Pascua fiestata rurayänanpä ninqan
9
Egiptupita Israel runakuna yarqayämunqanpita juk wata cumpliskiptinnami ishkay wata qallaykunan killa Sinaí tsunyaq jirkacho Moisésta Tayta Dios nirqan: 2 “Israel runakuna cada watami ninqä junaqcho Pascua fiestata rurayanqa. 3 Pascua fiesta qallaykunqa kay killa chunka chusku junaq tardimi. Tsayta rurayanqa imanöpis rurayänanpä yätsinqänöllami”.4 Tsaynö niptinmi Pascua fiestata rurayänanpä Israel mayinkunata Moisés nirqan. 5 Tsaynöpami Moisésta Tayta Dios ninqannölla wata qallaykunan killa chunka chusku junaq tardipita qallaykur Sinaí jirkacho Pascua fiestata rurayarqan.†
6 Wakinqa ayata yatayanqanpita impüru karmi Pascua fiestapä carnishta pishtayarqantsu. Tsaymi tsay junaqlla aywar Moiséstawan Aarónta 7 tapuyarqan: “Noqakunaqa ayata yatashqa karmi impüru kayä. Tsaynö karpis ¿Tayta Diospä manatsurä Israel mayïkunawan juntu Pascua fiestapä carnishta pishtayäman?”
8 Tsaynö niyaptinmi Moisés nirqan: “Imata rurayänaykipäpis Tayta Diostarä tapumushä”.
9 Tapuptinnami Moisésta Tayta Dios nirqan: 10 “Israel runakunata niy: ‘Qamkuna y qamkunapita aywaraqkunapis llapayki adorayämar Pascua fiestata rurayay. Tsaynö rurayay ayata yatanqanpita impüru karpis o viäjiman aywarpis. 11 Itsanqa tsaynö kaqkunaqa juk killa päsaskiptinrä chunka chusku junaq tardipa Pascua fiestapä carnishta pishtayanqa. Tsay tardi pishtayanqan carnishpa aytsanta kankaskir levadüraynaq tantawan iwjiq jachantinta mikuyanqa. 12 Tsay aytsataqa manami warayninpa katuyanqatsu ni tullunkunata pakiyanqatsu.† Rurayänaykipä ninqänölla Pascua fiestata rurayanki. 13 Püru kaykar y maypapis mana illashqa kaykar Pascua fiestata mana ruraq runataqa Israel runakunapita qarquyay. Ninqä junaq adoramar Pascua fiestapä carnishta mana pishtaq kaqtaqa qarquyay.
14 “ ‘Rurayänaykipä ninqänöllami qamkunacho kaykaq jäpa runakunapis Pascua fiestata rurayanqa. Llapaykipis tsaynölla rurayanki’ ”.†
Tinkuna Sagrädu Toldu janancho pukutay kanqan
15 Pactu Tolduta shäritsiyta ushaskiyaptinmi pukutay tsapaskirqan. Patsa tsakanqanpita patsa waranqanyaqmi tsay toldu janancho ninanö warat atsikyarqan.† 16 Tsaynöllami imaypis junaqpa pukutay tsaparaq y tsakaypana ninanö atsikyaq. 17 Tinkuna Sagrädu Toldu jananpita pukutay shärir aywaptinmi Israel runakuna patsakuyanqanpita aywakuyaq. Pukutay mana aywaptinqa patsallanchömi kakuyaq. 18 Tsay pukutaywanmi Israel runakunata Tayta Dios tantiyatsiq aywayänanpä y patsakuyänanpä kanqanta. Tsaymi Sagrädu Toldu jananpita pukutay aywar qallanqanyaq patsallancho täkuyaq.
19 Sagrädu Toldu jananpita atska junaq pukutay mana shäriptinqa Tayta Diosta cäsukurmi Israel runakuna tsayllacho patsaräyaq. 20 Juk ishkay junaqlla Sagrädu Toldu janancho pukutay kaptinqa tsay junaqkunallami tsaycho patsaräyaq. Pukutay aywaptinqa paykunapis aywayaqmi. Tsaynöpami Israel runakunata Tayta Dios tantiyatsiq aywayänanpä kanqanta y patsakuyänanpä kanqanta. 21 Aybësisqa juk tsakayllami Tinkuna Sagrädu Toldu janancho pukutay ichiraq. Patsa waraskiptin pukutay aywaqta rikarqa Israel runakunapis aywayaqmi. Tsaynöllami tsakaypapis junaqpapis pukutay aywaptinqa aywayaq.
22 Sagrädu Toldu janancho pukutay ishkay junaq o juk killa o juk wata kaptinqa Israel runakuna patsallanchömi kakuyaq. Pukutay aywaptinmi itsanqa paykunapis aywayaq. 23 Tsaynöpami Israel runakunata Tayta Dios tantiyatsiq aywayänanpä y patsakuyänanpä kanqanta. Moisésta Tayta Dios ninqannöllami Israel runakuna llapanta rurayarqan.