaykäyan.
11 Maypa aywaptïpis rikaraykäyämanmi.
Llutankunaman ishkitsiyämänanpämi shuyaraykäyäman.
12 Leonnö pakakuykurmi pitapis atacayänanpä shuyaraykäyan.
13 Tayta Dios, tsay mana alli runakunata castigaykullay.
Qonqurninkunatapis tumaskatsillay.
Espädaykiwan salvaykallämay.
14 Munaynikiwan tsapaykallämay.
Tsay runakunata kay patsapita illakaykatsillay.
Paykunapa herenciankunaqa kay patsacho kaqkunallami kaykan.
Paykunaqa imaykayuq karpis jina imaykayuq kayätsun.
Wamrankunapis empachanqanyaq mikuyätsun.
Willkankunapäpis ujuq ujuq katsun.
15 Noqami itsanqa ñöpaykiman chämushä.†
Qamta rikaykurnikimi kushikushä.