Elíasta ciëlupa apakunqan
2
Shukukuy wayrawan Elíasta Tayta Dios apakunanpä tiempu chämuptinmi Gilgal markapita Eliseuwan yarquyarqan. 2 Yarquykarnami Eliseuta Elías nirqan: “Bet-elman aywanäpämi Tayta Dios kachaykäman. Qamqa kayllacho quëdakuy”.Eliseunami nirqan: “Taytay, maypa aywaptikipis mana kachaypami qatiräshayki”.
Tsaynö niptinmi Bet-elman ishkan aywayarqan. 3 Bet-elman chaykuyaptinmi tsaycho taq profëtakuna tinkuskir Eliseuta niyarqan: “¿Musyankiku yachatsishuqniki Elíasta Tayta Dios kanan junaq pushakunanpä kanqanta?”
Eliseunami nirqan: “Awmi, musyämi. Tsaytaqa ama pitapis willayaytsu”.
4 Tsaypitanami Eliseuta yapay Elías nirqan: “Jericóman aywanäpämi Tayta Dios kachaykäman. Qamqa kayllacho quëdakuy”.
Eliseunami nirqan: “Taytay, mana kachaypami maypapis qatiräshayki”.
Tsaynö niptinmi Jericóman ishkan aywayarqan. 5 Tsaychöpis profëtakuna paykunata chaskiq yarqurmi Eliseuta niyarqan: “¿Musyankiku yachatsishuqniki Elíasta Tayta Dios kanan junaq pushakunanpä kanqanta?”
Eliseunami nirqan: “Awmi, musyämi. Tsaytaqa ama pitapis willayaytsu”.
6 Elíasnami yapay nirqan: “Jordán mayuman aywanäpämi Tayta Dios kachaykäman. Qamqa kayllacho quëdakuy”.
Eliseunami nirqan: “Taytay, mana kachaypami maypapis qatiräshayki”.
Tsaynö niptinmi Jordán mayuman ishkan aywayarqan. 7 Jericócho taq profëtakunapitami pitsqa chunka (50) profëtakuna paykunawan aywayarqan. Jordán mayu kuchunman Elíaswan Eliseo chaykur ichiskiyaptinmi tsay profëtakuna karullapita rikaräyarqan. 8 Tsaycho kaykarnami Elíasqa mantunta shumaq doblarkur mayuta tsapiskirqan. Tsaynö tsapiskiptinmi mayuqa janaman y uraman rakikaskirqan. Tsaymi tsakipana ishkan tsimpayarqan.
9 Mayuta tsimpaskirnami Eliseuta Elías nirqan: “Manarä aywakunqäyaq imatapis munanqaykita juklla mañakamay”.
Tsaynö niptinmi Eliseo nirqan: “Qam munayyuq kanqaykipita mas munayyuq kaytami munä”.
10 Elíasnami nirqan: “Tsaytaqa alläpa ajatami mañakamashqayki. Imanö kaptinpis apamanqanta rikamarqa noqapita mas munayyuqmi kanki. Mana rikamarmi itsanqa kanqaykinölla kanki”.
11 Tsaynö parlar aywaykäyaptinmi illaqpita nina lunyaykaq carrëta y nina lunyaykaq cawallukuna paykunapa chawpinpa päsar rakiskirqan. Elíastanami shukukuy wayra ciëlupa apakurqan. 12 Tsayta rikaykurmi Eliseo mantsakar nirqan: “¡Ay taytallay tayta! ¡Israel runakunapa guërra carrëtankunata y cawallunkunatami rikaykä!”
Tsaypitaqa Elíasta manami rikarqannatsu. Elías aywakuskiptinnami Eliseo pasaypa llakikurnin latsapanta ishkayman rachirqan.
Milagrukunata Eliseo ruranqan
13 Elíaspa cäpan shushunqanta qoriskirmi Jordán mayu ñöpanman Eliseo kutirqan. 14 Nirkurmi Elíaspa cäpanwan mayuta tsapiykur nirqan: “Elías yärakunqan Tayta Dios, noqatapis yanapaykallämay”.
Tsaynö nir tsapiykuptinmi yakuqa janaman y uraman rakikaskirqan. Tsaymi tsakillapana Eliseo tsimparqan.
15 Tsayta rikaykurmi Jericópita shamuq profëtakuna niyarqan: “¡Elíastanömi kananqa Eliseutana Tayta Dios yanapaykan!”
Tsaynö nir tinkupaykurmi urkunkunapis patsaman töpayanqanyaq qonqurikuyarqan. 16 Eliseutanami niyarqan: “Taytay, munaptikiqa noqakunacho kaykaq pitsqa chunka (50) mas kallpasapa runakuna Elíasta ashiyämunanpä aywayätsun. Capazchi Tayta Diospa espïritun may jirkamanpis o may raqramanpis kachariykushqa”.
Tsaynö niyaptinmi Eliseo nirqan: “Wallälla pitapis ama kachayaytsu”.
17 Tsaynö niptinpis kutin kutin ashiq aywayänanpä niyaptinmi Eliseo mana munaykar awnirqan. Tsaymi pitsqa chunka (50) runakuna aywar kimsa junaq ashirpis Elíasta tariyarqantsu. 18 Mana tarir Jericóman kutiykuyaptinmi Eliseo nirqan: “Willaykaptïmi aywayarqayki”.
19 Tsaypita juk kutinami Jericó runakuna Eliseuta niyarqan: “Taytay, rikanqaykinöpis kay markaqa alli sitiuchömi kaykan. Itsanqa pochquq yaku kaptinmi chakrakunapis qachpayashqa”.
20 Tsaynö niyaptinmi Eliseuqa mañakurqan mushuq tazonta y kachita. Apapaykuyaptinmi 21 pukyuman aywaykur tsay kachita wiñar nirqan: “Tayta Diosmi nin: ‘Noqami kay yakuta alli yakuman tikratsishqä. Kananpitaqa manami pipis kay yakuta upur wanunqatsu ni chakrakunapis manami qachpanatsu kanqa’ ”.
22 Eliseo ninqannöllami kananyaqpis tsay yaku pochqunnatsu.
23 Tsaypitanami Bet-elman Eliseo aywakurqan. Cuestata witsaykaptinmi markapita yarqamur chölukuna burlakur niyarqan: “¡Qara putumi witsaykämun! ¡Qara putumi witsaykämun!”