Absalónta Joab kutitsinqan
14
Tsurin Absalónpä David pasaypa llakikurpis kutitsimuyta mana munanqantami Sarviapa wawan Joab tantiyarqan. 2 Tsaymi Davidta awnitsinanpä Tecoa markapita astüta warmita qayaykatsimur nirqan: “Perfümita mana wiñakuyllapa qachqa latsapata jatikunki. Tsaynöpis imayka wanupakushqanö atska junaq llakishqa purinki. 3 Nirkurna rey kaqman aywaykur llapan yachatsinqäkunata ninki”.Tsaynö nirmi imata ninanpäpis tsay warmita yachatsirqan.
4 Rey kaqman chaykurmi urkunpis patsaman töpanqanyaq qonqurikuykur tsay warmi nirqan: “Taytay, yanapaykallämay”.
5 Tsaymi David nirqan: “¿Imatä päsashushqayki?”
Tsaynö niptinmi warmi nirqan: “Taytay, noqaqa viüdami kä. 6 Tsay jananmanmi ishkan ollqu wamräkuna chakracho pelyar pipis mana washaptin jukaq wawqinta wanutsishqa. 7 Tsaymi kananqa llapan castäkuna conträ shärir niyäman: ‘Wawqin wanutsiq wamraykita wanutsiyänäpä kayman pushamuy’. Niyanqannölla wanutsirqa wamraynaqtachi jaqiykayämanqa. Tsaynö kaptinqa runäpa apellïdunpis illakanqachi”.
8 Tsaynö niptinmi David nirqan: “Wayikipa añaw kutikuy. Kananpitaqa noqanami janayki shärishä”.
9 Tsaymi Tecoa warmi nirqan: “Tayta rey, yanapamanqaykipita pipis contrayki parlaptinqa noqa y taytäpa castankunami jutsayuq kayäshä. Qam y mandar yanapayäshuqnikikunami itsanqa jutsaynaq kayanki”.
10 Rey Davidnami nirqan: “Pipis wajupäyäshuptikiqa arreglanäpä kayman pushamunki. Arreglaptïqa mananami wajupäyäshunkinatsu”.
11 Tsaymi tsay warmi nirqan: “Tayta Diospa jutincho awnimay wamräta mana wanutsiyänanpä”.
Tsaynö niptinmi David nirqan: “Wamraykita pipis mana wanutsinanpämi Tayta Diospa jutincho awnï”.
12 Tsaymi tsay warmi nirqan: “Taytay, ama ajanaykullaytsu. Mastapis rugakulläshayki”.
Tsaynö niptinmi David nirqan: “¿Imatä kaykan mas nimänaykipä?”
13 Warminami nirqan: “Juk nacioncho kaykanqanpita tsurikita mana kutitsimurqa castäkuna conträ shäriyanqannömi qampis Israel runakunapa contran shäriykanki. Taytay, noqata yanapamänaykipä nikämarpis tsurikita mana kutitsimurqa kikillaykimi condenakuykanki. 14 Patsaman yaku jichar ushakanqannömi noqantsikpis wanur ushakäshun. Tsaynö kaptinpis Tayta Diosqa manami munantsu pipis paypita karucho wanunanta, tsaypa rantinqa imaykanöpami runata tantiyatsin kawanqanyaq payman kutinanpä.a
15 “Taytay, wamräta wanutsiyänanpä parlayaptinmi pasaypa mantsarirqä. Tsaymi qamman shamushqä ‘rugakuptïqa capazchi yanapaykamanmanpis’ nir. 16 Yarpäyanqannö wamräta wanutsirqa Tayta Diospita chaskiyanqä herenciapitapis qarqayämanqachi. Tsaynö mana kananpämi rugakuq shamushqä. 17 Tayta Diospa angelninnömi qamqa allitapis mana allitapis tantiyanki. Tsaymi yärakü janä shärinaykipä kanqanta. Tayta Dios yanapaykulläshuy”.
