Jerusalénman aywaq levitakuna y sacerdötikuna
12
Babiloniapita Jerusalénman aywarmi Salatielpa tsurin Zorobabelwan mandaq sacerdöti Josué sacerdötikunata y levitakunata pushayarqan. Pushayanqan sacerdötikunami kayarqan Seraías, Jeremías, Esdras, 2 Amarías, Maluc, Hatús, 3 Secanías, Rehum, Meremot, 4 Iddo, Gineto, Abías, 5 Mijamín, Maadías, Bilga 6 y Semaías. Tsaynöllami paykunawan kayarqan Joiarib, Jedaías, 7 Salú, Amoc, Hilcías y Jedaías. Wakin sacerdötikunapa mandaqnin y wakinnami kayarqan sacerdötikunalla. Paykuna sacerdöti kayarqan Josué mandaq sacerdöti kanqan witsanmi.8 Pushayanqan levitakunami kayarqan Josué, Binúi, Cadmiel, Serebías, Judá y Matanías. Paykunami levita mayinkunawan Tayta Diosta alabayaq. 9 Tayta Diosta alabayaptinmi ñöpanman Bacbuquíaswan Unipis Diosta alabayänanpä ichïyarqan. Bacbuquíaswan Unipis levitami kayarqan.
10 Josué karqan Joiacimpa taytanmi. Joiacim karqan Eliasibpa taytanmi. Eliasib karqan Joiadapa taytanmi. 11 Joiada karqan Jonatánpa taytanmi. Jonatán karqan Jadúapa taytanmi.
12 Kaychömi qellqaraykan sacerdöti castakunapa mandaqninkuna mayqan mayqan kanqanpis. Paykunaqa Joiacim mandaq sacerdöti kaykanqan witsanmi mandaq kayarqan:
Seraías castacho Meraías mandaq karqan.
Jeremías castacho Hananías mandaq karqan.
13 Esdras castacho Mesulam mandaq karqan.
Amarías castacho Johanán mandaq karqan.
14 Melicú castacho Jonatán mandaq karqan.
Sebanías castacho José mandaq karqan.
15 Harim castacho Adna mandaq karqan.
Meraiot castacho Helcai mandaq karqan.
16 Iddo castacho Zacarías mandaq karqan.
Ginetón castacho Mesulam mandaq karqan.
17 Abías castacho Zicri mandaq karqan.
Miniamín castacho mandaq karqan....a
Moadías castacho Piltai mandaq karqan.
18 Bilga castacho Samúa mandaq karqan.
Semaías castacho Jonatán mandaq karqan.
19 Joiarib castacho Matenai mandaq karqan.
Jedaías castacho Uzi mandaq karqan.
20 Salai castacho Calai mandaq karqan.
Amoc castacho Heber mandaq karqan.
21 Hilcías castacho Hasabías mandaq karqan.
Jedaías castacho Natanael mandaq karqan.
22 Levitakunapa mandaqninkuna mayqan mayqan kanqanta y sacerdöti castakunapa mandaqninkuna mayqan mayqan kanqanta qellqayarqan Eliasib mandaq sacerdöti kaykanqan witsan, Joiada mandaq sacerdöti kaykanqan witsan, Johanán mandaq sacerdöti kaykanqan witsan y Jadúa mandaq sacerdöti kaykanqan witsanmi. Tsaynö qellqayarqan hasta Persia nacioncho rey Darío mandanqan witsanyaqmi. 23 Levitakunapa mandaqninkuna acta libruman jutinkunata tsaynö qellqayarqan hasta Eliasibpa tsurin Johanán wanunqanyaqmi. 24 Levitakunapa mandaqninkunami kayarqan Hasabías, Serebías y Cadmielpa tsurin Josué. Paykunapa ñöpanmanmi levita mayinkuna ichïyarqan Tayta Diosta agradëcikur alabar yanapayänanpä. Turnun töcaptin tsaynö rurayänanpämi Tayta Diosta sirviq David unay mandarqan.
25 Almacén cuartukunata täpaqkunami kayarqan Matanías, Bacbuquías, Obadías, Mesulam, Talmón y Acub. Tsay cuartukunaqa templu patiuman yaykuna punkukuna ñöpanchömi karqan. 26 Paykunaqa kawayarqan Josuépa tsurin Joiacim mandaq sacerdöti kaykanqan witsanmi. Joiacimqa Josadacpa willkanmi karqan. Tsaynöpis paykuna kawayarqan Nehemías gobernador kaykanqan witsan y sacerdöti Esdras leyta yachatsiq kaykanqan witsanmi.
Jerusalén murällata inaugurayanqan
27 Jerusaléncho shäritsiyanqan murällata inaugurayänanpämi levitakunata maytsaycho täyaptinpis qayatsiyämurqan. Tsaynö qayatsiyämurqan platïllukunata, salteriukunata y arpakunata tukar Tayta Diosta agradëcikur kushikuypita cantayänanpämi. 28 Tsaymi cantayänanpä levitakuna qorikäyarqan Jerusalénpa ñöpan markakunapita y Netofapa ñöpan markakunapitapis. 29 Tsaynöllami qorikäyarqan Gilgal, Geba y Azmavet ñöpankunapitapis. Tsay partikunachömi levitakuna wayinkunata sharkatsishqa kayarqan.
