Llulla yachachejcuna jamonkancu
2
Diospa runasnin uqhupi unaypis llulla willajcuna riqhurerkancu. Ajinallatataj kancuna uqhupipis llulla yachachejcuna riqhurenkancu. Paycunaka urmachej yachachinasta pacayllamanta apaycamonkancu. Chay yachachinancuwan khesachankancu juchancuraycu wañoj Señortapis. Chaywantaj paycuna quiquincu uskhayta wiñay wañuyman pusanaconkancu. 2 Kancunamanta ashqhas paycunaj millay causaynincuta khatenkancu. Millay causaynincuraycutaj cheka willanaspajpis runas sajrata rimankancu. 3 Chay pantachejcunaka allinnincuta mascꞌaspalla llulla parlaynincuwan kolkeyquichejta orkhosonkachej. Paycunaj juchachaynincoka unaymantapacha waquichiskañamin. Wiñay wañuymanpis renkancupuni.Dioska mana casojcunata juchachan
4 Yachanchej Dioska angelesta juchallicuskancuta mana perdonarkachu. Manachayrí manchay yana lakha uqhu pachaman paycunata wijchꞌorka juicio pꞌunchaycama wiskꞌaska canancupaj. 5 Nillataj perdonarkachu unay runastapis. Chaypacha cay pachapi caj sajra runasta yacu parawan tucucherka. Chekan causaymanta willaraj Noella kanchis runaswan yacupi mana wañorkancuchu. 6 Khepatataj Sodoma Gomorra llajtaspi tiyacoj runasta ninawan ushphayachispa Dios juchacharka. Chaytaka tucuy jamoj mana casucojcunapaj uj ricuchinatajina ruwarka. 7-8 Chay llajtaspi tiyacojcunaka millay causayllapipuni carkancu mana frenoyojjina. Ajinata causaspa chekanta causaj Lot sutichaskata sinchꞌita llaquicherkancu. Payka paycuna uqhupi tiyacuspa sapa pꞌunchay chay sajra ruwaskasnincuta ricorka. Ricuspa uyarispaka chekan sonkonpi mayta ñacꞌarerka. Diosrí Lotman aykecunanta nerka manaraj chay runas ushphayashajtincu. 9 Señorninchejka yachan payta yupaychaspa causajcunata llaquiymanta orkhoyta. Yachantaj sajra ruwajcunata ñacꞌarichiyta juicio pꞌunchaypaj. 10 Astawanka juchachanka millay munaymanjina causajcunata. Chay pantachejcuna tucuy autoridadtapis manacajpaj khawancu.
Llulla yachachejcunaj sajra ruwaynincumanta
Mana manchachicuyniyoj nitaj pꞌenkayniyoj, munaynillancuta ruwajcuna cancu. Janaj pachapi atiyniyojcunapajpis mana manchachicuspa sajrata parlancu. 11 Ni angelespis Diospa ñaupakenpi chay atiyniyojcunaj contranpi chꞌataspa sajrataka parlancuchu. Angeleska astawan callpayoj atiyniyoj cancupis chay llulla yachachejcunamanta niskaka. 12 Imaynachus mana yuyayniyoj animaleska aychallapaj wañuchinapajtaj cancu, ajinallataj chay llulla yachachejcunapis cancu. Paycunaka mana yachaskancu imasmanta sajrallata parlancu. Chayraycu animalesjina tucuchiskas cankancu. 13 Paycunaka sajrata ruwaskancumanjina sajra cajta japꞌenkancu. Pꞌunchaynintin millay ruwaycunallawan cusicuncu. Kancuna uqhupeka sarna onkoyman rijchꞌacuncu. Tantacuyniyquichejpi miqhushaspa llutꞌasuskayquichejmanta mayta cusicuncu. 14 Ñawisnincuwan warmista khenchachacunallapajpuni khawancu. Nitaj juchallicuywan sajsayta atincuchu. Pisi yachachiska cajcunata juchaman urmachincu. Sonkoncupi khenchachacuyta munayman yachaska cancu. Diospa khesachaskasnin cancu. 15 Diospa cheka ñanninta sakepuspa pantarkancu. Imaynachus Beorpa wawan Balaam juchallicorka, ajinallatataj paycunapis juchallicorkancu. Balaamka mana chekan ruwaskallanmanta kolketa lluqꞌichicuyta anchata munarka. 16 Paypa juchanmanta reparachinanpaj Dios mana parlaj burrotapis runa parlaypi parlaricherka. Ajinapi chay sutꞌinchaj Balaamtaka mana yuyayniyoj ruwayninta jarcꞌarka.
17 Chay llulla yachachejcunamanta ni ima allin jamunchu chꞌaqui pujyusjina caskancuraycu. Muyoj wayrawan apaycachaska phuyusjinataj cancu. Paycunapaj manchay yana lakha uqhu pacha waquichiskaña cashan. 18 Jatuchej yankha parlaycunawan cunallanraj Diospi japꞌicojcunata engañaspa millay causayman apancu. Chay mosoj japꞌicojcunaka cay pacha pantaypi causaymanta cunallanraj aykecushancu. 19 Llulla yachachejcunaka paycunata nincu: “Munayniyquichejmanjina causanayquichejpaj libres canquichej”, nispa. Paycuna quiquincurí wataskajina millay munaynincuta casuncu. Imaraycuchus atipachicoj runaka atipajninta casunpuni. 20 Chay mosoj japꞌicojcunaka Señorninchej Cacharichejninchej Jesucristota rejserkancu. Ajinapi cay pacha millay causaymanta aykecorkancu. Sichus ujtawan chay quiquin millay causaywan chꞌampaycucuncu chayka, atipachicuncu. Ajinata atipachicuspaka astawan sajraman tucuncu ñaupaj caskanmanta niskaka. 21 Aswan allin canman ni jaycꞌaj chekan ñanta rejsiy, chayta rejsispaña sakepuymanta niskaka. Paycunaka Diosmanta santa camachiskata japꞌispaña sakeporkancu. 22 Cay rejsiska cheka parlayka paycunapi juntꞌacun: “Alkoka lanzaskanta cuticun; mayllaska qhucheka tꞌurupi suntꞌiskanman cutiycun.