18 Tsaynö niptinmi rey David nirqan: “Tapuptï rasun kaqta willamay”.
Warminami nirqan: “Taytay, tapumänaykipä ¿imallarä kaykan?”
19 Rey Davidnami tapurqan: “Tsaykunata nimänaykipä ¿manaku Joab yätsishushqayki?”
Warminami nirqan: “Awmi taytay, yarpanqaykinömi kaykan. Yanapashuqniki Joabmi llapan ninqäkunata yätsimashqa. 20 Joab tsaynö yätsimashqa llapanpis arreglakänanta munarmi. Qamqa Tayta Diospa angelninnömi kay nacioncho ima päsanqantapis musyanki”.
21 Tsaypita Joabta qayaykatsirmi rey David nirqan: “Yarpanqaykinö katsun. Kananqa tsurï Absalónta juklla kutitsimuy”.
22 Tsaynö niptinmi urkunpis patsaman töpanqanyaq Davidpa ñöpanman Joab qonqurikuykurqan. Bendicionninta David churaptinmi Joab nirqan: “Tayta rey, mañakunqäta awnimaptikimi kuyamanqaykita musyä”.
23 Tsaypitanami Gesur nacionman Joab aywaykur Jerusalénman Absalónta kutitsimurqan. 24 Rey Davidnami nirqan: “Absalónqa wayinman aywakutsun. Paytaqa manami rikaytapis munätsu”.
Tsaynö niptinmi Absalónqa reyman mana chayllapa wayinman aywakurqan.
Davidwan Absalón amistanqan
25 Entëru Israel nacioncho manami pipis Absalónnö kuyayllapäqa karqantsu. Chaki puntanpita uma jirkanyaq kuyayllapä kaptinmi llapan runakuna pasaypa kuyayaq. 26 Aqtsanta cada wata rututsikur palaciucho pësakunawan pësaptinmi ishkay kïlupita mas lasarqan. 27 Absalónpa tsurinkunami kimsa ollqu y juk warmi karqan. Warmi tsurinpa jutinmi karqan Tamar. Payqa pasaypa kuyayllapämi karqan.
28 Absalónqa Jerusaléncho ishkay watami taytan Davidwan mana tinkuypa täkurqan. 29 Tsaymi Joabta qayatsinanpä Absalón yarpachakur nirqan: “Joabta rugakushä taytäman aywar favornï parlananpä”.
Tsaynö qayatsiptinpis Joab manami aywarqantsu. Tsaymi yapaypis Joabta Absalón qayatsirqan. Yapay qayatsiptinpis Joabqa manami aywarqantsu.
30 Tsaymi wätayninkunata Absalón nirqan: “Chakrä ñöpanchömi Joab murunqan cebäda poqushqana kaykan. Tsayta aywaykur kayaskayämuy”.
Ninqannöllami wätayninkuna aywaykur Joabpa cebädanta kayaskiyarqan.
31 Tsaymi Joabqa Absalónpa wayinman aywaykur nirqan: “¿Imanirtä wätaynikikuna cebädäta kayayämushqa?”
32 Absalónnami nirqan: “Taytäwan parlanaykipä qayatsimuptïpis mana shamuptikimi kayatsishqä. Kanan aywar niy: ‘¿Imapätäshi Gesur nacionpita tsurikita kutitsimushqayki? Mana tinkunaykipä kaykaptinqa patsan Gesurllachöshi täkunman karqan. Kaychöna karshi qamwan tinkuyta munan. Jutsata rurashqa kaptinqa jukllashi wanutsinki’ ”.
33 Tsaynö niptinmi rey David kaqman aywaykur Absalón ninqannölla Joab nirqan. Tsaymi Absalónta David qayatsirqan. Chaykurmi Absalónqa Davidpa ñöpanman urkunpis patsaman töpanqanyaq qonqurikuykurqan. Absalónta chaskirmi rey David mutsarqan.