Babiloniaj urmayninmanta
18
Chaymanta khepata ricorkani waj angelta janaj pachamanta uraycamushajta. Jatun atiyniyoj caskanraycutaj cay pachata cꞌancharicherka. 2 Sinchꞌiwantaj khaparerka:—¡Urmanña, urmanña, chay jatun Babiloniaka!
Supaycunaj tiyacunancu wasiman, tucuy millay supaycunaj cuartelnincuman tucuporka.
Tucuy millay pꞌiskospa juscꞌuncuman, chejniska pꞌiskospa juscꞌuncumantaj tucuporka.
3 Chay llajtaj millay sajra causayninwan tucuy llajtas machaycuspa juchallicorkancu.
Cay pacha camachejcunaka llajtaj millay causayninwan juchallicorkancu.
Cay pacha comerciantespis cay llajtaj millay cusiyninwan khapajyarkancu, —nispa.
4 Uyarerkanitaj janaj pachamanta waj parlamojta:
—Runasniy cajcuna, chay llajtamanta llojsimpuychej ama juchallej-masisnin canayquichejpaj.
Ajinapi chay llajtaj manchay llaquiycunanta mana ñacꞌarinquichejchu.
5 Juchasnenka taukaycucuspa janaj pachacama chayarka.
Diostaj chay sajra ruwaskasninmanta yuyaricorka.
6 Chayraycu juchallicuskanmanjina cutichiska cachun.
Sajra ruwaskanmanjina iscay cuti cutichiska cachun.
Millaycunata waquichispa ujyachiskanmanjina iscay cuti cutichiska cachun.
7 Jatunchacuskanmanjina, mana frenoyoj munayninta sajsachiskanmanjinapis payka ñacꞌarichiska phutichiskataj cachun.
Payka sonkonpi nicun: “Camachinaypaj tiyaska cashani.
Mana viudachu cani, nitaj jaycꞌajpis phuticusajchu”, nispa.
8 Chayraycu uj pꞌunchayllapi manchay llaquiycuna payman jamonka, onkoy, phutiy, yarkhaypis.
Ushphayanancama ninawan ruphaycuskataj canka.
Payta juchachaj Señor Dioska callpayojmin, —nispa.
Cay pacha runas Babiloniamanta llaquicuncu
9 Cay pacha camachejcuna Babiloniaj ruphaskanmanta kꞌoshñita ricuspa llaquiywan wakankancu. Paycunaka paywan cusca juchallicorkancu paywan cuscataj mana frenoyoj munaynincuta sajsacherkancu. 10 Llajtaj ñacꞌariyninta manchachicuspataj carullamanta khawaspa nenkancu:
—¡Phutiy, ari, kanpaj jatun Babilonia, callpasapa llajta!
Uj horallapi juicio kanpaj chayamun, —nispa.
11 Cay pacha comerciantespis paymanta phutiywan wakashancu cargasnincuta niña ni pi rantiskanraycu. 12 Khatu cargancoka carka kori, kolke, may valorniyoj rumicitus, perlas. Carka imperialjina sumaj valorniyoj linowan sedawan, moradoman pucaman tiñiskas; tucuy kꞌapaj cꞌaspi; marfilmanta tucuy ruwaskas, tucuy laya valorniyoj cꞌaspimanta, broncemanta, fierromanta, marmolmanta ruwaskas. 13 Callarkataj canela, tucuy cꞌacha kꞌapayniyojcuna, incienso, mirra, vino, aceite, ñutꞌu jacꞌu, trigo; uywas, ovejas, caballos, carretones, runaspis. [Kolkeraycutaj runacunaj causaynincutapis manacajman tucucherkancu.]a 14 Urmaska llajtatataj nenkancu:
—¡Sonkoyquej tucuy munaskan imaska chincapunña!
¡Tucuy sumaj miqhunayqui, tucuy fino pꞌachayquipis tucucapunña!
Niñataj ni jaycꞌajpis tariconkachu, —nispa.
15 Chay llajtamanta khapajyaj comercianteska ñacꞌariyninta manchachicuspa carullamanta khawankancu. Phutiywantaj wakankancu. 16 Nenkancutaj:
—¡Phutiy, ari, cay jatun llajtapajka!
Fino morado pꞌachawan, fino puca pꞌachawan pꞌachalliska carka.
Koriwan, may valorniyoj cꞌanchaj rumicituswan, perlaswan cꞌachachaska carka.
17 Uj horallapi chhica khapaj capuynenka chincaripun! —nispa.
Tucuy barco apaycachajcuna, barcopi tucuy rejcuna, chaypi yanapajcuna, tucuy kochapi llancꞌajcunapis carullamanta khawasharkancu. 18 Ruphaycuskanmanta kꞌoshñita ricuspataj khaparicorkancu:
—¡Cay jatun llajtajinaka mana carkachu wajka! —nispa.
19 Sinchꞌi phutiywan wakaspa khaparerkancu. Sinchꞌi phutiynincuta ricuchinancupajtaj umancuman jallpꞌawan jichꞌacorkancu. Nerkancutaj:
—¡Phutiy, ari, cay jatun llajtapajka!
Cay llajtaj khapaj capuyninwan tucuy kochapi barcosniyojcunaka khapajyarkancu.
¡Uj horallapi chincapunankáy! —nispa.
20 Chayraycu janaj pachapi cajcuna, cay llajtaj tucucuskanmanta cusicuychej.
Diospa runasninpis cachasninpis willajcunanpis, cusicuychej.
Cay llajta kancunaman sajrata ruwaskanmanta Dios juchachaskanraycu cusicuychej.
21 Uj callpasapa angel jatun rumita, molino rumitajina okharispa kochaman wijchꞌuycorka. Nerkataj:
—Jatun Babiloniaka cayjina sinchꞌiwan wijchꞌuska canka. Manaña ni jaycꞌajpis cankachu.
22 Manaña ni jaycꞌaj kanmanta uyaricamonkachu ni arpa, ni wayñu, ni kena, ni corneta.
Manaña ni jaycꞌaj kanpa chaypi ni ima ruwajcuna cankachu.
Manaña ni jaycꞌaj kanmanta uyaricamonkachu molinoj cutaskanka.
23 Manaña ni jaycꞌaj kanpa chaypi lamparaka cꞌanchankachu.
Manaña ni jaycꞌaj kanmanta uyaricamonkachu ni novio ni novia.
Comerciantesniyqueka cay pachapi jatunpaj khawaskas carkancu.
Laykayniyquiwan tucuy llajtasta pantacherkanqui.
24 Cay llajtapi Diospa willajcunanpis payman tꞌakaska runasninpis wañuchiskas carkancu.
Cay pachapi ashqha runas Diospi japꞌicuskancuraycu wañuchiskas carkancu.
Chay tucuymanta cay llajta juchachaska cashan, —nispa.