Janaj pachapi yupaychaymanta
19
Chaymanta khepata ancha ashqhas taquejtajina janaj pachapi Diosta yupaychajta uyarerkani. Nerkancutaj:—¡Aleluya! ¡Diosninchejmin tucuyta atipajka,a jatunchaska cajpis, tucuy atiyniyoj cajpis!
2 Chekantapuni juzgaskanta ricucherka khencha warmita juchachaspa.
Chay khencha warmeka cay pacha runasta juchanwan juchallicherka.
Diospa camachisnintapis wañuracherka.
Chayraycu Dioska payta juchacharka.
3 Ujtawan nillarkancutaj:
—¡Aleluya!
Khencha warmej ruphashaskanmanta kꞌoshñeka wiñaypa wiñayninpaj wicharimushan, —nispa.
4 Chay iscay chunca tawayoj curajcunawan chay tawa causajcunawan jatun tiyanapi tiyaska Diosta yupaycharkancu. Nerkancutaj:
—¡Ajina cachun! ¡Aleluya! —nispa.
Diospa Corderon Cristoj casamientonmanta
5 Chay jatun tiyanamanta nimorka:
—Diosninchejta yupaychaychej, tucuy camachisnin cajcuna payta casojcuna, pisipaj khawaskacunapis jatunpaj khawaskacunapis, —nispa.
6 Uyarerkanitaj ancha ashqha taquejtajina phajchaj sonaynintajina sinchꞌi truenocunatajinapis. Nerkancutaj:
—¡Aleluya!
Tucuy atiyniyoj Señor Diosninchej camachinña.
7 Mayta cusicunachej, payta jatunchanachej,
Corderoj casaracuynin chayamuskanraycu.
Warminpis waquichicunña casaracunanpaj.
8 Llimphu lliphipej imperialjina fino linota pꞌachallicunanpaj koska carka, —nispa.
Chay pꞌachaka Diospa runasninpa chekan causaynincumin.
9 Chanta niwarka:
—Kelkay: May cusiskas cancu Corderoj casamiento miqhuyninta miqhunancupaj wajyaska cajcunaka, —nispa.
Nillawarkataj:
—Tucuy kelkaskayqueka Diospa cheka niskasninmin, —nispa.
10 Chay niwajpa ñaupakenmantaj pampacama cꞌumuycorkani yupaychanaypaj. Payrí niwarka:
—¡Amapuni yupaychawaychu! Camachimasillayqui cani. Jesusmanta willaj hermanosniyquimanta cani. ¡Diosllata yupaychay! Chekatapuni tucuy nokanchej Jesusmanta willaspa paypa Espiritunnejta sutꞌinchanchej, —nispa.
Yuraj caballopi llokꞌaska cajmanta
11 Ricorkanitaj janaj pachata quichaskata. Uj yuraj caballotaj riqhurimorka. Chay caballopi llokꞌaska cajka niskanta juntꞌaj caj, cheka cajtaj. Payka chekanta juzgan, sajra cajpa contranpitaj makanacun. 12 Paypa ñawisnenka ninajina laurashan, umanpitaj ashqha camachina pillusniyoj. Sutin paypi kelkaska cashan, chaytaka paylla yachan. 13 Kꞌala yawarchaska pꞌachawan pꞌachalliska. Diospa Niskan sutiyoj. 14 Janaj pachamanta soldado tropastaj yuraj caballospi payta khatimushancu. Yuraj imperialjina llimphu pꞌachawan pꞌachalliskastaj cancu. 15 Diospa Niskan sutiyojpa siminmanta filo tꞌujsina espada llojsimushan, chaywan llajtasta wajtananpaj. Tucuy llajtasta sinchꞌi atiywanb camachenka. Tucuy atiyniyoj Diospa cꞌajaj phiñacuyninwan sajra runasta paylla juchachanka.c 16 Pꞌachanpipis raqhu piernanpipis uj suti kelkaska cashan: CAMACHEJCUNAJ CAMACHEJNINCU; SEÑORCUNAJ SEÑORNINCU:
17 Ricorkanitaj uj angelta intipi sayashajta. Patata tucuy phawaj pꞌiskosmantaj sinchꞌita khaparerka:
—Jamuychej, Diospa jatun miqhuyninta miqhoj tantacamuychej. 18 Camachejcunaj aychancuta miqhuychej. Capitancunaj aychancuta, callpasapacunaj aychancuta, caballo aychasta, llokꞌajcunaj aychancuta, tucuy camachicunata, tucuy mana camachicunata, pisipaj khawaskasta, jatunpaj khawaskastapis miqhuychej, —nispa.
19 Ricorkanitaj chay millay animalta, cay pacha camachejcunata, soldado tropasnincutapis. Paycunaka tantaycucorkancu chay yuraj caballopi llokꞌaska cajwan paypa soldado tropasninwanpis makanacunancupaj. 20 Millay animalka llulla willajninwan presochaskas carkancu. Willajnenka paypa ñaupakenpi chay marcachicojcunata pantachinanpaj ricuchinasta ruwaj carka. Pantachiska runastaj millay animalpa sutinwan marcachicorkancu paypa rijchꞌacuynintapis yupaycharkancu. Chay millay animalka willajninwan iscaynincu causashaj wijchꞌuycuskas carkancu azufrewan laurashaj, chay nina kochaman. 21 Tucuy waj churanacojcunataj wañurachiskas carkancu caballopi llokꞌaska cajpa siminmanta llojsimoj espadanwan. Tucuy chay pꞌiskostaj wañuskacunaj aychancuwan sajsacorkancu.