Phishka caj angel cornetanta tocan
9
Phishka caj angel tocarka. Chanta ricorkani ujta chꞌascajina urmamojta janaj pachamanta cay pachaman. Paymantaj uqhu pachaj puncunpa llaven koska carka. 2 Uqhu pacha nina kochataka quicharerkataj. Puncunmantataj kꞌoshñi wicharimorka uj jatun hornoj kꞌoshñiskanjina. Llojsimoj kꞌoshñeka intitawan wayratawan lakhayaycucherka. 3 Chay kꞌoshñimantataj langostas cay pachaman llojsiramorkancu. Cay pacha alacrancunaj atiynincujina atiy langostasman koska carka. 4 Paycunamantaj nerka, ama imananancuta ni pastosta ni ima kꞌomerta nitaj ima sachꞌatapis. Manachayrí Diospa sellonwan frentesnincupi mana marcaska caj runasllata ñacꞌarichinancuta, nerka. 5 Paycunaman nillarkataj, ama runasta wañurachinancuta, manachayrí phishka quillata ñacꞌarichinancuta. Nanaynincutaj imaynachus runata wachꞌispa alacranpa wachꞌiskanjina sinchꞌi canka. 6 Chay pꞌunchaycunapi runaska manaña causayta munankancuchu. Astawanpis mayta wañupuyta munankancu, nitaj wañuyta atenkancuchu.Langos taspa rijchꞌacuynin
7 Langostaska makanacupaj waquichiska caballosman rijchꞌacorkancu. Umancupitaj kori pilluman rijchꞌacoj carka. Uyancutaj runa uyaman rijchꞌacoj. 8 Chujchasnincutaj mana simpꞌaska warmej chujchanjina, quirusnincupis leonpa quirusninjina carka. 9 Pecherosnincutaj fierro pecherojina carka. Lijrasnincoj sonaskantaj ashqha caballospa carretaswan guerraman correskancoj sonaskanjina. 10 Chupancutaj alacranpatajina carka, wachꞌinayoj. Chupancuwan wachꞌispa runasta phishka quillata ñacꞌarichinancu carka. 11 Paycunaj camachejnincutaj chay nina kochamanta sajra angelmin. Hebreo parlaypi sutenka Abadón, griego parlaypitaj Apolión. Chayri niyta munan kꞌalata tucuchej.
12 Uj jatun phutiy canña. Iscay jatuchej phutiycuna canraj.
Sojta caj angel cornetanta tocan
13 Sojta caj angel tocarka. Diospa ñaupakenpi kori altar esquinasmanta parlamojtataj uyarerkani. 14 Cornetayoj sojta caj angelmantaj nerka:
—Jatun mayu Eufratespi cashancu, chay tawa jarcꞌaska angelesta cachariy, —nispa.
15 Chanta chay tawa waquichiska angeleska cachariskas llojsimorkancu runasmanta quinsa caj parteta wañurachinancupaj. Chay horapaj, chay pꞌunchaypaj, chay quillapaj, chay watapaj waquichiskas carkancu. 16 Caballospi wañurachej soldadostaj iscay chunca waranka tropas caskancuta uyarerkani. Sapa tropataj chunca waranka soldadosniyoj.
17 Ajinatamin chay caballosta sutꞌinchacuypi ricorkani. Chay caballospi llokꞌaska cajcunaj fierro pecheroncutaj puca, azul, kꞌellupiwan carka. Caballospa umancutaj leoncunaj umancujina. Simincumantataj ninawan kꞌoshñiwan azufrewan llojsimusharka. 18 Chay quinsa manchay llaquiycunawan runasmanta quinsa caj parte wañurachiskas carkancu. Paycuna wañorkancu caballospa simincumanta chay llojsimoj ninawan kꞌoshñiwan azufrewanpis. 19 Caballospa atiynenka simincupi chupancupiwan carka. Chupancoka catariman rijchꞌacoj, umayojtaj. Chaycunawantaj runasta ñacꞌarichincu.
20 Chay manchay llaquiycunawan mana wañuchiska caj runasrí manapuni Diosman cutirerkancuchu. Nitaj sajra ruwaynincuta sakerkancuchu. Yupaychashallarkancupuni supaycunata, ruwaska dioscunatawan. Chay ruwaskaska korimanta, kolkemanta, broncemanta, rumimanta, cꞌaspimanta cancu. Chaycunari nitaj ricuncuchu nitaj uyarincuchu nitaj purincupischu. 21 Chaywanpis chay runaska mana sakerkancuchu runa wañuchiyta, ni laykayta, ni khenchachacuyta, ni suwacuyta. Ajinallatapuni causasharkancu.