Salmo 16 (15)
Tayta Diospa makincho kawanqantsik llapanpitapis mas alli kanqan
(1a) David qellqanqan salmu.
1 (1b) Tayta Dios, qamllamanmi yärakamü.
Mana allikunapita tsapaykallämay.
2 Tayta Diosta mañakurmi nishqä:
“Qammi Señornï kanki.
Qamman yärakur kawanqäqa llapanpitapis mas allimi”.
3 Kay patsacho munanqaykinö kawaq santu runakunaqa rasunpami alli runakuna kayan.
Paykunapita pasaypami kushikü.
4 Juk dioskunata adoraqkunaqa pasaypa ñakarmi kawayanqa.
Noqaqa juk diospa altarninmanpis manami uywapa yawarninta wiñapäshätsu.
Jutinkunatapis manami joqarishätsu.
5 Tayta Dios, kikikimi herenciä kaykanki.
Qammi bendicionta imaypis churamunki.
Llapan päsamänanpä kaqkunatami musyanki.
6 Llapan qaramanqaykiqa allimi kaykan.
Tsaymanqa manami imapis tinkuntsu.
7 Tayta Diosmi imanö kawanäpäpis tantiyatsiman.
Tsaymi payta imaypis alabashä.
Tantiyatsimanqantaqa paqaspapis yarparaykämi.
8 Tayta Diostami imay hörapis yarparaykä.
Derëchächo karmi imaypis yanapaykäman.
9 Tsaymi shonqüpis pasaypa kushikun.
Shimïpis paytami alaban.
Payman yärakurmi imaypis añawlla kawä.
10 Wanushqakuna pamparäyanqanchöqa manami kacharimankitsu.
Santu sirviqniki kaptïmi sepultüracho cuerpü ismunantapis munankitsu.†
11 Munanqaykinö kawanäpämi alli nänipa pushamanki.
Ñöpaykichöqa imaypis kushishqallami kawä.†
Derëcha kaq makikiwanmi imaypis bendicionnikita churamunki.