Davidpa contran Absalón shärinqan
15
Tsaypitanami carrëtata y cawallukunata kamariskir pitsqa chunka (50) soldädukunata puntanta aywayänanpä Absalón akrarqan. 2 Qoyay qoyaymi tsaka tsakalla marka yaykuna punkuman Absalón aywaq. Tsaychömi Davidman quejakuq aywaqkunata qayaykur mayqan trïbupita kayanqanta tapupaq. Willayaptinmi 3 Absalón niq: “Rasun kaqtami qamqa quejakuq aywaykanki. Itsanqa reypa yanapaqninkuna manami pipis kantsu quejakunqaykita arreglananpä”.4 Tsaynöllami niq: “¡Imanöllarä Israel nacionpa jueznin kayküman llapan quejakuqkunata shumaq arreglanäpä!”
5 Tsaynöllami ñöpanman pipis qonqurikuptin makipita shärirkatsir makallarkur mutsaykuq. 6 Davidman quejakuq aywaq runakunata tsaynö rurarmi llapan Israel runakunapa shonqunman Absalón yaykurqan.
7 Chusku wata päsaskiptinnami rey Davidta Absalón nirqan: “Taytay, Tayta Diosta awninqäta cumplir sacrificiuta rupatsinäpämi Hebrón markaman aywayta munä. 8 Siriacho kaykaq Gesur markacho kaykarmi Tayta Diosta awnir nirqä: ‘Tayta Dios, Jerusalénman kutitsimaptikiqa sacrificiuta rupatsirmi qamta adorashayki’ ”.
9 Tsaynö niptinmi rey David nirqan: “Hïju, tsaynö kaptinqa ayway”.
Tsaymi Hebrón markaman Absalón aywarqan. 10 Chaykurnami willakuqninkunata Absalón kacharqan Israel nación markakunaman willakur niyänanpä: “Cornëta tukamunqanta wiyar llapaykikuna niyanki: ‘¡Absalónmi Hebróncho mandamaqnintsik rey kaykan!’ ”
11 Jerusalénpita Hebrónman aywarmi ishkay pachak (200) runakunata Absalón pusharqan. Tsay runakunaqa Absalónwan aywarpis manami musyayarqantsu rey kayta munanqanta. 12 Tayta Diosta adorar sacrificiukunata rupatsinqan hörami Gilo markacho taq Ahitofelta Absalón qayatsirqan. Ahitofelqa Davidpa yätsiqninmi karqan. Ahitofelpis Absalónpa janan shärinqanta rikarmi wakin runakunapis yapakäyarqan Absalónta yanapayänanpä.
Jerusalénpita David qeshpinqan
13 David kaqman aywaykurmi juk willakuq nirqan: “Absalón rey kananpä llapan Israel runakunami favornin kaykäyan”.
14 Tsayta wiyaykurmi Jerusaléncho kaykaq yanapaqninkunata qayaykatsir David nirqan: “¡Jerusalénpita juklla aywakushun! Kaycho kaykaqta tariykamarnintsikqa noqantsikta y Jerusaléncho taq llapan runakunatami espädawan wanutsimäshun. Absalón chämuptin manami mayqantsikpis qeshpiyta kamäpakushuntsu”.
15 Tsaynö niptinmi yanapaqninkuna niyarqan: “Taytay, niyämanqaykita rurayänäpä noqakunaqa listumi kaykäyä”.
16 Tsaymi rey Davidqa llapan castankunata y palaciuncho wakin taqkunatapis pushakurkur qeshpirqan. Chunka concubïna warminkunallatami palaciunta cuidayänanpä jaqiykurqan.
17 Llapan yanapaqninkunawan aywaykarmi rey David marka yarqunacho ichiskirqan. 18 Capitanninkunawan tsaycho ichiraykaptinmi cereteo soldädukuna y peleteo soldädukuna puntanta päsayarqan. Tsaynöllami soqta pachak (600) Gat runakuna päsayarqan. Tsay runakunaqa Gat markapitami aywayarqan Davidta yanapayänanpä.
