2 Juk junaqmi Acabpa tsurin rey Ocozías^† Samaria markacho kaq palaciunpa junish pïsuncho kaykar ventänapita jeqarpamurqan. Tsaymi pasaypa antsa kar alliyänanpä kanqanta o mana alliyänanpä kanqantapis musyayta munar Ecrón markaman kacharqan Baal-zebub diosta tapukayämunanpä.

3 Tsaymi Tayta Diospa angelnin Elíasta nirqan: “Juklla aywar Ocozías kachakunqan runakunata tinkupaykur niy: ‘¿Imanirtä Israelcho Dios mana kaptinnöpis Ecróncho kaykaq Baal-zebub diosman tapukuq aywaykäyanki? 4 Rey Ocozíaspämi Tayta Dios nin: Alliyänaykipa trokinmi wanunki’ ”.

Ángel ninqannöllami Elías aywaykur tsay kachakunqan runakunata willarqan.

5 Tsaynö willaptinmi kachakunqan runakuna rey kanqan kaqman kutiyarqan. Kutiykuyaptinmi rey tapurqan: “¿Imanirtä raslla kutiyämushqayki?”

6 Paykunanami niyarqan: “Juk runami tinkuskiyaptï qamta willayänäpä niyämashqa: ‘¿Imanirshi Israelcho Dios mana kaptinnöpis Ecróncho kaykaq Baal-zebub diosman tapukuq kachayämashqayki? Tsayman kachayämanqaykipitashi kananqa alliyänaykipa trokin wanunki. Tsaynö kananpäshi Tayta Dios nishqa’ ”.

7 Tsaynö willayaptinmi rey tapurqan: “Tsay niyäshuqniki runa ¿imanötä kashqa?”

8 Tapuptinmi niyarqan: “Paypa latsapanqa aqtsapita awashqami y wachukunpis qarapita rurashqami kashqa”.^†

Tsaynö willayaptinmi rey nirqan: “¡Payqa Tisbépita Elíasmi kanqa!”

9 Tsaymi pitsqa chunka (50) soldädukunata capitannintawan Elíasta prësu tsariyämunanpä kacharqan. Paykuna chäyänanpämi Elíasqa jirkancho jamaraykarqan. Chaykurmi capitán nirqan: “¡Profëta Elías, qamta pushayänäpämi rey Ocozías kachayämashqa!”

10 Tsaynö niptinmi Elías nirqan: “Tayta Diospa profëtan kanqäta musyanaykipämi ciëlupita nina urämur qamta y pitsqa chunka soldäduykikunatapis rupar ushayäshunki”.^†

Tsaynö niptinmi ciëlupita nina urämur paykunata rupaskirqan.

11 Tsaypitanami rey kacharqan juk capitantana pitsqa chunka (50) soldädukunatawan. Paypis tsayman chaykurmi Elíasta nirqan: “¡Profëta Elías, qamta apayänäpämi rey Ocozías kachayämashqa!”

12 Tsaynö niptinmi Elías nirqan: “Tayta Diospa profëtan kanqäta musyanaykipämi ciëlupita nina urämur qamta y pitsqa chunka soldäduykikunatapis rupar ushayäshunki”.

Tsaynö niptinmi ciëlupita nina urämur paykunatapis usharqan.

13 Tsaypitanami reyqa yapay juk capitantana kacharqan pitsqa chunka (50) soldädunkunatawan. Tsay capitannami Elías kaqman chaykur puntanman qonqurikuykur rugakur nirqan: “Tayta profëta, noqata y kay soldädükunatapis ama wanuykatsiyällämaytsu. 14 Musyämi punta shamuq ishkan capitankunatawan soldädunkunata ciëlupita urämuq ninawan ushakätsinqaykita. Ama paykunatanöqa ushakaykatsiyällämaytsu”.

15 Tsaynö mañakuptinmi Tayta Diospa angelnin Elíasta nirqan: “Mana mantsariypa paykunawan ayway”.

Tsaynö niptinmi paykunawan rey kaqman Elías aywarqan.

16 Chaykurmi rey Ocozíasta Elías nirqan: “Tayta Diosmi nin: ‘Israel nacioncho Dios mana kaptinnöpis ¿imanirtä Ecróncho kaykaq Baal-zebub diosman tapukuq kachashqayki? Tsaynö kachakunqaykipitami alliyänaykipa trokin wanunki’ ”.

17 Elías ninqannöllami rey Ocozías wanurqan. Ocozíaspa tsurin mana kaptinmi wawqin Joram rey karqan. Mandaq kayta qallaykurqan Josafatpa tsurin kaq Joram ishkay watana Judá nacioncho rey kaykaptinmi. 18 Rey Ocozías ruranqankunapis llapanmi qellqaraykan Israel nacionpa mandaqnin reykunapa acta libruncho.