Panin Tamarta Amnón fuerzanqan
13
Davidpa tsurin Absalónpami kuyayllapä panin karqan. Paypa jutinmi karqan Tamar. Davidpa jukaq tsurin Amnónnami paypita pasaypa enamurädu tikraskirqan.a 2 Piwanpis manarä kakushqa jipash kaptinmi Tamarta imaypis cuidayaq. Tsaymi Amnónqa paninwan punuyta mana kamäpakurnin mikuytapis ni punuytapis mana tarir qeshyaskirqan.3 Amnónpa amïgun Jonadabmi astütu chölu karqan. Payqa Davidpa wawqin Simeapa tsurinmi karqan. 4 Tsaypita juk kutichömi Jonadab tapurqan Amnónta: “Reypa tsurin kaykarqa ¿imanirtä qoyay qoyay pasaypa llakinashqa puriykanki? Ima päsashunqaykitapis willamay”.
Tsaynö niptinmi Amnónta nirqan: “Wawqï Absalónpa panin Tamarpitami pasaypa enamurädu kaykä”.
5 Tsaymi Jonadab nirqan: “Qeshyaykaq tukurlla cämaykicho ujuräkuy. Taytayki watukashuqniki shamuptin ninki: ‘Panï Tamarta kachaykallämuy kayllacho kusinakuskir qaramänanpä’ ”.
6 Tsaynö yätsiptinmi Amnónqa qeshyaykaq tukurlla cämancho ujuraykarqan. Tsayman taytan watukaq chaptinmi Amnón nirqan: “Panï Tamarta kayman kachaykallämuy juk ishkay tortillakunata ankaskir qaramänanpä”.
7 Tsaymi Tamarta David nirqan: “Hïja, kusinapänaykipä turiki Amnónpa wayinman ayway”.
8 Tsaynö niptinmi aywar tarirqan turin Amnónta cämacho ujuraykaqta. Tsaychömi jarinapita tortillata ruraskir ankaparqan. 9 Mikunanpä tortillata apapaptinmi turinqa mikuyta munarqantsu. Tsaypa trokinmi tsaycho kaykaq runakunata nirqan: “Llapaykikuna waqtapa yarqukuyay”.
Tsaynö niptinmi tortilla ankanqanta apaparqan. 11 Apapaptinmi paninta makinpita tsariykur nirqan: “Pani, qamwan punuytami munä”.
12 Tsaynö niptinmi Tamar nirqan: “Turi, ¡ama penqakuyman churamaytsu! Israel nacioncho tsaynö penqakuypä jutsataqa manami rurayantsu. Tsaynö rurarqa pasaypa jutsatami ruranki. 13 Tsaynö desonraykamaptikiqa ¿ima cäräwanrä kawashäpis? Qamtapis kay Israel nacioncho mana alli runatanömi rikayäshunki. Noqawan tayta munarqa tänantsikpä taytantsikta rugakuy. Rugakuptikiqa awnishunkimi”.
14 Tsaynö rugakuptinpis turin Amnónqa manami cäsurqantsu. Tsaypa trokinqa mas kallpayuq karmi juklla fuerzarqan. 15 Fuerzaskirnami Amnónqa Tamarta pasaypa chikirnin kuyanqantapis yarparqannatsu. Tsaymi nirqan: “¡Kaypita ras aywakuy!”
16 Tsaynö niptinmi Tamar nirqan: “Perdiskatsimar wayikipita ama qarqaykallämaytsu. Qarqamarqa fuerzamanqaykipitapis peormi jutsata ruraykanki”.
Tsaynö niptinpis Amnónqa manami cäsurqantsu. 17 Tsaypa trokinqa wätayninta qayaskirmi nirqan: “Kay jipashta qarquskir punkuta trancay”.
18 Tsaynö niptinmi Amnónpa wätayninqa jipashta qarquskir punkuta trancaskirqan.
Tsay witsanqa costumbrinkunamannömi reykunapa tsurin doncëlla jipashkuna kuyayllapä tünicata jatikuyaq. Tsaymi Tamarpis kuyayllapä tünican jatishqa kaykarqan. 19 Pasaypa llakikurninmi jatiranqan tünicanta rachir usharnin umanman uchpata wiñakurqan. Tsaymi makinwan uman tsarishqa waqaraykar aywakurqan.
20 Turin Absalónnami tapurqan: “¿Rasunpaypaku turiki Amnón fuerzashushqayki? Tsaynö rurashunqaykipita ama llakikuytsu. Turiki kaykaptinqa jina tsayllachöna usharätsun”.
