Cunćharyuncunata Israelcuna wañuchishan
9
Chaypitaga janćhis (7) junaj marzo quilla ćhayamuranna. Chay junajga llapan Israelcunata wañuchinan caran. Israelcunata illarachinanpaj yarpashanm ichanga mana camaranchu. Manchäga quiquin Israel runacuna llapan cunćharyuncunata wañuchiran. 2 Cunćharyuncunata wañuchinanpäga Asuero mandashan marcacunaćhu Israelcuna shuntacaran. Shuntacaptinga, cunćharyuncuna juyupa manchariran. Pipis mana ićhipuranchu. 3 Asuerupa mandu-rurajnincunapis Mardoqueuta manchacuywan Israel runacunata yanaparan. 4 Mardoqueuga mandajpa mayur mandu-rurajnin car, sumaj munayniyuj casha. Munayniyuj cashantaga llapan runa musyaran. 5 Chaura Israel runacunaga ushyajllapaj wañuchiran cunćharyuncunata. Cunćharyuncunata cućhur ushyaran. 6 Susa marcallaćhu wañuchiran pichga paćhac (500) chiqui runacunata. 7 Wañuchiran Amánpa ćhunca wamrancunata. Paycunapa jutin caran Parsandata, Dalfón, Aspata, 8 Porata, Adalía, Aridata, 9 Parmasta, Arisai, Aridai, Vaizata. 10 Amánpa ćhunca ullgu wamrancunata wañurachiran. Amánga Hamedatapa wamran caran. Israelcunaga cunćharyuncunata wañuchirsi, manam imancunatasi yataparanchu.
11 Chaura chay junajmi Susa marcaćhu aycajta wañuchishantapis mandaj Asueruta musyachiran. 12 Musyachiptinga, mandaj Asuero Esterta nisha: «Cay Susa marcallaćhu Israel runacunaga wañuchisha pichga paćhacta (500) cunćharyuncunata, Amánpa ćhunca wamrancunata. ¿Aycataraj wañuchisha waquin marcäcunaćhu? Ester, cananga ¿imallatataj mañacallämanqui? Mañacamaptiquiga, aunishayquim. ¿Imallatataj munaycällanqui? Munaptiquiga, rurashämi.»
13 Esterna nisha: «Tayta Asuero, warapäpis mañacushayqui. Canan junaj wañuchishan-jina wara junajpis cay Susa marcaćhu Israelcuna wañuchichun cunćharyuncunata. Amánpa ćhunca wamrancunatapis warcuycuchun maticunaman.» 14 Mandaj Asueruga rurachiran Ester mañacushanta. Chaymi Israel runacunaga warcuycuran Amánpa wamrancunata. 15 Änir mañacushan junaj, pusaj (8) junaj marzo quillaćhu quimsa paćhac (300) cunćharyuncunata Israelcuna wañuchiran. Yapay wañuchirsi, imancunatapis mana yataparanchu.
16 Israelcunaga caru marcacunaćhu tiyarpis, chapacunanpaj shuntacaran. Cunćharyuncunataga janćhis waranga pichga paćhac (7500) runacunata wañuchiran. Wañuchirsi, imancunatasi mana yataparanchu. 17 Janćhis (7) junaj marzo quillaćhu cunćharyuncunata wañuchiran. Warannin pusaj (8) junajćhüga jamayta tariran. Jamayta tarirga, cushicuyllawan jatun tünata ruraran.
18 Susa marcaćhu tiyaj Israelcunam ichanga ishcay junajćhüraj cunćharyuncunata wañuchiran. Cunćharyuncunata wañuycachir isgun (9) junaj marzo quillaćhu jamayta tarir, jatun tünata ruraran. Cushicuyllawan tünapäcuran. 19 Caru marcaćhu tiyaj Israel runacunam ichanga pusaj (8) junaj marzo quillaćhu jatun tünata ruraran. Chaypita-pacha watan-watan chay junajćhüga tünapäcun. Israelcunapäga chay junajga sumaj cushicuymi. Cushicur micuyta ruraycärir, mallichinacun.
20 Chaura Mardoqueuga tüna rurashancunata isquirbichiran acta libruman. Isquirbichishantaga mandaj Asuerupa marcanćhu tiyaj Israelcunata musyachiran. Mayćhu-chayćhu tiyaptinpis, cartata apachiran. 21 Musyachiran Israel runacunaga pusaj junaj, isgun junaj (8-9) marzo quillaćhu watan-watan jatun tünata rurananpaj. 22 Tünata ruraran wañuchinanpaj yuparaycächiptin, alli cawayta tarishanpita, llaquicuyćhu caycashanćhu cushicuyta tarishanpita, wagayćhu caycashanćhu tünayman ćhayashanpita. Tünayman ćhayar, micuy yanucushancunata mallichinacuran. Pishipacujcunatapis tarichiran. 23 Chaura Mardoqueo isquirbishanpita-pacham Israel runacunaga watan-watan tünata ruran. 24 Llapanpäpis Agag casta Amedatapa wamran Amán Israelcuna wañuchiyta yarpar, purta jitaran. «Purta ricaran» ninanga «Surtita ricaran» ninan. Llapan Israel runacuna wañuchiyta yarparan. 25 Amán yarpashantaga Ester willachiran mandaj Asueruta. Mandaj Asueruna Amántaga ćhunca ullgu wamrantinta matiycachiran. 26 Chaypitam Israel runacunata tünanta jutichaparan «Purim tüna» nir.
Chaura carta rimashanta wiyacuyninpa, ricay ñawinćhu cashancunata tantiyacuyninpa 27 Israel runacunaga watan-watan tünapäcun. Papil rimashan-jinam Israelcunaga tünapacun mana jungallar mayćhu-chayćhüsi. 28 Purim tünataga marcan-marcan tünaran. Llapan jipa wamracunapis tünaran. Israelcunaga Purim tünanta mana jungajchu. Jipa wamrancunapis imaysi mana jungajchu. 29 Chaura Purim tüna mana jungacänanpäga mama Esterwan Mardoqueo juc papilta isquirbiran. Esterga Abihailpa wamran caran. 30 Isquirbichishantaga paćhac ishcay ćhunca janćhiswan (127) mandaj Asuerupa marcancunaman apachiran. Apachishan papilćhüga Israelcunata shacyächiran alli cawananpaj. 31 Watan-watan Purim tünata mana jungananpaj willaparan. Mardoqueuwan Ester isquirbichishan papilćhüga willaparan llaquicuyćhu caycashanpita cushicuyman ćhayashan mana jungacänanpaj. Quiquincunapis mana jungananpaj, willcancunapis mana jungananpaj papilta ruraran. 32 Chaypita Mama Esterga isquirbichiran acta libruman Israel runacuna Purim tünata rurananpaj.