Chay warmimanta chay dragonmantawan
12
Janaj pachapi uj jatun ricuchina ricucorka jamoj imasmanta reparachinapaj. Ricucorka uj warmi intiwan cꞌachachaska, quilla patapitaj sayashaj. Chunca iscayniyoj chꞌascasmanta pilluwantaj umanpi churaska carka. 2 Chay warmeka wijsalliska carka. Onkocunayashaspataj nanaywan khaparicorka. 3 Chanta janaj pachapi waj jatun ricuchina ricucorka jamoj imasmanta reparachinapaj. Uj jatun puca animal catarijina dragón ricucorka. Kanchis umayoj, chunca wajrasniyoj carka. Umasninpitaj kanchis camachina pillusniyoj carka. 4 Chupantaj janaj pacha chꞌascasmanta quinsa caj parteta pichaycorka. Cay pachamantaj chokaramorka. Dragonka onkocunayashaj warmej ñaupakenpi sayaycucorka. Warmej wawanta nacecojtincama miqhuycunanpaj suyasharka. 5 Warmeka uj khari wawata onkocorka. Chay wawaka tucuy llajtasta sinchꞌi atiywana ñapis camachenkaña. Chay wawari Diospaman tiyananmantaj okhariska carka. 6 Warmitaj chꞌinnejman Diospa waquichipuskan lugarman aykecorka. Chaypi waranka iscay pachaj sojta chuncayoj pꞌunchaycunata miqhuchiska, wakaychaskataj carka.Janaj pachapi guerra
7 Janaj pachapi guerra carka. Angel Miguelka angelesninwan dragonpa contranpi makanacorka. Dragonpis sajra angelesninwan Miguelpa contranpi makanacullarkataj. 8 Atipachicuspataj, paycunapaj janaj pachapi manaña lugar carkachu. 9 Ajinapi chay jatun dragonka wijchꞌumuska carka. Payka chay juchallichej ñaupa catari, diablo, Satanás sutiyoj. Paypis tucuy cay pacha runasta pantachejka cay pachaman wijchꞌuycamuska carka. Paywan cusca sajra angelesninpis wijchꞌumuskasllataj carkancu, millay supaycuna caskancuraycu.
10 Chanta janaj pachapi uyarerkani khaparejta:
—Cunan Diosninchej jatun callpawan atipanña tucuyta camachinanpaj.
Cunantaj Cristonpa atiynintapis ricuchinña hermanosninchejta chꞌataj caj wijchꞌumuskaña caskanraycu.
Chay chꞌatajka Diosninchejpa ñaupakenpi paycunata tuta pꞌunchay chꞌataj.
11 Hermanosninchejka chay chꞌatajta atiparkancu Corderoj wañuyninnejta,b paypi japꞌicuskancuta willacuskancunejtapis.
Paycunaka mana causaynillancutachu wakaychacorkancu.
Manachayrí waquichiskas carkancu Jesucristoraycu wañuchiskas canancupajpis.
12 Chayraycu janaj pachapi cajcuna ¡mayta cusicuychej!
¡Phutiy, ari, cay pachapi cajcunapajka, kochaspi cajcunapajpis Satanás kancunaman uraycamuskanraycu!
Pisi tiempollaña paypaj caskanta yachaskanraycu manchay rabiaska cashan.
13 Chay dragonka cay pachaman wijchꞌuycamuska ricucuytawan khari wawa onkocoj warmita khatiycacharka. 14 Chay warmimanrí ancaj iscay jatuchej lijrasnin koska carka aykecunanpaj. Paypaj waquichiska carka, chay chꞌin pampaman phawarka dragonmanta pacaska cananpaj. Quinsa wata cuscanniyojta chaypi miqhuchiska, wakaychaska canan carka. 15 Dragontaj warmej khepanta uj mayutajina yacuta ajtumorka payta apachinanpaj. 16 Jallpꞌarí warmita yanapananpaj siminta quicharerka dragonpa ajtumuskan mayutataj okoycorka. 17-18 Chayraycu dragonka warmipaj mayta phiñacorka. Chanta warmej waj wawasninwan makanacoj rerka. Diospa camachiskasninta casojcunawan, Jesuspi japꞌicojcunawan makanacoj rerka. Paycunaka warmej waquin wawasnin cancu.