Salmo 12 (11)
Tayta Diosta yanapananpä mañakunqan
(1) Cantaqkunapa mandaqninpämi. Puwaq cuerdayuq instrumentuta tukapayllapa cantayanki. David qellqanqan salmu.
1 (2) Tayta Dios, muchuqkunata salvaykullay.
Qamman yärakamuq runakuna mananami kannatsu.†
Alli ruraq runakuna llapannami ushakäyashqa.
2 (3) Runakunaqa jukninpis jukninpis llullapänakuyanmi.
Tsaynö karmi awnirkurpis manäniräyan.
3 (4) Llulla runakunata y orgullösu runakunataqa Tayta Dios llapanta ushakätsitsun.
4 (5) Paykunaqa nikäyan: “Parlaychöqa manami pipis vincimäshuntsu.
Imanöpapis tsapakushunmi.
Noqantsiktaqa pipis manami upällatsimäshuntsu”.
5 (6) Tayta Diosmi nin:
“Muchuqkunata y qollmi shonqukunataqa alläpami ñakaykätsiyan.
Ñakatsiyaptinmi pasaypa waqaykäyan.
Tsaymi paykunata juklla yanapashä.
Mañakayämanqannöllami paykunata salvashä”.
6 (7) Tayta Dios awninqankunaqa llapanpis yärakuypämi.
Püru kananpä qanchis kuti tsullutsishqa yuraq qellaynömi ninqankunapis kaykan.
7 (8) Tayta Dios, musyämi muchuqkunata yanapanaykipä kanqanta.
Musyämi mana alli runakunapita imaypis tsapänaykipä kanqanta.
8 (9) Mana alli runakunaqa maytsaypami rikapakur puriyan.
Jutsata rurayaptinpis alli kayanqantami niyan.