22
Ricuchillawarkataj vidriojina cꞌancharej causayta koj yacuyoj mayuta. Chay mayoka Diospata Corderojtapis tiyananmanta llojsimun. 2 Llajtaj callen chaupitataj rin. Mayoj puraj ladonpi causayta koj sachꞌa wiñan. Chunca iscayniyoj laya pokoycunata pokon. Sapa quillataj pokoyninta pokon. Sachꞌaj laphisnenka runasta thañichinapajmin. 3 Manaña ni ima cankachu Dios phiñacunanpajjinaka. Chaypitaj Diospata Corderojtapis camachina tiyanan canka. Camachisnin payta yupaychankancu. 4 Paycunataj uyanta riconkancu. Sutintaj frentencupi kelkaska canka. 5 Manaña tutapis cankañachu. Señor Dios runasninta cꞌanchamonka. Chayraycu lámpara cꞌanchaytapis inti cꞌanchaypis manaña tiyankancuchu. Paycunataj wiñaypa wiñayninpaj camachenkancu.Cay kelkaskas uskhayta juntꞌacunanmanta
6 Angelka niwarkataj:
—Cay kelkaskaska chekapunimin. Willajcunanman parlaj Señor Dioska angelninta camachisninman cachamorka yuyaskanta paycunaman ricuchinanpaj. Chay yuyaskan uskhayta juntꞌacunan tiyan. 7 Jesuska nin: “¡Uskhayta cutimushani!” nispa.
¡May cusiskamin cay libropi sutꞌinchanapaj kelkaska niskasninta casojka!
8 Noka, Juan, chay imasta uyarerkani ricorkanitaj. Uyarispa ricuspataj chay imasta ricuchiwaj angelpa ñaupakenpi pampacama cꞌumuycorkani payta yupaychanaypaj. 9 Payrí niwarka:
—¡Amapuni yupaychawaychu! Camachimasillayqui cani. Willaj hermanosniyquimanta, cay libropi kelkaskasta casojcunamanta cani. ¡Diosllata yupaychay! —nispa.
10 Nillawarkataj:
—Cay libropi sutꞌinchaska kelkaskata ama wiskꞌaychu juntꞌacunan tiempo chayamushaskanraycu. 11 Sajrapi causajka sajrallapipuni causachun; millay cajka millayllapuni cachun; chekan cajta ruwajka chekan cajllatapuni ruwachun; Diosman tꞌakaska cajpis payman tꞌakaskallapuni cachun, —nispa.
12 Jesús nin:
—¡Uskhayta cutimushani! Cutimuspataj ruwaskanmanjina sapa ujman japꞌinan cajta kosaj. 13 Noka ñaupaj caj cani, nokataj khepa caj cani.a Noka cani kallarejka, nokataj tucuchaj cani.
14 ‘May cusiskas cancu juchasnincumantab llimphuchaska cajcunaka. Ajinapi wiñay causayta koj sachꞌamanta miqhuyta atenkancu. Chay llajtaj puncusnintapis yaycuyta atenkancu. 15 Astawanrí alkojina cajcunaka, laykacuna, khenchacuna, runata wañuchejcuna, ruwaska dioscunata yupaychajcuna, tucuy llulla cajta munacoj ruwajtaj, llajta jawapi cankancu, —nispa.
Khepa caj niskan
16 —Noka, Jesús, angelniyta cachamorkani chay imasta iglesiasman sutꞌinchananpaj. Noka cani Davidpa Saphin, Davidpa aylluntaj, sutꞌiyay cꞌanchaj chꞌasca. 17 Santo Espirituwan noviawan nincu:
—Jamuy.
Uyarejka nichun:
—Jamuy.
Chꞌaquichicojka jamuchun. Pillapis munajka wiñay causayta koj yacuta ujyachun khasillamanta.
18 Cay libropi kelkaska sutꞌinchaskasta tucuy uyarejman noka yuyaychani: Pillapis chay sutꞌinchaskasman yapaycunman chayka, Dios payman yapaycullankataj cay libropi kelkaska caj manchay llaquiycunata. 19 Pillapis cay libropi caj sutꞌinchaskasmanta khechunman chayka, Dios paymanta khechullankataj cay libropi kelkaska caj cusicuycunata. Ajinapi chay runaka mana miqhonkachu wiñay causayta koj sachꞌamanta nitaj Diospac llajtanmanpis yayconkachu.
20 Chay imasta yuyaychajka nillarkataj:
—¡Arí, uskhayta cutimushani! —nispa.
¡Ajina cachun, cutimuy, Señor Jesús!
21 Señorninchej Jesuspa cꞌacha yanapaynin tucuy kancunawan cachun. Ajina cachun.