3 Chaypita mama Ester yapay aywaran mandajta mañacuj. Jungurpacuycur wagashpan ruwacuran: «Amánga papilta rurasha llapan Israelcuna ushyacänanpämi. Wañuyta manam munächu» nir. 4 Mañacuj ćhayaptinga, mandaj Asuero Esterta llaquipar juri garutinwan jayasha. Jayaptinga, jungurparaycashanpita jatarcur, Ester niran: 5 «Tayta Asuero, alli ñawiquipa ricamashpayquiga, rasunpa cuyamashpayquiga ama camacaycachiychu Israel runacunata wañuchinanpaj Amán isquirbichishanta. Allipaj mañacuptïga, camarajlla warmi captïga, ama ruracächunchu chay Agagueo castan runa, Hamedatapa wamran Amán llapan Israelcuna ushyacänanpaj isquirbishanta. 6 Tayta Asuero, ¿imanuyraj cäman yawar-masïta wañuchiptin? ¿Imanuyraj cäman llapan marca-masïta ushyaptin? Jatunpam llaquicushaj.»

7 Chauraga Asuero nisha: «Tayta Mardoqueo, mama Ester, nuwaga juycushcä jamtanam Amánpa llapan imancunatasi. Paytaga matichishcä Israel runacunata wañuchiyta munashanpitam. 8 Cananga jamcunana nuwapa jutïćhu juc papilta isquirbiy Israel-masiquicunata yanapänayquipaj. Musyashayquinuysi jutïćhu isquirbirashantaga, sïllüwan sïllurajtaga mananam cutiricunchinachu.»

9 Chaura mandaj Asuero niptinga, Mardoqueo jayachiran llapan papil ruraj runacunata. Jayachiran ishcay ćhunca pichgawan (25) junaj junio quillaćhu. Jutucaycur, papil rurajcunaga Mardoqueo shiminta isquirbiran. Mandaj Asuerupa jutinćhu juc papilta ruraran llapan marcacunapa rimayninćhu, Israelcunapa rimayninćhu. India marcapita Etiopía marcacunaman apachinanpaj isquirbichiran. 10 Nircurga, mandajpa sïllunwan Mardoqueo sïllurcuptin, cawalluta muntacarcärir, waćhacaylla aparan papilta Susa marcapita llapan marcapa auturdänincunaman. 11 Mandaj Asuero aunishan papilćhu niran: «Israel runacuna, mayćhu-chayćhüsi shuntacaycur-shuntacaycur chapacunqui. Cunćharyuyquicunata jatunpita tacshacaman warmitapis ullgutapis wañurachinqui. Imancunatapis quiquiquicunapaj shuntacunqui. 12 Juc junajlla may-chayćhüsi wañuchinqui janćhis (7) junaj marzo quillaćhu.»

13 Llapan marcacunaman apachishan papilćhu ninaj: «Israel runacuna, wañuchicänayqui junaj ćhayamunanpäga sumaj camaricuy. Pipis wañuchiyta munashuptiqui, quiquincunata wañuchinayqui» nir. 14 Chay cartata purichijcunaga mandajpa cawalluncunata muntacarcärir waćhacaylla aparunaj llapan marcacunaman. Jinan Susa marcaćhüsi papilta willacachiran.

15 Jinarcur mandajpa wasinćhu juyaycashanpita Mardoqueo llujshiranna. Llujshiran achic-achicyaycaj müdanasha, achic-achiyaycaj curünan jaticusha. Mardoqueuta ricarga, Susa marcaćhu juyaj runacuna jatunpa cushicuran. 16 Israelcunapäga pacha achicyacäcuran. 17 Mayćhu-chayćhüsi tiyashan marcaman mushuj papil ćhayaptinga, Israelcuna jatunpa cushicuran. Tünata ruraran. Mishqui micuycunata yanucaraycärir, micupäcuran. Chaura Persia runacunapis Israelcunata manchacuywan Israel runacunata castachacuran.