19 Nirkurmi Gat markapita capitán Itaita rey David nirqan: “Mana Israel runa kaykarqa noqawan ama aywayaytsu. Mas allimi kanman Jerusalénman kutir rey Absalón kaqcho quëdakuptiki. 20 Qäyankunarä kayman chäyämushqa kaykarqa ¿imanötä noqakunawan aywayanki? Kikïpis manami musyätsu mayman aywanäpä kanqantapis. Mas allimi kanman marka mayikikunata pushakurkur Jerusalénman kutikuyaptiki. Tayta Dios imaypis yanapaykulläshuy”.
21 Tsaymi Itai nirqan: “Mandamaqnï rey kaykaptikiqa maypa aywaptikipis wanuyta mana mantsariypami yanapashayki. Imaypis qamta yanapanäpämi Tayta Diospa jutincho awnï”.
22 Tsaynö niptinmi David nirqan: “Tsayöraqa aywashun”.
Tsaynöpami Gat markapita Itai, paywan aywaq runakuna y paykunapa castankunapis Davidwan aywayarqan.
23 Aywakuyanqanta rikarmi pasaypa llakikurnin runakuna waqayarqan. Cedrón raqrata päsarmi rey David y paywan aywaq runakuna tsunyaq jirkaman aywaq nänipa aywayarqan.
24 Sacerdöti Sadocpis y Tayta Diospa Pactu Babulninta apaq levita runakunapis Davidwanmi aywayarqan. Markapita yarquskirmi tsay babulta sacerdöti Abiatarpa ñöpanman churayarqan llapan runakuna yarquyta ushayanqanyaq. 25 Sacerdöti Sadoctami David nirqan: “Tayta Diospa babulninta markaman kutitsiy. Tayta Dios yanapamaptinqa kutimur babulta y tolduntapis rikashärämi. 26 Rey kanäta mana munaptinqa alfin imanashätä. Pay munanqannöchi llapanpis kanqa”.
27 Mastami sacerdöti Sadocta rey David nirqan: “Qamqa tantiyakuq runami kanki. Tsaynö kaykarqa sacerdöti mayiki Abiatarwan, tsuriki Ahimaas y Abiatarpa tsurin Jonatánwan Jerusalénman kutiyay.a 28 Noqaqa willakatsiyämunqaykiyaqmi Jordán mayu väducho shuyaräyäshayki”.
29 Tsaynö niptinmi Tayta Diospa babulninta apakurkur Abiatarwan Sadoc Jerusalénman kutiyarqan.
30 Davidnami pasaypa llakikur uman shukutashqa y qalla chakilla Olivos jirkanpa waqaraykar witsarqan. Tsaynöllami paywan aywaqkunapis uman shukutashqa waqaraykar witsäyarqan. 31 Tsaynö aywaykaptinmi Davidta willayarqan yätsiqnin Ahitofelpis Absalónta yanapaykanqanta. Tsaymi Tayta Diosta mañakur David nirqan: “Tayta Dios, Ahitofelpa yarpayninta pantaykatsillay Absalónta yätsirpis llutanta yätsinanpä”.
32 Olivos jirkanman chaykurnami Tayta Diosta adorakuyänan kaqman aywar Husaiwan tinkurqan. Husaiqa Aracpitami karqan. Paypis pasaypa llakikurmi latsapan rachishqa y umanman allpata wiñakushqa charqan. 33 Paywan tinkuskirmi David nirqan: “Noqawan aywarqa afannïpämi kanki. 34 Tsaypa trokinqa Jerusalénman kutir Absalónta ninki: ‘Taytay, taytaykita yanapanqänöllami kananqa qamtapis yanapashayki’. Tsaynö niptikiqa capazchi yätsiqnin kanaykipä churashunki. Churashuptiki Ahitofel yätsinqanta mana chaskinanpä llutanta pantatsir willanki. 35 Tsaychömi sacerdöti Abiatarwan sacerdöti Sadocpis kaykanqa. Palaciucho yanapaqninkunawan Absalón imata willanakuyanqantapis paykunata juklla willanki. 36 Sadocpa tsurin Ahimaas y Abiatarpa tsurin Jonatánpis tsaychömi kaykäyanqa. Paykunawanmi tsaycho ima päsanqantapis willakatsimunki”.
37 Tsaynö niptinmi Davidpa amïgun Husai Jerusalénman kutirqan. Payqa Jerusalénman charqan Absalón yaykunqan hörami.