Qellaypita rurashqa cornëtakunata tukayanqan
10
Moiséstami Tayta Dios nirqan: 2 “Martilluwan takayllapa qellaypita ishkay cornëtakunata ruratsinki. Tsay cornëtakunata tukatsinki runakuna qorikäyänanpä y aywayänanpä. 3 Ishkay cornëtakunata tukayaptinmi Tinkuna Toldu punkuman llapan runakuna puntaykiman qorikäyänanpä shayämunqa. 4 Juk cornëtallata tukaptinqa cada trïbupa mandaqninkunallami shayämunqa.5 “Aywallay tönuta tukaptinmi Tinkunantsik Sagrädu Toldupa rupay yarqamunan kaqlächo patsaraykaq runakuna toldunkunata qoriskir aywar qallaykuyanqa. 6 Tsaypita yapay cornëtata tukaptinmi Tinkunantsik Sagrädu Toldupa sur kaqlächo patsaraykaq runakuna toldunkunata qoriskir aywar qallaykuyanqa. Tsaynömi tukanqa cadaläpita yarquyänanpä.
7 “Runakuna qorikäyänanpä kaptinqa jukläya tönuta tukatsinki. 8 Cornëtata tukaqkunaqa Aarón casta sacerdötikunallami kayanqa. Tsay ninqäkunaqa imayyaqpis leymi qamkunapä y qamkunapita aywaraqkunapäpis kanqa.
9 “Nacionnikiman contraykikuna shamur atacayäshuptiki guërraman yarquyänaykipä cornëtata tukayanki. Tsaynöpami yanapayäshayki contraykikunata vinciyänaykipä. 10 Tsaynöllami cornëtata tukayanki fiesta kaptin, llullu killa kaptin, sacrificiuta rupatsir y alli päsakuy sacrificiuta rupatsirpis. Tsaynöpami qamkunawan pactuta ruranqäta yarpar imaypis yanapayäshayki. Noqami Tayta Diosnikikuna kaykä”.
Sinaí jirkapita Israel runakuna aywakuyanqan
11 Egiptupita yarquyanqanpita juk wata y juk killa cumpliskir ishkay chunka (20) junaq kaykaptinnami Pactu Toldu jananpita pukutay aywar qallaykurqan. 12 Tsaymi Sinaí jirkapita Israel runakuna trïbunpa trïbunpa qatinayllaman aywaykäyaptin Parán tsunyaq jirkacho pukutay ichiskirqan.
13 Sinaípita yarqur Moisésta Tayta Dios yätsinqannöllami† 14 Judá trïbu runakuna bandërankunawan puntata aywayarqan. Paykunawan juntumi ishkay trïbu runakunapisa aywayarqan. Judá trïbupa mandaqninmi karqan Aminadabpa tsurin Naasón. 15 Isacar trïbupa mandaqninmi karqan Zuarpa tsurin Natanael. 16 Zabulón trïbupa mandaqninnami karqan Helónpa tsurin Eliab.
17 Paykunapa qepantanami aywayarqan Gersónpita aywaraq runakuna y Meraripita aywaraq runakunapis. Paykunami Sagrädu Tolduta paskarir apayarqan.
18 Paykunapa qepantanami Rubén trïbu runakuna bandërankunawan aywayarqan. Paykunawan juntumi ishkay trïbu runakunapisb aywayarqan. Rubén trïbupa mandaqninmi karqan Sedeurpa tsurin Elisur. 19 Simeón trïbupa mandaqninmi karqan Zurisadaipa tsurin Selumiel. 20 Gad trïbupa mandaqninmi karqan Reuelpa tsurin Eliasaf.
21 Paykunapa qepantanami Coatpita aywaraq runakuna aywayarqan Sagrädu Toldupa llapan manëjunkunata apakurkur. Ñöpaq trïbu runakuna ichïtsiyanqan Sagrädu Tolduman chaykurmi manëjunkunata churayaq.
22 Paykunapa qepantanami Efraín trïbu runakuna bandërankunawan aywayarqan. Paykunawan juntumi ishkay trïbu runakunapis aywayarqan.c Efraín trïbupa mandaqninmi karqan Amiudpa tsurin Elisama. 23 Manasés trïbupa mandaqninmi karqan Pedasurpa tsurin Gamaliel. 24 Benjamín trïbupa mandaqninmi karqan Gedeonipa tsurin Abidán.
25 Llapankunapa mas qepantanami Dan trïbu runakuna bandërankunawan aywayarqan. Paykunawan juntumi ishkay trïbu runakunapisd aywayarqan. Dan trïbupa mandaqninmi karqan Amisadaipa tsurin Ahiezer. 26 Aser trïbupa mandaqninmi karqan Ocránpa tsurin Pagiel. 27 Neftalí trïbupa mandaqninmi karqan Enánpa tsurin Ahira.
28 Tsaynömi Israel runakuna trïbunpa trïbunpa qatinayllanman aywayarqan.
Aywashinanpä cuñädun Hobabta Moisés ninqan
29 Madianita Ragüelpa† tsurin Hobabmi Moiséspa cuñädun karqan. Paytami Moisés nirqan: “Yanapayämänanpämi Tayta Dios awniyämashqa. Tsaymi Tayta Dios rikatsiyämänanpä kaqman aywayäshä. Aku aywashiyämay. Bendicionta chaskiyanqätami rakipäyäshayki”.
30 Tsaynö niptinmi Hobab nirqan: “Manami aywämantsu. Noqaqa markächo castäkunamanmi kutikushä”.
31 Tsaynami Moisés nirqan: “Ama kutiytsu. Qamqa llapan jirkakunatami reqinki. Musyankimi maycho patsakunantsikpä alli kanqantapis. Tsaymi qamta rugä reqitsiyämar pushayämänaykipä. 32 Noqakunawan aywaptikiqa Tayta Dios qarayämanqantami rakipäyäshayki”.
33 Sinaí jirkapita aywakurmi Israel runakuna kimsa junaq aywayarqan. Pactu Babultami puntanta apayarqan patsakuyänanpä sitiuta tariyanqanyaq. 34 Campamentupita yarquyanqanpitami Tayta Dios kachamunqan pukutay cada junaq paykunapa jananpa aywarqan. 35 Puntata aywananpä Pactu Babulta yarqatsiyaptinmi Moisés nirqan:
“Tayta Dios, janäkuna shäriykullay.
Contraykikuna mashtakaypa mashtakar qeshpiyätsun.
Chikishuqnikikunapis ñöpaykipita qeshpir aywakuyätsun”.†
36 Babulta ichïtsiyaptinnami Moisés nirqan: “Tayta Dios, yupaytapis mana atipaypä Israel runakunaman kutiykallämuy”.