Templucho aruyänanpä levitakunata David churanqan
23
David pasaypa awkinna karmi tsurin Salomónta churarqan Israel runakunapa mandaqnin rey kananpä.† 2 Tsaypämi David qoritsirqan Israel runakunapa llapan mandaqninkunata, sacerdötikunata y levita runakunata. 3 Qorikäyaptinnami levitakunata kimsa chunka (30) watayuqpita janaman ollqu kaqkunata yupatsirqan. Yupatsiptinmi kayarqan kimsa chunka puwaq waranqa (38,000) runakuna.4 Paykunapitami churarqan ishkay chunka chusku waranqa runakunata (24,000) templucho aruyänanpä. Tsaynöllami churarqan soqta waranqata (6,000) mandashiqkuna y juezkuna kayänanpä. 5 Chusku waranqa (4,000) kaqtanami churarqan templu punkuta täpayänanpä. Y chusku waranqa (4,000) kaqtanami churarqan David ruratsinqan instrumentukunata tukar Tayta Diosta alabayänanpä.
6 Trukanakuypa templucho aruyänanpämi levitakunata kimsa grüpuman David rakirqan. Cada grüputami jutitsirqan Levípa tsurinkunapa jutinkunata. Tsaymi juk grüpupa jutin karqan Gersón, juk grüpupa Coat y jukaq grüpupana Merari.
Gersónpita aywaraqkuna
7 Gersónpa tsurinkunami kayarqan Laadán y Simei.
8 Laadánpa tsurinkuna kimsami kayarqan. Mayor kaqpa jutinmi karqan Jehiel. Paypa qepanmanmi yurirqan Zetam. Zetampa qepanmannami yurirqan Joel. 9 Simeipa kimsan tsurinkunapa jutinkunami karqan Selomit, Haziel y Harán. Paykunami kayarqan Laadán castapa mandaqninkuna.
10 Simeipa tsurinkunami kayarqan chusku. Paykunapa jutinkunami karqan Jahat, Zina, Jeús y Bería. 11 Jahatmi mayor karqan. Paypa qepanmanmi yurirqan Zina. Jeúspa y Beríapa tsurinkuna wallkalla kaptinmi paykunapita aywaraq runakuna juk castalla kayarqan.
Coatpita aywaraqkuna
12 Coatpa tsurinkunami kayarqan chusku. Paykunapa jutinkunami karqan Amram, Izhar, Hebrón y Uziel.
13 Amrampa tsurinkunami kayarqan Aarón y Moisés. Aarónta y paypita aywaraqkunatami Tayta Dios akrarqan ñöpancho sagrädu sacrificiukunata imaypis rupatsiyänanpä, inciensiuwan imaypis qoshnitsiyänanpä y Tayta Diospa jutincho imaypis runakunata bendisayänanpä.†
14 Tayta Diosta sirviq Moiséspita aywaraqkunapis levita runakunami kayarqan. 15 Moiséspa tsurinkunami kayarqan Gersón y Eliezer. 16 Gersónpa mayor tsurinpa jutinmi karqan Sebuel. 17 Eliezerpa mayor tsurinpa jutinmi karqan Rehabías. Tsaypita masqa Eliezerpa tsurin mananami karqannatsu. Rehabíaspami itsanqa tsurinkuna atska kayarqan.
18 Izharpa mayor tsurinpa jutinmi karqan Selomit.
19 Hebrónpa mayor tsurinpa jutinmi karqan Jerías. Jeríaspa qepanmanmi yurirqan Amarías. Amaríaspa qepanmanmi yurirqan Jahaziel. Jahazielpa qepanmannami yurirqan Jecamán.
20 Uzielpa mayor tsurinpa jutinmi karqan Micaías. Paypa qepanmanmi yurirqan Isías.
Meraripita aywaraqkuna
21 Meraripa tsurinkunami kayarqan Mahli y Musi. Mahlipa tsurinkunami kayarqan Eleazar y Cis. 22 Eleazarqa wanurqan ollqu tsurin manarä kaptinmi. Paypa warmi tsurinkunami tiyun Cispa tsurinkunawan majatsakäyarqan. 23 Meraripa tsurin Musipami tsurinkuna kayarqan Mahli, Edar y Jeremot.
24 Tsaynömi levita runakuna kayarqan.
Levitakuna templucho imata rurayanqanpis
Levitakunata censarmi mayqan castapita kayanqantapis jutinpa jutinpa apuntayarqan. Tayta Diospa templuncho aruyänanpämi paykunata censayarqan ishkay chunka (20) watayuqpita janaman. Cada ünunmi castankunapa mandaqnin kayarqan.
25 Davidnami nirqan: “Añaw kawanantsikpä kuyamaqnintsik Tayta Diosmi yanapamashqantsik. Paymi Jerusaléncho imayyaqpis tanqa. 26 Tsaymi levitakuna Tinkuna Tolduta y tsaycho kaqkunata maypapis manana apayanqanatsu”.†
27 David wanunanpäna kaykar ninqannöllami Tayta Diospa templuncho aruyänanpä levitakunata ishkay chunka (20) watayuqpita janaman censayarqan.
28 Levitakunaqa Tayta Diospa templunchömi Aarónpita aywaraq sacerdötikunata yanapayarqan. Tsaymi encargädu kayarqan templupa patiunta y tsaycho kaykaq cuartukunata täpayänanpä. Tsaynöpis paykunami sagrädu manëjukunata awir purificayarqan. Templucho kaqtaqa wakin ruraytapis paykunami rurayarqan. 29 Tsaynöpis paykunami encargädu kayarqan fïlayllapa churanqan sagrädu tantapä, tsaki mikuy ofrenda jarinapä, levadüraynaq llapsha tantapä y sartinwan ankashqa ofrendakunapäpis. Tsaynöllami encargädu kayarqan templucho imatapis tupuyänanpä y pësayänanpä.
30 Paykunami templucho qoyay qoyay tutapapis tardipapis Tayta Diosta agradëcikuyänanpä y alabayänanpä kayarqan. 31 Jamay junaqcho, llullu killa fiestacho y jatun fiestakunachöpis paykunami Tayta Diospä sacrificiukunata rupatsiyaptin sacerdötikunata yanapayaq. Paykunami Tayta Diospa ñöpancho imatapis sacerdötikuna niyanqanta rurayaq.
32 Levitakunami encargädu kayarqan Tinkuna Tolduta y templutapis rikayänanpä. Aarónpita aywaraq sacerdötikunapa munaynincho karmi Tayta Diospa templuncho llapantapis rurayarqan.†