Kanchis angelesmanta
15
Ricullarkanitaj waj jatun tꞌucunapaj ricuchinata janaj pachapi. Kanchis angelestaj khepa caj kanchis manchay llaquiycunata japꞌejcuna carkancu. Chay manchay llaquiycunawanmin Diospa cꞌajaj phiñacuynenka juntꞌacun.Moisespa Corderojtapis taquiyninta taquincu
2 Ricorkanitaj kochaman rijchꞌacojta, chꞌuya vidrio ninawan chajruskatajina. Atipajcunataj chay vidriojina kochapi sayasharkancu, Diospa koskan arpaswan. Paycunaka millay animalta rijchꞌacuynintapis atiparkancu nitaj sutinwanpis marcachicorkancuchu. 3 Diospa camachin Moisespa Corderojtapis taquiyninta Diosman taquerkancu:
—¡Tucuy atiyniyoj Señor Dios, ancha jatuntaj tꞌucunapajtaj ruwaskasniyqueka!
¡Tucuy llajtasta Camachej, yuyayniyqueka chekan mana pantayniyoj!
4 Señor, tucuy manchachicuywan kanta yupaychasonkancu tucuytaj sutiyquita jatunchankancu.
Kan sapallayqui santo canqui.
Chayraycu tucuy llajtas kanman jamonkancu.
Chekanta juchachaskayqui ricuchiskañamin.
Chayraycu tucuy ñaupakeyquipi konkoricuspa yupaychasonkancu.
Juiciomanta kanchis angeles
5 Chaymantataj janaj pachapi ricorkani Diospa camachiskasninta churana, chay yupaychana-wasita quichaskata. 6 Llojsimorkancutaj chay kanchis angeles. Paycunaka khepa caj kanchis manchay llaquiycunata japꞌejcuna cancu. Llimphu cꞌancharishaj pꞌachawan pꞌachalliskas carkancu. Diosman kayllaycuchejpatajina kori chumpiwan sonkoncu chekanpi chumpiskas carkancu. 7 Chay tawa causajcunamanta ujnin chay kanchis angelesman sapa ujman kori vasota korka. Chay kanchis vasoska wiñaypa wiñayninpaj causaj Diospa cꞌajaj phiñacuyninwan juntꞌa carkancu. 8 Yupaychana-wasimantaj kꞌoshñi juntꞌaycorka. Kꞌoshñeka carka Dios jatun atiyninwan juiciota ruwananpaj chaypi cashaskanmantamin. Yupaychana-wasimanka ni pi yaycuyta aterkachu, chay kanchis angeles chay kanchis manchay llaquiycunata tucunancucama.