3 Tsaymi Moisésta Tayta Dios ninqannölla puntanman aktsinanpä mechërukunata candelabruman Aarón churarqan. 4 Tsay candelabrumi jamakunanpita puntanyaq martilluwan takayllapa qoripita rurashqa karqan. Tayta Dios rikatsinqantanöllami tsay candelabruta Moisés ruratsirqan.^†

5 Moiséstami Tayta Dios nirqan: 6 “Wakin Israel runakunapita rakiskir levitakunata purificatsinki. 7 Purificashqa kayänanpä paykunapa jananman yakuta tsaqtsupanki. Cuerpunkunapita shaprankunata jichkakuskir latsapankunata taqshakuyanqa. Tsaynöpami purificashqana kayanqa. 8 Nirkurnami apayämunqa juk torïtuta rupatsina sacrificiupä y aceitiwan pichushqa jarinata tsaki mikuy ofrendapä. Tsaynöllami purificatsina sacrificiupä juk torïtutapis apayämunqa.

9 “Levitakunata willanki Tinkuna Toldu ñöpanman shayämunanpä. Tsaynölla llapan Israel runakunapis shayämunqa. 10 Ñöpäman levitakuna shayämuptinmi Israel runakunapa mandaqninkuna paykunapa umanman makinkunata churayanqa. 11 Nirkurnami makinta Aarón joqarkur sirviyämänanpä ñöpächo paykunata bendisanqa. Tsaynöpami levitakunaqa Israel runakuna apayämunqan ofrendanö kayanqa.

12 “Tsaynöllami apayämunqan torïtukunapa umanman makinkunata levitakuna churayanqa. Jukaq torïtuta pishtar altarcho rupatsinki purificatsina sacrificiupä y jukaq torïtutanami pishtar altarcho rupatsinki rupatsina sacrificiupä. Tsaynöpami levitakuna purificashqa kayanqa.

13 “Tsaypitanami paykunata Aarónpa y tsurinkunapa ñöpanman pushanki. Tsaychömi makikita joqarkur levitakunata noqapä bendisanki. 14 Tsaynöpami Israel runakunapita levitakunata rakinki noqapa kayänanpä. 15 Purificashqa y bendisashqa karmi paykuna libri yaykuyanqa Tinkuna Tolducho imapis ruraypä kaqkunata rurayänanpä.

16 “Israel runakunapa mayor ollqu tsurinkunapa trokinmi levitakunata noqapa kayänanpä akrashqä. 17 Egipto runakunapa mayor ollqu tsurinkunata wanutsinqä junaqpitami Israel runakunapa mayor ollqu tsurinkuna y uywankunapa punta yuriq orqu wawankunapis noqapa kaykan.^† 18 Tsaymi levitakuna noqapa kayan Israel runakunapa mayor ollqu tsurinkunapa trokin. 19 Levitakunatami churashqä Israel runakunapa trokin Tinkuna Tolducho Aarónta y tsurinkunata yanapayänanpä. Tsaynöpami Israel runakunata Tinkuna Tolduman aywayaptin castigashätsu”.

20 Tayta Dios ninqannöllami Aarónwan Moisés y llapan Israel runakuna levitakunata churayarqan Tayta Diosta sirviyänanpä. 21 Levitakunami bäñakur purificakuyarqan y latsapankunata taqshakuyarqan. Tsaynö ruraskiyaptinmi makinta joqarkur Tayta Diospä paykunata Aarón bendisarqan. Purificashqa kayänanpänami purificatsina sacrificiuta rupatsirqan. 22 Tsaynö bendisaskiptinnami levitakuna Aarónta y tsurinkunata Tinkuna Toldupa patiuncho yanapar qallaykuyarqan. Moisésta Tayta Dios ninqannöllami levitakunata bendisar llapanta rurarqan.

23 Tsaypitanami Moisésta Tayta Dios nirqan: 24 “Levitakuna Tinkuna Toldupa patiuncho yanapar qallaykunqa ishkay chunka pitsqa (25) watayuqpitarämi. 25 Pitsqa chunka (50) watayuqna karqa jubilakuyanqanami. 26 Jubilakurpis tiempunkuna kanqan hörami levita mayinkunata Tinkuna Tolducho yanapayanqa. Itsanqa ñöpata sirviyanqannöqa mananami sirviyanqanatsu. Tsaynö kayänanpä levitakunata niy”.