Israel nacioncho Joram rey kanqan
3
Josafat chunka puwaq wata Judá nacioncho rey kaykaptinmi Israel nacioncho Acabpa tsurin Joram rey kayta qallaykurqan. Payqa chunka ishkay watami Samariapita mandarqan. 2 Tayta Diosta mana cäsukurmi Joramqa jutsata rurarqan. Itsanqa taytan y maman jutsata rurayanqanpita wallkallami jutsata rurarqan. Tsaymi Baalta adorananpä taytan ichïtsinqan wankakunata jitatsirqan. 3 Tsaynö karpis Nabatpa tsurin Jeroboam Israel runakunata jutsata ruratsinqannömi Jorampis jutsata ruratsirqan.†Moabita soldädukunata vinciyänanpä Eliseo willanqan
4 Moab nación runakunapa mandaqnin reymi Mesa karqan. Paypaqa atskami üshankuna karqan. Israel nacionpa mandaqnin reypa munaynincho karmi payqa cada wata entregaq juk pachak waranqa (100,000) üshakunata y juk pachak waranqa poqushqa carnërukunapa millwanta. 5 Rey Acab wanuskiptinnami Israel nacionpa mandaqnin reypa contran shärirqan. 6 Tsaymi rey Joram Samaria markapita aywar llapan Israel soldädukunata guërraman aywayänanpä qorirqan. 7 Nirkurmi Judá nacionpa mandaqnin rey Josafatman kacharqan ninanpä: “Moab nacionpa mandaqninmi conträ shärishqa. Paywan pelyaq aywaptï ¿manatsurä yanapaykamankiman?”
Tsaynö niptinmi rey Josafat nirqan: “Soldädükunawan y cawallükunawan yanapanäpä listumi kaykä”.
8 Tsaymi tapur nirqan: “¿Mayqan nänipatä aywashun?”
Joramnami nirqan: “Edomman aywaq tsunyaq nänipami aywashun”.
9 Tsaynö parlaskirnami Israel nacionpa, Judá nacionpa y Edom nacionpa mandaqnin reykuna contrankunata atacayänanpä soldädunkunawan guërraman aywayarqan. Qanchis junaq tsunyaqpa puriyämuptinmi soldädunkunapäpis y uywankunapäpis yaku karqannatsu.
10 Tsaymi Joram nirqan: “¡Kayrächi kayllaqa! ¡Tayta Diosmi kimsantsikta kayman pushamashqantsik Moab nación runakuna wanutsimänantsikpä!”
11 Tsaynö niptinmi Josafat tapurqan: “¿Manatsurä Tayta Diospa profëtan noqantsikwan aywaykan tapukunantsikpä?”
Tsaynö niptinmi rey Jorampa juk capitannin nirqan: “Safatpa tsurin Eliseumi noqantsikwan aywaykan. Payqa profëta Elíaspa discïpulunmi kaykan”.
12 Tsaymi Josafat nirqan: “Payqa Tayta Dios yarpanqantami willamäshun”.
Tsaynö niptinmi Israel nacionpa mandaqnin rey Joram, Judá nacionpa mandaqnin rey Josafat y Edom nacionpa mandaqnin reypis Eliseo kaqman juklla aywayarqan.
13 Chaykuptinmi rey Joramta Eliseo nirqan: “Taytaykiwan mamayki yärakuyanqan llulla profëtakunaman aywanaykipa trokin ¿imata ashirtä noqaman shamushqayki?”
Tsaynö niptinmi Joram nirqan: “Moab nacionta atacanantsikpä Tayta Dios niptinmi tsay profëtakunaman tapukuq aywayänäpa trokin qamman shayämushqä. Tsaynö kaptinpis Moab nación runakuna wanutsiyämänanpämi ëllu kayman Tayta Dios pushayämashqa”.
14 Niptinnami Eliseo nirqan: “Llapanta mandaq Tayta Diospa sirviqnin karmi nï: Judá nacionpa mandaqnin rey Josafat kaycho mana kaptinqa qamta manami rikayllapis rikämantsu. 15 Tayta Diosta tapukunäpä arpa tukaqta pushamuy”.
Arpata tukapaykaptinmi Eliseuta Tayta Dios tantiyatsirqan imata ninanpäpis. 16 Eliseunami nirqan: “Tayta Diosmi nimantsik: ‘Kay pampacho yaku juntananpä atska zanjakunata uchkuyay. 17 Mana wayraptinpis y mana tamyamuptinpis qamkuna y uywaykikuna upuyänanpämi kay entëru pampacho yaku yurinqa. 18 Tsay milagruqa kanqa Tayta Dios llapanpä munayyuq kanqanta musyayänaykipämi. Tsaynöpis paymi yanapayäshunki moabita soldädukunata wanutsiyänaykipä. 19 Paykunata vincirmi murallashqa jatusaq markakunatapis ushakätsiyanki. Tsaynöllami früta jachakunatapis mutur ushayanki y yaku pözukunatapis pampar ushayanki. Nirkurmi chakrankunamanpis rumikunata qotuyanki’ ”.
20 Eliseo ninqannöllami waraynin tuta Tayta Diospä sacrificiuta rupatsinan höra Edomläpita yaku illaqpita shamur qorikashqa kaykäyanqan pampaman juntarqan.
21 Moabita runakunanami kimsa reykuna paykunata atacayänanpä aywaykäyanqanta musyaskiyarqan. Tsaymi llapan runakuna chölupita hasta yashqa runakunayaq qorikaskir contrankunawan pelyayänanpä nacionninpa lindërunkunaman churanakuyarqan. 22 Waraynin tuta rupay yarqamur qocharaykaq yakuman empañaptinmi moabita soldädukuna imayka yawar qocharaykaqtanö rikayarqan. 23 Tsaymi niyarqan: “¡Taqayqa yawarmi qocharaykan! Atacamänantsikpä shamuq reykunami kikinpura wanutsinakuyashqa kayanqa. ¡Juklla aywashun jaqiriyanqankunata qorimunantsikpä!”
24 Tsaynö nir moabita soldädukuna yaykuykäyaptinmi Israel soldädukuna atacayarqan. Tsaymi moabita soldädukuna qeshpiykäyaptin qati qatiykur wanutsiyarqan. 25 Tsaypitanami jatusaq markakunata juchutsir ushayarqan, chakrakunamanpis rumikunata qotuyarqan, pukyukunatapis pampar ushayarqan y frütapa yurankunatapis mutur ushayarqan. Kir-hareset markatami itsanqa juchutsiyarqantsu. Mana juchutsirpis warakawan pelyaqkuna jiruruypa tsapaskirmi atacayarqan.
26 Soldädunkunata vinciykäyanqanta rikarmi Moab nacionpa mandaqnin reyqa edomita soldädukunata atacar tsaypa qeshpiyänanpä kanqanta yarparqan. Espäda manijayta yachaq qanchis pachak (700) soldädunkunawan atacarpis manami vinciyta kamäpakuyarqantsu. 27 Tsaymi rey kananpä kaq mayor tsurinta wanuskatsir marka murälla janancho diosninpä rupatsirqan. Tsaynö ruranqanta rikarmi Israel soldädukunaqa mantsakashqa nacionninpa kutikuyarqan.