Egiptuman Jacob aywanqan
46
Llapan imaykanta apakurkurmi Egiptuman Israela aywakurqan. Beersebaman chaykurnami taytan Isaac yärakunqan Tayta Diosta adorar sacrificiuta altarcho rupatsirqan. 2 Tsay paqasmi Israelta Tayta Dios revelar nirqan: “¡Jacob, Jacob!”Jacobnami nirqan: “¿Imallatä, Taytay?”
3 Tsaymi Tayta Dios nirqan: “Noqaqa taytayki yärakunqan Diosmi kaykä. Ama mantsariytsu Egiptuman aywayta. Tsaychömi qampita aywaraqkunaman bendicionnïta churashä atskaman mirar juk nación kayänanpä. 4 Egiptuman aywaptikipis yanapashaykimi. Wanuptikipis tsuriki Josémi ñöpaykicho kanqa. Tsaynöllami qampita aywaraqkunatapis Egiptupita kikï jipimushä”.
5 Beersebapita Egiptuman aywakurmi Faraón apatsinqan carrëtakunaman tsurinkuna witsätsiyarqan taytan Jacobta, pishi wamrankunata y warminkunatapis. 6 Canaáncho tarinqan kaqtaqa wäkankunata y üshankunata qatikurkurmi llapan imaykankunatapis apakurkur Egiptupa aywakuyarqan.† 7 Tsaynöpami llapan tsurinkunawan y willkankunawan Egiptuman Jacob charqan.
8 Egiptuman aywaq Israel runakunapa jutinkunami karqan:
Jacobpa mayor tsurin Rubén;
9 Rubénpa tsurinkuna Enoc, Falú, Hezrón y Carmi;
10 Simeónpa tsurinkuna Jemuel, Jamín, Ohad, Jaquín, Zohar y Saúl (Saúlqa cananea warmipa wawanmi karqan);
11 Levípa tsurinkuna Gersón, Coat y Merari;
12 Judápa tsurinkuna Er, Onán, Sela, Fares y Zara (Erwan Onánqa Canaánllachönami wanuyarqan);
Farespa tsurinkuna Hezrónwan Hamul;
13 Isacarpa tsurinkuna Tola, Fúa, Job y Simrón;
14 Zabulónpa tsurinkuna Sered, Elón y Jahleel.
15 Paykunami kayarqan Jacobpa warmin Leapa wawankunawan willkankuna. Leapa ollqu wawankunaqa Padan-aramchömi yuriyarqan. Tsaynöllami wawan Dinapis tsaycho yurirqan. Leapa wawankuna y willkankunami kimsa chunka kimsa (33) warmipis ollqupis kayarqan.
16 Tsaynöllami Egiptuman aywayarqan Gadpa tsurinkuna Zifión, Hagui, Suni, Ezbón, Eri, Arodi y Areli;
17 Aserpa tsurinkuna Imna, Isúa, Isúi y Bería (paykunapa paninmi karqan Sera);
Beríapa tsurinkuna Heberwan Malquiel.
18 Paykunami kayarqan Zilpapa wawankuna y willkankuna. Zilpami karqan Leapa wätayninpä taytan Labán qaranqan. Zilpapa wawankuna y willkankunami chunka soqta warmipis ollqupis kayarqan.
19 Tsaynöllami Egiptuman aywayarqan Jacobpa warmin Raquelpa wawan José y Benjamín.
20 Warmin Asenatchömi Josépa tsurinkuna Manasés y Efraín kayarqan.† Paykunami Egiptucho yuriyarqan. Asenatqa karqan On markacho taq sacerdöti Potiferapa tsurinmi.
21 Benjamínpa tsurinkunami kayarqan Bela, Bequer, Asbel, Gera, Naamán, Ehi, Ros, Mupim, Hupim y Ard.
22 Paykunami Jacobpa warmin Raquelpa wawankuna y willkankuna kayarqan. Paykunaqa chunka chuskumi kayarqan.
23 Tsaynöllami Egiptuman aywayarqan Danpa tsurin Husim;
24 Neftalípa tsurinkuna Jahzeel, Guni, Jezer y Silem.
25 Paykunami Bilhapa wawankuna y willkankuna kayarqan. Bilhaqa Raquelpa wätayninpä taytan Labán entreganqanmi karqan. Tsay warmipa wawankuna y willkankunami qanchis kayarqan.
26 Egiptumanmi Jacob tsurinkuna y willkankuna soqta chunka soqta (66) chäyarqan. Paykunawanmi tsurinkunapa warminkunapis aywayarqan. 27 Josépa tsurinkunami Egiptucho ishkay yuriyarqan. Paykunatawan yupayaptinmi Egiptucho Israel runakuna qanchis chunka (70) kayarqan.b
Gosénman Jacob chanqan
28 Gosénman chaykarnami tsurin Judáta Jacob kacharqan Joséta willananpä “taytantsikwan tinkuqshi aywanki” nir.
Tsaypitanami Gosénman Jacob charqan. 29 Josénami cawallunwan qarachäna carrëtanta kamarirkatsir taytanwan tinkuq aywarqan. Taytanwan tinkuskirnami makallanakurkur waqayarqan. 30 Tsaymi Joséta Israel nirqan: “Kanan kawaykaqwan tinkunqächöqa jina wanukushäpis”.
31 Tsaypitanami wawqinkunata y wakin castankunata José nirqan: “Chäyämunqaykita willanäpä aywä Faraón kaqman. Paytami nishä: ‘Canaánpitami taytäwan wawqïkuna y wakin castäkunapis chäyämushqa. Paykunami shayämushqa noqa tanqä particho täyänanpä. 32 Tsaymi llapan imaykankunatapis apakurkur üshankunatawan cabrankunata y wäkankunata qatikurkur chäyämushqa. Paykunaqa uywa mitsikuyllatami yachayan’. 33 Faraónta willaptïmi qamkunata qayaykur imacho aruyanqaykitapis tapuyäshuptiki 34 niyanki: ‘Noqakunaqa unay castäkunanömi wamra kayanqäpita patsa uywa mitsikuyllata yachayä’. Tsaynö willayaptikimi üsha mitsiq runakunata Egipto runakuna melanäyaptin Gosén particho täyänaykipä niyäshunki”.