Templucho aruyänanpä sacerdöti castakunata David churanqan
24
Aarónpita aywaraq sacerdötikunapis castanpa castanpami templucho Tayta Diosta sirviyarqan. Aarónpa tsurinkunapa jutinkunami kayarqan Nadab, Abiú, Eleazar y Itamar. 2 Nadabwan Abiúqa† tsurinkuna manarä kaptinmi taytanpita mas puntata wanuyarqan. Paykuna wanuskiyaptinmi Eleazar y Itamarllana sacerdöti kayarqan.3 Paykunapita aywaraq sacerdötikunatami templuta shäriskatsiyaptin trukanakuypa aruyänanpä David churarqan. Eleazarpita aywaraq Sadoc y Itamarpita aywaraq Ahimelec yätsiyanqannömi David tsaynö churarqan. 4 Eleazarpita aywaraq sacerdötikuna atskaq kayanqanta tantiyaskirmi chunka soqta grüpuman rakirqan. Tsaynöllami Itamarpita aywaraq sacerdötikunatapis puwaq grüpuman rakirqan.
5 Eleazarpita aywaraq kaqcho y Itamarpita aywaraq kaqchöpis Diosta sirviq sacerdötikuna kaptinmi mayqan casta sacerdötitapis turnun töcananpä suertita jitayarqan. 6 Itamarpita aywaraq sacerdötikunapäqa suertita jitayarqan juk kutillami. Eleazarpita aywaraq sacerdötikunapämi itsanqa suertita jitayarqan ishkay kuti. Suertita jitananpämi levita runa Natanaelpa tsurin secretariu Semaías llapan sacerdöti castakunapa jutinkunata qellqarqan reypa ñöpancho, mandashiqninkunapa ñöpancho, sacerdöti Sadocpa ñöpancho, Abiatarpa tsurin sacerdöti Ahimelecpa ñöpancho, sacerdötikunapa mandaqninkunapa ñöpancho y levita mayinkunapa mandaqninkunapa ñöpancho.
7 Suertita jitayaptinmi puntata yarqamurqan Joiaribpä. Tsaypita suerti yarqamurqan Jedaíaspä, 8 Harimpä, Seorimpä, 9 Malquíaspä, Mijamínpä, 10 Cospä, Abíaspä, 11 Jesúspä, Secaníaspä, 12 Eliasibpä, Jaquimpä, 13 Hupapä, Jesebeabpä, 14 Bilgapä, Imerpä, 15 Hezirpä, Afsespä, 16 Petaíaspä, Hezequielpä, 17 Jaquínpä, Gamulpä, 18 Delaíapä y Maazíaspä.
19 Tsaynöpami sacerdötikunata churarqan Tayta Diospa templuncho castanpa castanpa trukanakuypa aruyänanpä. Paykuna aruyarqan Israel runakunata kuyaq Tayta Dios sacerdöti Aarónta unay yätsinqannömi.
Templucho aruyänanpä Leví trïbupa wakin castakunata David churanqan
20 Castanpa castanpa templucho aruyänanpämi Leví trïbu wakin castakunapis kayarqan. Tsay castakunapa mandaqninkunami kayarqan Amrampita aywaraq Subael; Subaelpita aywaraq Jehedías; 21 Rehabíaspita aywaraq Isías; 22 Izharpita aywaraq Selomot; Selomotpita aywaraq Jahat; 23 Hebrónpita aywaraq Jerías, Amarías, Jahaziel y Jecamán; 24 Uzielpita aywaraq Micaía; Micaíapita aywaraq Samir 25 y Samirpa wawqin Isías; Isíaspita aywaraq Zacarías; 26 Meraripita aywaraq Mahli y Musi; Jaazíaspita aywaraq Beno. 27 Meraripita aywaraq Jaazíaspitami kayarqan Beno, Soham, Zacur y Ibri. 28 Mahlipita aywaraqpitami karqan Eleazar. Eleazarpa tsurin manami karqantsu. 29 Cispa tsurinmi karqan Jerameel. 30 Musipa tsurinkunami kayarqan Mahli, Edar y Jerimot.
Llapan paykunami kayarqan Levípita aywaraq castakunapa mandaqninkuna. 31 Aarónpita aywaraq sacerdötikunatanömi tsay casta runakunata, mandaq kaqkunata y mana mandaqkunatapis suertita jitaypa churayarqan templucho aruyänanpä. Tsaynö churayarqan rey Davidpa, Sadocpa, Ahimelecpa, sacerdötikunapa mandaqninkunapa y levita mayinkunapa mandaqninkunapa ñöpanchömi.