—Jataricuy. Medimuy Diospa yupaychanawasinta altartawan. Chaypi yupaychashajcunatapis yupamuy. 2 Yupaychana-wasej jawa pationtarí ama mediychu waj llajtayojcunaman koska caskanraycu. Paycunaka Diosman tꞌakaska llajtata atipaspa tawa chunca iscayniyoj quillata saronkancu. 3 Nokataj iscay willajcunayta luto pꞌachawan pꞌachalliskata cachamusaj. [Runaspa juchancumanta phuticuskancuraycu ajina pꞌachalliskas cancu.]^a Waranka iscay pachaj sojta chuncayoj pꞌunchaycunata niskasniyta willarankancu, —nispa.

4 Chay iscay olivo sachꞌas chay iscay cꞌanchanaspiwan Señorninchejpa ñaupakenpi cashancu. Chaycunajina chay iscay willajcunapis cancu. 5 Sichus mayken paycunata ñacꞌarichiyta munanman chayka, nina simincumanta llojsimonka enemigosnincuta ruphaycunanpaj. Paycunata ñacꞌarichiyta munajka ajina wañuchiska canan tiyan. 6 Paycunaka atiyniyoj cancu willaranancu pꞌunchaycunapi paratapis jarcꞌanancupaj. Atiyniyoj cancu yacusta yawarman cutichinancupaj. Atiyniyojtaj cancu munaskancumanjina tucuy laya manchay llaquiycunawan cay pachata ñacꞌarichinancupajpis. 7 Dios paycunata cachamonka niskanta willaranancupaj. Chayta tucuskancutawantaj uqhu pachamanta wicharimoj millay animalka paycunawan makanaconka. Paycunata atipankataj wañurachenkataj. 8 Ayastaj jatun llajtaj callesninpi wijchꞌuconkancu. Chay jatun llajtaka Sodomawan Egiptowan ninacun. Chay llajtallapitaj Señornincoka chacataska carka. 9 Chay ayastataj quinsa pꞌunchay cuscanniyojta khawankancu tucuy llajtasmanta cajcuna, ayllusmanta, tucuy laya parlayniyojcuna, tucuy nacionesmanta cajcunapis. Paycuna ayasta mana pꞌampacojta sakenkancuchu. 10 Ajinata khawaspa cay pachapi tiyacoj runaska paycunaj wañuskancumanta cusiskas cankancu. Cusiracuspataj regalosta apachinaconkancu. Chay iscay willajcunaka cay pacha runasta ñaupajpi ñacꞌaricherkancu. Chayraycu wañuskancumanta runaska cusiconkancu.

11 Chay quinsa pꞌunchay cuscanniyojmantataj Dios paycunata causarichimorka. Causarimuspataj sayaricaporkancu. Chayta khawajcunataj sinchꞌita manchachicorkancu. 12 Willajcunataj uyarerkancu janaj pachamanta sinchꞌiwan wajyamojta:

—Cayman wicharimuychej, —nispa.

Paycunataj janaj pachaman Diospa phuyunpi wicharerkancu. Enemigosnincutaj paycunata wicharishajta khawarkancu. 13 Chay quiquinpachataj cay pachaka sinchꞌita qharcatiterka. Chay qharcatitiyllapitaj kanchis waranka runaspis wañurarkancu. Mana wañuska carkancu, chay runastaj mayta manchachicorkancu, janaj pachapi caj Diosta jatuncharkancutaj.

14 Chay iscay caj jatun phutiy canña. Quinsa caj jatun phutiytaj ñapis chayamushanña.

15 Kanchis caj angel tocarka. Janaj pachapitaj sinchꞌita khaparerkancu:

16 Diospa ñaupakenpi tiyanasnincupi tiyaska iscay chunca tawayoj curajcuna pampacama cꞌumuycuspa Diosta yupaycharkancu:

19 Janaj pachapi Diospa yupaychana-wasintaj quicharicorka. Diospa camachiskasninta churana arcapis yupaychana-wasinpi ricucorka. Chaywanpis carka relampagocuna, sonaycuna, truenocuna ima. Jallpꞌapis sinchꞌita qharcatiterka, manchay granizotaj carka.