Jerusaléncho täyänanpä aywaqkuna
11
Judá provinciapa mandaqninkunaqa llapanpis Jerusalénchömi täyarqan. Wakin runakunami suertita jitayarqan cada chunka castapita juk casta Tayta Dios akranqan Jerusaléncho täyänanpä. Suertita jitayaptin mana yarqamuqkunanami patsan markankunallacho täyarqan. 2 Wakinnami voluntäninpita Jerusaléncho täyänanpä aywayarqan. Paykunatami runakuna kushikurnin chaskiyarqan.3 Judá provinciacho quëdaqkunaqa kikinkunapa chakrankunacho y markankunachömi täyarqan. Tsay runakuna kayarqan sacerdötikuna, levitakuna, templucho aruqkuna, Salomónpa wätayninkunapita aywaraqkuna y wakin Israel runakunapis.
Jerusaléncho täyänanpä markankunapita aywaq runakuna mayqan mayqan kayanqanpis kaychömi qellqaraykan. Paykunaqa cada ünunkunami castanpa mandaqnin kayarqan. 4 (Jerusalénchömi Judá trïbu runakuna y Benjamín trïbu runakunapis täyarqan.)
Judá trïbu runakunapita Jerusalénman aywaq runakunami kayarqan:
Ataías (Payqa Uzíaspa tsurinmi karqan. Uzías karqan Zacaríaspa tsurinmi. Zacarías karqan Amaríaspa tsurinmi. Amarías karqan Sefatíaspa tsurinmi. Sefatías karqan Mahalaleelpa tsurinmi. Mahalaleel karqan Fares castami)
5 y Maasías. (Payqa Barucpa tsurinmi karqan. Baruc karqan Colhozipa tsurinmi. Colhoze karqan Hazaíaspa tsurinmi. Hazaías karqan Adaíaspa tsurinmi. Adaías karqan Joiaribpa tsurinmi. Joiarib karqan Zacaríaspa tsurinmi. Zacaríasnami karqan Judápa tsurin Sela casta.)
6 Judápa tsurin Fares casta runakuna Jerusaléncho täyarqan chusku pachak soqta chunka puwaq (468) runakunami. Paykuna llapanpis alli chölullantämi kayarqan.
7-8 Benjamín trïbu runakunapita Jerusalénman aywaq runakunami kayarqan Salú, Gabai y Salai. Salúqa Mesulampa tsurinmi karqan. Mesulam karqan Joedpa tsurinmi. Joed karqan Pedaíaspa tsurinmi. Pedaías karqan Colaíaspa tsurinmi. Colaías karqan Maasíaspa tsurinmi. Maasías karqan Itielpa tsurinmi. Itiel karqan Jesaíaspa tsurinmi.
Jerusalénman aywaq Benjamín trïbu runakunami kayarqan isqun pachak ishkay chunka puwaq (928) runakuna. 9 Paykunapa mandaqninmi karqan Zicripa tsurin Joel. Joeltanami tsay markacho mandar yanaparqan Senúapa tsurin Judá.
10 Jerusalénman aywaq sacerdötikunami kayarqan Joiaribpa tsurin Jedaías, Jaquín 11 y Seraías. Seraíasqa Hilcíaspa tsurinmi karqan. Hilcías karqan Mesulampa tsurinmi. Mesulam karqan Sadocpa tsurinmi. Sadoc karqan Meraiotpa tsurinmi. Meraiot karqan Ahitobpa tsurinmi. Ahitobqa mandaq sacerdötimi karqan. 12 Jedaías casta sacerdötikunami kayarqan puwaq pachak ishkay chunka ishkay (822) runakuna. Paykunaqa templuchömi Tayta Diosta sirviyarqan.
Paykunawanmi sacerdöti Adaías kaykarqan. Adaías karqan Jerohampa tsurinmi. Jeroham karqan Pelalíaspa tsurinmi. Pelalías karqan Amsipa tsurinmi. Amsi karqan Zacaríaspa tsurinmi. Zacarías karqan Pasurpa tsurinmi. Pasur karqan Malquíaspa tsurinmi. 13 Adaías castacho mandaqkunallata yupayaptinmi kayarqan ishkay pachak chusku chunka ishkay (242) runakuna.
