—¡Khawaychej! ¡Diospa tiyacunanka runas chaupipiña! Dioska tucuy atiyninwan paycunawan cusca tiyacaponka. Paycunataj paypa runasnin cankancu. Dios quiquintaj paycunawan cusca tiyacuspa Diosnincu canka. 4 Ñawisnincumanta tucuy wakaynincuta Dios pichanka. Runasninpajka wañuypis manaña cankachu. Niñataj ni phutiy ni wakay ni ñacꞌariy cankachu. Cunanka manaña ñaupaj caj imas canñachu, —nispa.

5 Jatun tiyanapi tiyaska caj Dios nerka:

—¡Khaway! ¡Tucuy imata mosojta ruwani! —nispa.

Niwarkataj:

—Kelkay: Cay cheka niskasniytaka juntꞌanipunimin, —nispa.

6 Nillawarkataj:

—Ruwaskaña. Noka cani kallarejka, nokataj tucuchaj cani.^a Chꞌaquichicojmanka wiñay causayta koj phullchimoj yacuta mana michꞌacuspa kollasaj ujyananpaj. 7 Atipajka tucuy chay imasta japꞌenka. Paypajtaj Diosnin casaj, paytaj waway canka. 8 Astawanrí manchachicojcunalla, nokapi japꞌicuyta mana munajcuna, millay causajcuna, runata wañuchejcuna, khenchachacojcuna, laykacuna, ruwaska dioscunata yupaychajcuna, tucuy llullacojcunapis —tucuy paycunaka azufrewan laurashaj nina kochaman renkancu. Chayka iscay caj wañuyñamin, —nispa.

9 Chanta chay kanchis angelesmanta ujnincu jamuwarka. Paycunaka khepa caj kanchis manchay llaquiycunawan juntꞌa vasosniyoj kanchis angeles cancu. Parlaycuwarkataj:

—Jamuy, Corderoj warmin noviata ricuchiskayqui, —nispa.

10 Jatun alto orkoman pusawarka. Santo Espiritutaj atiyninman churawarka jamoj imasta sutꞌinchanawanpaj. Angeltaj Diospa santa llajtan Jerusalenta janaj pachamanta uraycamushajta ricuchiwarka. 11 Llajtataj Diospa cꞌacha cayninwan cꞌanchasharka. Lliphipiynenka may valorniyoj rumicitujina, diamantejina, cristaljinataj lliphipisharka. 12 Jatun alto perkayoj chunca iscayniyoj puncusniyoj carka. Sapa uj puncupitaj uj angel carka. Puncus patapitaj chunca iscayniyoj aylluspa sutisnincu kelkaska carka. Chay aylluska Israelpa wawasnincojta cancu. 13 Inti llojsimuy ladopi quinsa puncusniyoj carka. Wichay ladopi quinsa puncusniyoj, uray ladopi quinsa puncusniyoj, inti yaycuy ladopitaj quinsa puncusniyoj carka. 14 Llajta perkataj chunca iscayniyoj cimientosniyoj carka. Cimientosninpitaj Corderoj chunca iscayniyoj cachasninpa sutisnincu kelkaska carka.

15 Parlawaj angelka uj kori metroyoj carka, llajtata, llajtaj puncusninta, perkantapis medinanpaj. 16 Chay llajtataj cuadrado carka, largonwan anchonwan quiquin carka. Angeltaj metrowan chay llajtata mederka chunca iscayniyoj waranka estadiosta. Chayka phishka pachaj leguasman ninacun. Largonwan anchonwan altonwan quiquin carka. 17 Perkatapis mederka pachaj tawa chunca tawayoj codosta. Runaj medidanmanjina angelka mederka. Chayka kanchis chunca iscayniyoj metrosman ninacun.

18 Chay llajtaka kori purumanta chꞌuya vidrioman rijchꞌacoj. Perkasnintaj cꞌascachiska diamanteswan cꞌancharka. 19 Llajta perkaj cimientosnintaj may valorniyoj rumicituswan cꞌachachaska carka. Tucuy laya coloresta cꞌanchaj cimientos carka. Ñaupaj caj cimientoka diamante carka. Iscay caj zafiro; quinsa caj ágata; tawa caj esmeralda; 20 phishka caj ónice; sojta caj cornalina; kanchis caj crisólito; pusaj caj berilo; iskꞌon caj topacio; chunca caj crisoprasa; chunca ujniyoj caj jacinto; chunca iscayniyoj caj amatista carka. 21 Chunca iscayniyoj puncustaj chunca iscayniyoj perlas carkancu. Sapa uj puncu uj perlamanta carka. Chay llajtaj callesnintaj kori purumanta carka cꞌanchaj vidriojina ricucoj.

22 Chay llajtapeka ni ima yupaychana-wasitapis ricorkanichu. Tucuy atiyniyoj Señor Diosmin Corderowan chaypi tiyacun yupaychaska cananpaj. 23 Diospa cheka caynenka llajtata cꞌancharka, Corderopis cꞌanchaynin carka. Chayraycu manaña tiyarkachu ni inti nitaj quilla. 24 Nacioncunataj llajtaj cꞌanchayninwan purenkancu. Cay pacha camachejcunapis khapaj caynincuta apamonkancu chay llajtaman Diosta jatunchanancupaj. 25 Puncusnintaj ni jaycꞌaj wiskꞌacunchu. Tucuy pꞌunchay quichallaskapuni manamin tutaka chaypi canchu. 26 Chaymantaj apamonkancu nacioncunaj khapaj caynincutawan khapaj capuynincutawan. 27 Chaymanka ni jaycꞌaj yayconkachu ni chꞌichichaska cajpis ni millay ruwajpis, nitaj llulla cajpis. Manachayrí wiñay causayta koj Corderoj libronpi kelkaska cajcunalla chayman yayconkancu.