Chay waranka watamanta
20
Ricorkanitaj janaj pachamanta uraycamushajta uj angelta. Maquinpi nina kochaj llaventa jatun cadenatawan japꞌisharka. 2 Dragontataj japꞌiycorka. Dragonka chay ñaupa catari, diablo, Satanás sutiyoj. Paytataj angelka cadenawan wataycorka waranka watapaj. 3 Ajinaspataj nina kochaman wijchꞌuycorka. Chaypa puncuntataj sumajta wiskꞌaycorka. Ajinapi Satanaska llajtasta manaña pantachenkachu waranka wata juntꞌacunancama. Chaymanta khepata pisi tiempollapaj cachariska canan tiyan.4 Ricorkani camachina tiyanasta. Tiyanaspi tiyaska cajcunamantaj camachinancupaja atiy koska carka. Ricorkani atipajcunaj almasnincuta. Paycunaka millay animalta ni rijchꞌacuynintapis yupaycharkancuchu. Nitaj frentencupi chayrí maquincupi millay animalpa sutinwan marcachicorkancuchu. Waquenka Jesuspi japꞌicuskancumanta willaskancuraycu Diospa niskanraycupis wañuchiskas carkancu. Paycunataj causarimuspa Cristowan cusca waranka watata camacherkancu. 5 Caymin ñaupaj causarimuyka. Chay waj wañuskacunaka mana causarimorkancuchu chay waranka wata juntꞌacunancama. 6 May cusiska Diosman tꞌakaska runasnin ñaupaj caj causarimuypi causarimojka. Paycunata iscay caj wañuyka mana imanankachu. Astawanpis Diosman Cristomantaj kayllaycuchejcuna cankancu. Cristowan cuscataj waranka watata camachenkancu.
Supay Satanás wiñaypaj atipachicun
7 Chay waranka wata tucucojtin supay Satanaska cachariska canka. 8 Tucuy cay pachapi caj llajtasta pantachinanpaj llojsimonka. Chay llajtaska Gog Magogwan cancu. Paycunata tantayconka Diospa contranpi makanacunanpaj. Paycunaka kocha cantopi tꞌiyujina ashqha mana yupay atina cankancu. 9 Tucuy jallpꞌa patata juntꞌamonkancu. Muyuyconkancutaj Diospa runasninpa cuartelnincuta, chay munaska llajtanta. Muyuycojcunata janaj pachamanta uraycamoj nina ruphaspa wañurachenka. 10 Paycunata pantachej diablotaj azufrewan laurashaj nina kochaman wijchꞌuycuska canka. Chay nina kochallamantaj millay animalka llulla willajninwan wijchꞌuycuskasña carkancu. Chaypi paycuna tuta pꞌunchay wiñaypa wiñayninpaj ñacꞌarichiskas cankancu.
Juchasapacunata Dios juchachan
11 Ricorkanitaj uj jatun yuraj tiyanata chaypi tiyaska cajtawan. Paypa ñaupakenmantaka jallpꞌapis cielopis aykecorkancu chincaporkancutaj. 12 Ricorkanitaj tucuy wañuskacunata, jatunpaj khawaskacunatapis pisipaj khawaskacunatapis, tiyanaj ñaupakenpi sayashajta. Wiñay causayniyojcunaj sutisnincu kelkana libro quichariska carka. Waj librospis quichariskasllataj carkancu. Chay librospi runaspa ruwaskasnincu kelkaskas cancu. Ruwaskasnincu kelkaska caskanmanjina wañuskacunaka juzgaskas carkancu. 13 Wañuskaska tucuy ladosmanta llojsiramorkancu, kochasmanta, uqhu pachamantapis. Sapa ujnincu ruwaskasnincumanjina juzgaskas carkancu. 14 Wañuypis uqhu pachapis nina kochaman wijchꞌuycuskas carkancu. Chay nina kochaka iscay caj wañuyñamin. 15 Chay juchachaskacuna tucuynincu nina kochaman wijchꞌuycuskas carkancu. Paycunaj sutisnincu mana kelkaskachu carkancu wiñay causayniyojcunawan. [Ajinapi Diosmanta wiñaypaj tꞌakaskas cancu.]b