—Riychej, Diospa cꞌajaj phiñacuyninwan juntꞌa caj kanchis vasosta cay pachaman jichꞌaycamuychej, —nispa.

2 Ñaupaj caj angel rispa cay pachaman vasonmanta jichꞌaycorka. Chanta millay chꞌupu onkoy runaspi riqhurirarka. Ñacꞌaricherkataj chay millay animalpa marcanwan marcachicojcunata rijchꞌacuyninta yupaychajcunatapis.

3 Iscay caj angelpis kochaman vasonmanta jichꞌaycorka. Chanta kochaska aya yawarmanjina cutiporkancu. Kochaspi tucuy causashaj cajtaj wañurarkancu.

4 Quinsa caj angelpis mayusman yacu pujyusmanwan vasonmanta jichꞌaycorka. Chay yacustaj yawarman cutiporkancu. 5 Yacusmanta atiyniyoj angelta uyarerkani nejta:

—Kanlla chekanka canqui, canquipuni, carkanquipunitaj. Cꞌata santo caj Dios, kanlla chekanka canqui, canquipuni, carkanquipunitaj. Ajinata juchachaskayquiwan chekan ricuchicunqui. 6 Chay juchachaskacunaka willajcunayquita wañurachispa yawarnincuta jichꞌacherkancu. Chayraycu kanpis paycunata yawarta ujyacherkanqui. Chaypajjinapunimin cancu, —nispa.

7 Uyarerkanitaj altarmanta nimojta:

—Arí, tucuy atiyniyoj Señor Dios, juiciopi juchachaskayqueka chekanpunimin, —nispa.

8 Tawa caj angelpis intiman vasonmanta jichꞌaycorka. Chanta intiman atiy koska carka runasta ninawan ruphananpaj. 9 Runastataj ninaj sinchꞌi ruphayninwan ruphaycorkancu. Dioska chay manchay llaquiycunawan ruwananpaj atiyniyoj caskanraycu, runaska paypa contranpi sajrata parlarkancu. Sajra ruwaskasnincutapis mana sakerkancuchu Diosta jatunchanancupaj.

10 Phishka caj angelpis millay animalpa camachina tiyananman vasonmanta jichꞌaycorka. Chanta tucuy camachiynin lakhayaycaporka. Runastaj ñacꞌariynincuwan kalluncuta qhanicorkancu. 11 Janaj pachapi caj Diospaj sajrata parlarkancu manchay ñacꞌariynincuraycu chꞌupusnincuraycupiwan. Sajra ruwaskasnincumantapis mana phuticorkancuchu, nitaj chay ruwaynincuta sakerkancuchu.

12 Sojta caj angelpis jatun mayu Eufratesman vasonmanta jichꞌaycorka. Mayoj yacusnintaj chꞌaquichiska carka. Ajinapi inti llojsimuy ladomanta camachejcuna jamunancupaj ñan waquichiska carka. 13 Ricorkanitaj dragonta, millay animalta, paypa llulla willajnintawan. Simincumantataj quinsa millay espíritus jampꞌatusman rijchꞌacoj llojsimorkancu. 14 Chay millay espiritustaj ricuchinasta ruwaj supaycuna carkancu. Paycunaka tucuy cay pacha camachejcunaman rerkancu. Tucuy atiyniyoj Diospa jatun guerra pꞌunchayninpaj chay camachejcunata tantamorkancu.

15 ¡Uyariychej! Mana yuyashajtiyqui chayamusaj. Nokawan ujchaskallapuni causacuy ama pꞌenkay juchapi japꞌiska canayquipaj. Ajinallatapuni causacojka may cusiska canka.

16 Chay supaycunataj camachejcunata tantamorkancu uj lugarman. Chay lugarka hebreo parlaypi Armagedón niska.

17 Kanchis caj angelpis wayraman^a vasonmanta jichꞌaycorka. Chanta yupaychana-wasimanta jatun tiyanamanta sinchꞌiwan nimorka:

—¡Ruwaskaña! —nispa.

18 Chanta carka relampagocuna, sonaycuna, truenocuna ima. Jallpꞌapis manchayta qharcatiterka. Runa cay pachapi caskanmantapacha ni jaycꞌaj ajina sinchꞌitaka jallpꞌa qharcatiterkachu. 19 Chaywan jatun llajta Babiloniaka quinsaman partiska carka. Nacioncunaj llajtasnincupis urmararkancu. Ajinapi Dioska jatun llajta Babiloniaj juchasninmanta yuyaricuspa manchay cꞌajaj phiñacuyninwan juchacharka. 20 Tucuy yacuwan muyuriska jallpꞌaspis chincaporkancu. Orkospis chincaporkancu. 21 Runasmantaj janaj pachamanta quintalniyojjina granizamorka. Chay granizo ñacꞌariyka ancha fiero caskanraycu runas Diospaj sajrata parlarkancu.