Sibawan David parlanqan
16
Tsaypita aywar Olivos jirkanta David päsaskiptinmi Mefi-bosetpa wätaynin Siba† tariparqan ishkay sillashqa ashnunkuna qatishqa. Tsay ashnukunaman chaqnashqami Davidpä aparqan ishkay pachak (200) tantakunata, päsasyuq juk pachak (100) tantakunata, juk pachak (100) frütakunata y vïnu puritsikuna qarawan vïnuta. 2 Rey Davidnami Sibata tapurqan: “¿Imapätä kaykunata apamushqayki?”Tsaymi Siba nirqan: “Taytay, ashnukunata apamushqä qam y qamwan aywaykaq castaykikuna muntakuyänaykipämi. Tantakunata frütakunata apamushqä soldäduykikuna mikuyänanpämi. Vïnutanami apamushqä tsunyaq jirkaman aywar pishipaqkuna upuyänanpä”.
3 Davidnami tapurqan: “¿Maytä patronnikipa willkan Mefi-bosetqa?”
Tsaynö niptinmi Siba nirqan: “Jerusalénchömi kaykan. Payqa yarpaykan awilun Saúlta rey kananpä Israel runakuna churayanqannö paytapis kanan junaq churayänanpä kanqantami. Tsayta yarparmi Jerusaléncho quëdamushqa”.
4 Tsaynö niptinmi David nirqan: “Tsaynö kanqanpitami Mefi-bosetpa llapan imaykankunapis qampana kanqa”.
Niptinnami Davidpa ñöpanman qonqurikuykur Siba nirqan: “Tayta rey, qampa makikichömi kaykällä”.
Davidta Simei qayapanqan
5 Tsaypitanami Bahurim markaman David chaykuptin Saúl casta runa Gerapa tsurin Simei aywarqan Davidta imaykata qayaparnin. 6 Allinnin kaq soldädunkunapa chawpincho rey David aywaykaptinmi Simeiqa paykunata saqmar 7 nirqan: “¡Runa mayinta wanutsiq! ¡Imatatä ashinki, mana alli ruraq runa! Rikaytapis manami munayätsu. ¡Kaypita aywakuy! 8 ¡Qammi rey kayman yaykunayki raykuq Saúlta y castankunata wanutsishqayki! ¡Tsaypitami Tayta Dios castigashurniki tsuriki Absalóntana rey kananpä churashqa! ¡Tsaykuna päsashunaykipä kikikimi jutsayuq kaykanki, sin vergüenza runa wanutsiq!”
9 Tsaynö niptinmi Sarviapa wawan Abisai rey Davidta nirqan: “Taytay, ¿imanirtä taqay mana väliq allqu tsayläya qayapaykäshunki? ¡Kachaykamay kanan höra päsar umanta roquskamunäpä!”
10 Niptinmi Abisaitawan Joabta rey David nirqan: “Sarviapa wawankuna, ¿imanirtä problëmäman jatikäyämunki? Kikin Tayta Dios munaptinchi tsaynö qayapaykäman. Tsaynö kaykaptinqa ¿imapätä michäshunpis?”
11 Tsaypitanami Abisaita y llapan yanapaqninkunata David nirqan: “Kikïpa tsurïpis wanutsimayta yarpaykaptinqa rasuntachi kay Benjamín trïbu runaqa qayapaykäman. Tayta Dios munaptinqa jina tsaynöpis qayapämätsun. 12 Capazchi llakikunqäta rikar Tayta Dios kuyapämar runakuna qayapäyämanqanpita bendicionninta qomanqa”.
13 Tsaynö nirmi yanapaqninkunawan David aywakuyarqan. Simeinami wak tsimpanpa aywarqan ashlliraykar, saqmaraykar y allpatapis junishpa jicharaykar. 14 Jordán mayu kuchunman chaykurmi pishipashqa kar yanapaqninkunawan David jamapäyarqan.
Jerusalénman Absalón yaykunqan
15 Absalónnami llapan Israel runakunawan y Ahitofelwanpis Jerusalénman yaykuyarqan. 16 Davidpa amïgun Husainami chaskinanpä juklla aywar qayaykacharnin nirqan: “¡Viva rey Absalón! ¡Viva rey Absalón!”
17 Tsaynö niptinmi Absalón nirqan: “Kananqa ¿amïguyki Davidpa contrannaku kaykanki? ¿Tsaynöku alli amïgu kay? ¿Imanirtä paywan aywashqaykitsu?”
18 Niptinnami Husai nirqan: “Tayta Dios y Israel runakuna akranqan reywanmi noqa quëdashä. 19 Pitapis sirvirqa amïgüpa tsurintami sirvishä. Taytaykita sirvinqänömi qamtapis sirvishayki”.
20 Tsaypitanami Ahitofelta Absalón tapur nirqan: “Kanan ¿imata ruranäpätä yätsimanki?”
21 Tsaymi Ahitofel nirqan: “Palaciuta cuidayänanpä taytayki churanqan concubïna warminkunawan punuy. Tsaynöpami llapan Israel runakuna tantiyayanqa taytayki pasaypa ajanar imaypis manana chaskishunaykipä kanqanta. Tsayta musyaykurmi yanapashuqnikikunapis masrä favorniki kayanqa”.
22 Tsaynö niptinmi llapan Israel runakuna rikayänanpä palaciu janancho juk tolduta Absalónpä rurayarqan. Tsaychömi taytan Davidpa concubïna warminkunawan Absalón punurqan.†
23 Tsay witsanqa llapan runakuna yarpäyarqan Ahitofel imatapis yätsinqan kikin Tayta Dios yätsiykaqnö kanqantami. Tsaymi Ahitofel yätsinqanta David ruranqannö Absalónpis Ahitofel yätsinqanta rurarqan.