30 Fiestata rurayänanpämi puntata sacerdötikuna y levitakuna bäñakur purificakuyarqan. Purificakuskirnami runakunata, marka murällata y murällapa punkunkunata purificayarqan.
31 Tsaypitanami Judá provinciapa mandaqninkunata witsätsirqä murälla jananman. Tsaychömi ishkay grüpu cantaqkunata churarqä. Punta kaq grüpumi derëcha kaqläman Basüra Jitakuna jutiyuq punku jananpa aywarqan. 32 Paykunapa qepantanami Osaías aywarqan pullan Judá mandaqkunata pushashqa. 33 Tsaynöllami aywayarqan Azarías, Esdras, Mesulam, 34 Judá, Benjamín, Semaías y Jeremías. 35-36 Paykunaqa sacerdöti kaqllami kayarqan. Tsay sacerdötikunami cornëtata tukaraykar aywayarqan. Paykunawanmi aywayarqan Zacarías y castankuna Semaías, Azarael, Milalai, Gilalai, Maai, Natanael, Judá y Hanani. (Zacaríasqa karqan Jonatánpa tsurinmi, Jonatán karqan Semaíaspa tsurinmi, Semaías karqan Mataníaspa tsurinmi, Matanías karqan Micaíaspa tsurinmi, Micaías karqan Zacurpa tsurinmi y Zacur karqan Asafpa tsurinmi.) Llapanpis tsay sacerdötikunami instrumentukunata tukaraykar aywayarqan. Tsay instrumentukunaqa Tayta Diosta sirviq David tukanqan instrumentunömi karqan. Paykunapa puntantami leykunata yachatsiq Esdras aywarqan. 37 Pukyu jutiyuq punkuman chaykurmi grädapa witsäyarqan Davidpa Markan niyanqan partiyaq. Tsaypa aywarmi Davidpa palaciunpa päsayarqan. Tsaypitanami rupay yarqamunan kaqläpa päsar Yaku jutiyuq punkuyaq chäyarqan.
38 Ishkay kaq grüpu cantaqkunanami itsuq kaqläpa murälla janallanpa aywayarqan. Qepankunatami wakin runakunawan juntu noqapis aywarqä. Päsayarqä Jornu törripa, Anchu Pirqa ninqanpa, 39 Efraín punku jananpa, Jesana punku jananpa, Pescädu punku jananpa, Hananeel törripa, Pachak jutiyuq törripa y Üshakuna punku jananpa. Wardiakuna jutiyuq punku jananman chaykurmi ichiskiyarqä.
40 Tsaypitanami ishkan grüpu cantaqkuna Tayta Diospa templunman chaykur sitiunkunaman kamakäyarqan. Noqapis tsaynöllami yanapamaq mandaqkunawan churanakuyarqä. 41 Cornëtan aptashqa sacerdötikunapis noqawanmi kaykäyarqan. Tsay sacerdötikunami kayarqan Eliacim, Maaseías, Miniamín, Micaías, Elioenai, Zacarías y Hananías. 42 Paykunapa qepankunatami aywayarqan Maasías, Semaías, Eleazar, Uzi, Johanán, Malquías, Elam y Ezer. Cantukunata cantaqkunami jinchi cantayarqan. Paykunapa directorninmi karqan Izrahías.
43 Tsay junaqmi Tayta Diospä tsaytsika uywakunata pishtar sacrificiuta rupatsiyarqan. Tayta Dios yanapayämaptinmi pasaypa kushikur fiestata rurayarqä. Warmikunapis wamrakunapis kushishqami tsaycho kayarqan. Jerusaléncho fiestata kushishqa rurayanqä karuyaqmi wiyakarqan.
Sacerdötikunapä y levitakunapä apayämunqan
44 Tsay junaqmi churayarqan almacén cuartu täpaqkunata. Ofrendakunata, primiciakunata y diezmukunata markakunapita y chakrakunapita Judá runakuna apayämuptinmi tsay täpaqkuna chaskiskir almacén cuartukunaman churayarqan. Leykuna ninqannömi sacerdötikunapä y levitakunapä tsay qoriyanqan karqan. Judá runakuna tsaynö qoriyarqan sacerdötikuna y levitakuna Tayta Diospa templuncho sirviyanqanpita kushikurmi.
45 Sacerdötikunawan levitakunami purificación ruraykunata rurarninb Tayta Diosta shumaq sirviyarqan. Tsaynöllami cantaqkuna y punku täpaqkunapis David y tsurin Salomón ordenayanqannölla llapanta cumpliyarqan. 46 Tayta Diosta tsaynö sirviyarqan rey David y cantaqkunapa directornin Asaf kawanqan witsan Tayta Diosta sirviyanqannömi. Tsay witsanmi cantaqkunapa directornin dirigiptin Tayta Diosta agradëcikur templucho alabayarqan.
47 Zorobabel mandanqan witsan y Nehemías mandanqan witsanpis qoyay qoyaymi Israel runakuna tsaki mikuy ofrendakunata cantaqkunapä y punku täpaqkunapä apayämuq. Tsaynöllami levitakunapäpis apayämuq. Levitakunanami chaskiyanqankunata Aarónpita aywaraqkunatac entregayaq.