Tsaypita pasaypa penqakurmi turin Absalónpa wayillancho Tamar täkurqan.
21 Tamarta Amnón fuerzanqanta musyaskirmi rey David pasaypa ajanarqan. Tsaynö ajanarpis mayor tsurin kaptinmi kuyarnin Amnónta imatapis nirqantsu. 22 Absalónpis wawqin Amnónta manami imatapis nirqantsu, panin Tamarta fuerzanqanpita pasaypa nanapararpis.
Amnónta Absalón wanutsinqan
23 Tsaypita ishkay wata päsaskiptinnami Absalónqa Baal-hazorcho üshankunata rututsir mikuyta kusinatsirqan. Tsayqa Efraín trïbu runakuna täyanqan ñöpanchömi karqan. Tsaymanmi wawqinkunata qayatsirqan llapan qorikaykur mikuyänanpä. 24 Tsaymi Absalónqa taytan rey Davidman aywaykur nirqan: “Taytay, kanan millwa rutuycho kanqäyaq imallatapis mikunantsikpä yanapashuqniki runakunawan shamuykuyällay”.
25 Rey Davidnami nirqan: “Hïju, llapantsik aywashqaqa alläpa gastutami ruranki”.
Kutin kutin Absalón rugakuptinpis manami awnirqantsu. Tsaypa trokinqa llapanpis alli kananpämi bendisarqan.
26 Tsaymi Absalón nirqan: “Aywayta mana munarqa wawqï Amnónllatapis kachaykallämuy”.
Tsaynö niptinmi rey David nirqan: “¿Imanirtä pay aywananta munaykanki?”
27 Tsaynö niptinpis Absalón kutin kutin rugaptinmi rey David awnirqan tsurin Amnón y wakin tsurinkunapis aywayänanpä.
Tsaypita kutiykurmi Absalónqa atska alli mikuyta rey mikunanpänörä kusinatsirqan. 28 Puntatanami wätayninkunata yätsirnin Absalón nirqan: “Vïnuta upur Amnón machashqa kaykanqan hörami wanutsiyänaykipä niyäshayki. Wanutsiyänaykipä niptï mana mantsariypa juklla wanuskatsiyanki”.
29 Tsaymi Absalónpa wätayninkunaqa patronnin ninqannölla Amnónta wanuskatsiyarqan. Amnónta wanuskatsiyaptinmi rey Davidpa wakin kaq tsurinkuna mulankunata muntakurkur qeshpir aywakuyarqan.
30 Manarä chäyaptinmi Davidta juk runa willar nirqan: “Llapan tsurikikunatashi Absalón wanutsishqa. Manashi ni jukllayllapis qeshpishqatsu”.
31 Tsaynö willaptinmi pasaypa llakikurnin Davidqa latsapanta rachiskir patsaman jitakaskirqan. Tsaynöllami yanapaqninkunapis llakikurnin latsapanta rachiyarqan.
32 Tsayta rikaykurmi Davidpa wawqin Simeapa tsurin Jonadab nirqan: “Llapan tsurikikunata wanutsinqanta ama yarpaytsu. Amnónllatami Absalónqa wanutsishqa. Panin Tamarta fuerzanqanpitami payta wanutsinanpä Absalón juraykarqan. 33 Taytay, ama yarpaytsu llapan tsurikikunata wanutsinqanta. Tsuriki Amnónllatami wanutsishqa”.
34 Absalónnami qeshpir aywakurqan.
Tsaypitanami Jerusalén marka täpaq runa rikachakuykanqancho rikarqan atska runakuna wak tsimpapa uraykäyämuqta. Tsaymi rey Davidman aywaykur nirqan: “Atska runakunami Horonaim markaman aywaq nänipa shamuykäyan”.
35 Tsaymi rey Davidta Jonadab nirqan: “¿Manaku nirqä tsurikikuna mana wanuyanqanta?”
36 Tsaynö parlaykaptinmi Davidpa tsurinkuna chaykur wawqin Amnónta wanutsiyanqanpita llapan waqayarqan. Rey Davidpis y yanapaqninkunapis pasaypami waqayarqan. 37 Davidqa tsurin Amnónpä llakikurmi qoyay qoyay waqaq.
Absalónnami qeshpir aywakurqan Gesur nacionpa mandaqnin rey Talmaiman. Talmaiqa Amiudpa tsurinmi karqan.b 38 Tsaychömi kimsa wata Absalón tarqan.
39 Tsurin Amnónpä llakikuynin qallquskiptinnami Davidqa tsurin Absalónpä pasaypa llakikur paywan tinkuyta munarqan.