Absalónta Husai yätsinqan
17
Tsaypitanami Absalónta Ahitofel nirqan: “Chunka ishkay waranqa (12,000) soldädukunata akraskirmi kanan paqas Davidta qatipar aywashä. 2 Pasaypa pishipashqa aywaykaqta taripaptïmi mantsarirnin paywan aywaqkuna wakpa kaypa qeshpiyanqa. Tsaynö qeshpir jaqiskiyaptinmi kikillan kaykaqta rey Davidta wanuskatsishä. 3 Paywan aywaykaq runakunataqa manami wanutsishänatsu, sinöqa yarpanqaykinö Davidllatami wanutsishä. Tsaynöpami llapanpis makikicho karnin añawna kawayanqa”.4 Ahitofel tsaynö yätsiptinmi Absalón y Israel mayor runakuna kushikuyarqan. 5 Tsaynö kaptinpis Arac casta Husaitami Absalón qayatsimurqan imata yarpanqantapis tapukunanpä. 6 Chaykuptinmi Ahitofel yarpanqankunata willarnin tapurqan: “Ahitofel yätsinqanta ¿rurämanku o manaku? ¿Qamqa ima ninkitä?”
7 Tsaymi Husai nirqan: “Kay vezqa Ahitofel yätsishunqayki manami allinötsu kaykan. 8 Qam musyankimi taytayki y soldädunkunapis geniu runakuna kayanqanta. Wawanta qechuykuptin ösu ajanashqa kanqannöllachi David y yanapaqninkunapis pasaypa ajanashqa kaykäyan. Tsaynöpis guërracho puriq runa kar taytayki musyanmi contran runakuna payta wanutsiyänanpä ashiykäyanqanta. Manami yanapaqnin runakuna punuyanqanchöpis pununqanatsu. 9 Tsaypa trokinqa may machaycho o may qaqacho karpis pakaraykanchi. Guërra qallaykaptinllarä juk ishkay soldäduykikunata wanutsiyaptinqa runakunami niyanqa: ‘Absalónpa soldädunkunataqa vinciyashqanami’. 10 Tsaynö wanutsiptinqa leonnö mayjina yaqa karpis soldäduykikuna mananami pelyayta munayanqanatsu. Llapan Israel runakunami musyayan taytaykipis y soldädunkunapis mana mantsariypa pelyaq kayanqanta.
11 “Noqapa yarpaynïpitaqa mas allimi kanqa Danpita hasta Beersebayaq llapan Israel runakunata qoritsimuptiki. Tsaynöpami lamar kuchuncho aqushanörä yupaytapis mana atipaypä atska kashun. Tsaypitanami tsay llapan runakunawan kikiki guërraman aywanki. 12 Tsaynöpami maycho kaptinpis taripaykur taytaykita atacashun. Mikuykunata qajapa ushanqannömi paykunatapis llapanta ushakätsishun. 13 May markaman amparakuptinpis marka murällata waskantsikkunawan sutaykarmi juchutsishun. Nirkurmi tsay markacho rumikunata ni jukllayllapis mana quëdananpä raqraman chipyaq jitaskishun”.
14 Tsaynö niptinmi Ahitofel yätsinqanta chaskiyänanpa trokin Husai yätsinqantana Absalón y llapan Israel runakunapis chaskiyarqan. Tsaynö chaskiyarqan Absalón ushakänanpä Tayta Dios destinashqa kaptinmi.
Qeshpinanpä Davidta willayanqan
15 Husainami Sadoc y Abiatar sacerdötikunaman aywaykur willarqan Absalónta y mayor runakunata Ahitofel yätsinqankunata. Tsaynöllami willarqan kikin yätsinqankunatapis. 16 Tsaymi nirqan: “Davidta juklla willatsiyay kanan paqas tsunyaq jirka pampakunacho punuyänanpa trokin Jordán mayuta juklla tsimpayänanpä. Mana tsimpayaptinqa payta y paywan kaykaq llapan yanapaqninkunatami wanutsiyanqa”.a
17 Jerusalénman yaykuqta pipis mana rikananpämi Jonatánwan Ahimaas En-rogel pukyu kaqllacho patsakuyarqan.† Tsaymanmi juk wätay jipash aywarqan Husai ninqanta willananpä. Willaykuptinmi Jonatánwan Ahimaas jinan höra Davidta willayänanpä aywayarqan. 18 Tsaynö pakayllapa aywaykäyanqanta juk chölu rikaykurmi Absalónta willarqan. Tsaymi qatipänanpä kanqanta maliciar Jonatánwan Ahimaas empëñu aywar Bahurim markaman chäyarqan.b Tsayman chaykurmi juk runapa wayi patiuncho pözuman ishkan pakakuyarqan. 19 Pipis mana tarinanpämi tsaycho taq warmi jakuwan pözuta tsapaykur jananman trïguta majakurqan. Tsaymi pipis musyarqantsu tsaycho pakaraykäyanqanta.
20 Tsayman Absalón kachanqan runakuna chaykurmi warmita tapukuyarqan: “¿Manaku rikallashqayki Ahimaastawan Jonatánta?”
Warminami nirqan: “Mayutapis maynachi päsayashqa”.
Tsaynö niptinmi Absalón kachanqan runakuna qatiparnin mana taripaykur Jerusalénman kutikuyarqan.
21 Kutiskiyaptinnami Ahimaaswan Jonatán pözupita yarquskir rey Davidta willaq aywayarqan. Chaykurnami niyarqan: “Ahitofelshi Absalónta yätsishqa soldädukunawan kanan paqas shamur atacayäshunaykipä. Tsayshi kaypita juklla mayu tsimpanman aywakuyanki”.
22 Tsaynö willaskiyaptinmi patsa manaräpis waraptin David y paywan kaykaq llapan runakuna mayuta juklla tsimpayarqan.
23 Ahitofelnami yätsinqanta Absalón mana chaskiptin ashnunta karunakurkur markanpa kutikurqan. Tsaycho testakuskirmi jorkakuskirqan. Tsaynö wanuskiptinmi taytan pamparanqan kaqman pampayarqan.
24 Tsaypitanami Mahanaim markaman David charqan.c Tsaycho kaykaptinmi Absalón y llapan Israel runakuna Davidta qatipar Jordán mayuta tsimpayarqan. 25 Absalónqa Joabpa trokin soldädunkunapa capitannin kananpämi Amasata churarqan. Amasapa taytan Itraqa Ismael castami karqan.d Mamannami Nahaspa tsurin Abigail karqan. Abigailmi Sarviapa ñañan karqan. Sarvianami Joabpa maman karqan. 26 Absalónnami Israel runakunawan Jordán tsimpan Galaad particho campamentunkuna shäritsiyarqan.
27 Mahanaimman David chaykuptinmi chaskiyarqan Nahaspa tsurin Sobi, Amielpa tsurin Maquir y Barzilai. Sobimi amonita runakuna täyanqan Rabá markapita karqan. Amielmi Lo-debar markapita karqan. Barzilainami Galaadcho Rogelim markapita karqan. 28 Tsay kimsa runakunami Davidpä y soldädunkunapä apayarqan cämakunata, tazonkunata, mitu mankakunata, trïguta, cebädata, jarinata, kamtsata, häbasta y lentëjastapis. 29 Tsaynöllami apayarqan abëjapa mishkinta, cuajashqa lichita, üshata, cabrata y wäkakunapa lichinpita rurashqa quësuta. Tsaykunata mikuyänanpä aypurninmi niyarqan: “Taytay, tsunyaq jirkapitaqa mallaqpäpis, yakunashqapis pishipashqapis shamuykäyankichi”.