Paykunawanmi sacerdöti Amasai karqan. Amasai karqan Azareelpa tsurinmi. Azareel karqan Azaipa tsurinmi. Azai karqan Mesilemotpa tsurinmi. Mesilemot karqan Imerpa tsurinmi. 14 Amasai casta sacerdötikunami kayarqan juk pachak ishkay chunka puwaq (128) runakuna. Paykunaqa llapanpis alli chölullantämi kayarqan. Mandaqninmi Gedolimpa tsurin Zabdiel karqan.
15 Jerusalénman aywaq levitakunami kayarqan:
Semaías (Payqa karqan Hasubpa tsurinmi. Hasub karqan Azricampa tsurinmi. Azricam karqan Hasabíaspa tsurinmi. Hasabías karqan Bunipa tsurinmi),
16 Sabetai, Jozabad (paykunaqa levitakunapa mandaqnin karmi Diospa templun waqtancho aruqkunapa capatazninkuna kayarqan),
17 Matanías (Payqa karqan Micaíapa tsurinmi. Micaía karqan Zabdipa tsurinmi. Zabdi karqan Asafpa tsurinmi. Asaf karqan Tayta Diosta mañakunqan höra alabaqkunapa directorninmi),
Bacbuquías (Payqa karqan Mataníasta mandashiqmi)
y Abda (Payqa Samúapa tsurinmi karqan. Samúa Galalpa tsurinmi karqan. Galal Jedutúnpa tsurinmi karqan).
18 Tayta Dios akranqan sagrädu Jerusaléncho taq levitakunami kayarqan ishkay pachak puwaq chunka chusku (284).
19 Jerusalén punku täpaq runakunami kayarqan Acub, Talmón y castankuna. Paykunaqa Jerusalénman aywayarqan juk pachak qanchis chunka ishkay (172) runakunami.
20 Tsaypita kaqqa Israel runakuna, sacerdötikuna y levitakunapis täyarqan Judácho kaykaq kikinkunapa markankunachönami.
21 Diospa templuncho aruqkunami Ofel barriucho täyarqan. Paykunapa mandaqninkunami kayarqan Zihawan Gispa.
22 Jerusaléncho taq levitakunapa mandaqninmi karqan Uzi. Uzi karqan Banipa tsurinmi. Bani karqan Hasabíaspa tsurinmi. Hasabías karqan Mataníaspa tsurinmi. Matanías karqan Micaíapa tsurinmi. Micaía karqan Asaf castami. Paykunaqa Tayta Diospa templuncho cantaqkunapa directorninmi kayarqan. 23 Templucho cantaqkuna qoyay qoyay churanakuypa cantayänanpäqa reymi ordenashqa karqan.
24 Mesezabeelpa tsurin Petaíastami rey churashqa karqan runakuna quejakuyanqanta arreglananpä. Mesezabeelmi karqan Zera casta. Zerami karqan Judápa tsurin.
25 Wakin kaq Judá trïbu runakuna täyarqan Quiriat-arba particho y caseriunkunacho, Dibón particho y caseriunkunacho y Jecabseel particho y caseriunkunacho. 26 Tsaynöllami täyarqan Josué markacho, Molada markacho, Bet-pelet markacho, 27 Hazar-sual markacho, Beerseba particho y caseriunkunacho, 28 Siclag markacho, Mecona particho y caseriunkunacho, 29 En-rimón particho, Zora particho, Jarmut particho, 30 Zanoa particho, Adulam particho y caseriunkunacho, Laquis particho y Azeca particho y caseriunkunacho. Tsaymi Judá trïbu runakunaqa täyarqan Beersebapita hasta Hinom raqrayaq.
31 Benjamín trïbu runakunami täyarqan Geba markacho, Micmas markacho, Aía markacho, Bet-el particho y caseriunkunacho, 32 Anatot markacho, Nob markacho, Ananías markacho, 33 Hazor markacho, Ramá markacho, Gitaim markacho, 34 Hadid markacho, Seboim markacho, Nebalat markacho, 35 Lod markacho, Ono markacho y Artesänukuna Täyanqan Pampa niyanqanchöpis.
36 Wakin levitakunaqa Judá trïbu runakuna täyanqanpita aywakuyarqan Benjamín trïbu runakuna täyanqancho täyänanpämi.