Cordero Cristo runasninwan
14
Cunanka sumaj cajta ricorkani, Sion orkopi Corderota sayashajta. Paywantaj pachaj tawa chunca tawayoj waranka casharkancu. Chay niyta munan tucuy paypa marcaska runasnin. Paycunaka Corderoj sutinwan Tatanpa sutinwanpis frentencupi marcaskas cancu. 2 Ashqha yacus phajchajjinata, jatun truenocunajinata janaj pachamanta taquimojta uyarerkani. Chay taquimuytaka arpaspa tocaynintajina uyarerkani. 3 Uj mosoj taquinatataj taquisharkancu jatun tiyanaj ñaupakenpi, chay tawa causajcunaj ñaupakencupi, chay curajcunaj ñaupakencupipis. Chay pachaj tawa chunca tawayoj warankaka cay pachamanta Corderoj wañuyninwan rantiska cancu. Paycunalla chay mosoj taquinataka yachancu. 4 Paycunaka Diosman tꞌakaska cancu. Corderoj tucuy yachachiyninta casojcuna cancu. Cay pacha runas uqhumanta libraskasa cancu Diospata Corderojpatapis ñaupaj ajllacuskasnin canancupaj. 5 Paycunaka mana llullacuspa cheka cajta parlajcuna cancu, mana juchayoj.Quinsa angeles willancu
6 Ricorkanitaj uj angelta patapi phawashajta. Wiñay wiñaypaj sumaj willanasta willamoj phawasharka cay pachapi tiyacojcunaman, tucuy jallpꞌasman, tucuy ayllusman, tucuy laya parlayniyojcunaman, tucuy llajtasmanpis. 7 Sinchꞌiwan parlaspataj nerka:
—Diosta manchachicuychej, payta jatunchaychej, juicio pꞌunchaynin chayamuskanraycu. Janaj pachata, cay pachata, kochasta, phullchej yacustapis ruwaj Diosta yupaychaychej, —nispa.
8 Chanta iscay caj angel khepanta jamorka. Nerkataj:
—¡Urmanña, urmanña chay jatun llajta Babiloniaka! Chay llajtaka mana frenoyojjina millay sajra causayninwan tucuy llajtasta ujyaycucherka juchallicherkataj, —nispa.
9 Chanta quinsa caj angel khepanta jamullarkataj. Sinchꞌita khaparispa nerka:
—Millay animalta rijchꞌacuynintapis yupaychajka, frentenpi chayrí maquinpi marcachicojka sinchꞌi ñacꞌarichiska canka. 10 Paytaka Dios cꞌajaj phiñacuyninwan sinchꞌita ñacꞌarichenka. Santo angelesninpa ñaupakencupi Corderoj ñaupakenpiwan azufrewan laurashaj ninapi ñacꞌarichenka. 11 Ñacꞌariynincumanta kꞌoshñitaj wicharimun wiñaypa wiñayninpaj. Millay animalta rijchꞌacuynintapis yupaychajcunaka sutinwan marcachicojcunaka mana samarispa tuta pꞌunchay ñacꞌarenkancu, —nispa.
12 Chayraycu Diosman tꞌakaska runasnenka muchuynincupi paypipuni japꞌicunancu tiyan. Paycunaka Diospa niskanta Jesuspa yachachiskantapis casojcuna cancu.
13 Janaj pachamanta parlamuwajta uyarerkani:
—Kelkay: May cusiskas cancu Señorpi japꞌicuspa wañojcunaka cunanmantapacha. Santo Espiritupis nin: Arí, saycꞌuchej llancꞌanancumanta samacuchuncu. Sumaj ruwaskasnincuri wiñaypaj Diosta jatunchanapaj canka, —nispa.
Juiciopi runasta cosechatajina cosechan
14 Ricorkanitaj uj yuraj phuyuta. Chay phuyu patapitaj runaman rijchꞌacoj tiyaska carka. Umanpitaj atipaskanmanta kori pilluwan churaska, maquinpitaj filo jusiyoj carka. 15 Uj angel janaj pacha yupaychana-wasimanta llojsimorka. Chay phuyu patapi tiyaska cajmantaj sinchꞌita khaparerka:
—Jusiyquiwan ruthullayña cosecha hora chayamuskanraycu. Cay pacha cosechaka pokoskañamin, —nispa.
16 Chay phuyu patapi tiyaska caj jusinta cay pachaman churaycamorka. Cay pachataj cosechaska carka.
17 Ajinallataj waj angel janaj pacha yupaychana-wasimanta llojsimorka, paypis filo jusiyoj. 18 Chanta waj angelpis juicio ninamanta atiyniyoj caj, altarmanta llojsimuspa sinchꞌita khaparerka. Filo jusiyoj angelman nerkataj:
—Filo jusiyquita churaycamuspa cay pacha uva huertamanta uvasta pallay chayaskasña caskanraycu, —nispa.
19 Chay angelka cay pachaman jusinta jaywaycamorka. Cay pachamanta uj uva huertamantajina sajra runasta pallaycorka. Diospa cꞌajaj phiñacuyninmanta caj jatun sarunamantaj paycunata wijchꞌuycorka. 20 Paycunataj llajtamanta jawapi sinchꞌi saruskas carkancu. Yawarnincutaj sarunamanta llojsimorka caballospa frenoncuman taripanancama sojta chunca leguatajina kochachacuspa.