Libritoyoj angelmanta
10
Ricorkanitaj waj jatun callpasapa angelta janaj pachamanta uraycamushajta. Phuyuswan khataycuska, umanpitaj cꞌuychiyoj, uyantaj intijina cꞌanchayniyoj, chaquisnintaj ninajina laurashaj carka. 2 Chay angelka maquinpi uj libritota quichariskata japꞌisharka. Paña chaquinta jatun kochaman saruycorka, llokꞌe chaquintataj jallpꞌaman saruycorka. 3 Jatunta khaparerka uj sinchꞌi kaparej leonjina. Khaparejtintaj chay kanchis sonaj truenocunapis parlallarkancutaj. 4 Chay kanchis truenocuna parlamojtincutaj kelkanayasharkani. Astawanrí janaj pachamanta nimuwarka:—Chay kanchis truenocunaj parlaskancuta ama kelkaychu. Manachayrí sonkollayquipi japꞌiy, —nispa.
5 Kochapi jallpꞌapi sayashaj ricuskay, chay angel paña maquinta janaj pachaman okharerka Diospa sutinpi jurananpaj. 6 Dioska wiñaypa wiñayninpaj causayniyoj caj, tucuyta ruwaj. Pay janaj pachata chaypi cajcunatapis, cay pachata chaypi cajcunatapis, jatun kochasta chaypi cajcunatapis ruwarka. Chay Diospa sutinpi angelka jurarka:
—Suyanapaj tiempoka manaña canchu. 7 Astawanpis kanchis angel cornetanta tocajtinmin chay pꞌunchay Diospa pacaska yuyaynin juntꞌaconka. Chay sumaj yuyayninta sutꞌinchaj camachisninman willarka, —nispa.
Juan chay libritota miqhun
8 Ujtawan chay janaj pachamanta parlamojka niwarka:
—Riy. Kochapi jallpꞌapi sayashaj angelmanta quichariska libritota japꞌimuy, —nispa.
9 Nokari chay angelman rispa libritota mañarkani. Paytaj niwarka:
—Japꞌiy, miqhucapuy. Wijsayquipi jayasonka. Simiyquipirí lachiwana misqꞌijina misqꞌisonka, —nispa.
10 Nokataj angelpa maquinmanta libritota japꞌispa miqhuycorkani. Simiypeka lachiwana misqꞌijina misqꞌiwarka. Miqhuycojtiytaj wijsaypi jayawarka. 11 Chanta niwaska carka:
—Ujtawan sutꞌinchanayqui tiyan ashqha llajtasmanta, ashqha nacionesmanta, tucuy laya parlayniyojcunamanta, ashqha camachejcunamantapis, —nispa.