3 Cayta ñaupajta yachanayquichej tiyan: Khepa pꞌunchaycunapeka asipayajcuna riqhurimonkancu. Paycunaka sajra munaynincumanjina causajcuna cancu. 4 Asipayaspataj taponkancu: “Jesucristo niskanmanjina cutimuskan ¿maytajrí? Tatasninchejpis wañupuncuña. Chaywanpis imaynachus cay pacha ruwacuskanmantapacha carka, quiquillan tucuy imaspis cacushan”, nispa. 5 Caytarí konkapuyta munancu: Unayña cielota Dioska niskallanwan ruwarka. Cay pachatapis yacumanta yacoj chaupintataj niskallanwan riqhuricherka. 6 Chay yacuwantaj uj tiempo caj pachata tucucherka. 7 Cunan tiempo cielowan cay pachawanpis quiquin niskallanwantaj ninapi tucuchiska canka. Juicio pꞌunchaypaj jallchꞌaska cashan. Chay pꞌunchaypitaj Dioska mana casoj runastaka wiñaypaj wañurachenka.

8 Munaska hermanosníy, cayta ama konkapuychejchu: Señorninchejpaj uj pꞌunchayka waranka watawan ninacun, waranka watataj uj pꞌunchaywan ninacun. 9 Waquenka Señorninchej khepacuskanta yuyancu. Astawanrí Señorninchejka niskasninta juntꞌaypi ni jaycꞌaj khepacunchu. Manachayrí Dios qhuyacuyninwan kancunata suyashasunquichej. Nitaj munanchu ni pi chincapunanta. Astawanpis tucuy runas juchasnincuta sakespa payman cutiricapunancuta munan.

10 Imaynatachá suwaka mana yuyaska horapi jamun, ajinallatataj Señorninchejpis jamonka. Chay pꞌunchaypi cielopis manchayta tꞌojyaspa chincaponka. Cielopi caj imaspis ninawan tucuconkancu. Cay pachapis chaypi ruwaska cajcunapis kꞌalata tucuconkancu.

11 Tucuy chay imas ajinata tucuchiskas canancuta yachaspaka ¿imayna runastaj canayquichej tiyanrí? Diosman tꞌakaskas causacunayquichej tiyan payta yupaychaspataj. 12 Chaywanpis Diospa pꞌunchaynin chayamunanta mayta suyaspa mayta munaspataj causacunayquichej tiyan. Chay pꞌunchaypi cieloka ninawan tucuchiska canka. Chaypi caj imaspis ruphaycuspa unuyaponkancu. 13 Astawanpis nokanchej mosoj cielota mosoj jallpꞌatawan suyashanchej. Chaytaka Diospa niskanmanjina cusiywan suyashanchej. Chay mosoj cajpeka Diospa munayninmanjina chekanta causacunallaña canka.

14 Munaska hermanosníy, chay sumaj imasta suyashanquichej. Chayraycu tucuy atiskayquichejta ruwaychej Diospa ñaupakenpi munayninmanjina allillanta causacunayquichejtaka. Mana pantayniyoj nitaj imapi juchachanapaj caychej. 15 Señorninchej qhuyacuyninwan suyasuskayquichejmanta cusicuychej. Payka chaymanjina wiñaypaj cacharichishasunquichej. Munaska hermanonchej, Pablopis, chaytamin kelkamusorkachej payman sumaj yachay koska caskanmanjina. 16 Ajinallatataj tucuynin kelkaskasninpipis cay yachachinasmanta parlan. Waquin kelkaskasnintaj ñacꞌayta entiendecun. Chaycunata pisi yachachiskacuna manaraj Diospi allinta japꞌicojcunawan wajjinaman kꞌewincu. Ajinallatataj paycunaka tucuynin Diospa palabrantapis wajjinaman kꞌewincu. Chaymanjinari wiñay wañuy paycunapaj canka.

17 Chayraycu munaska hermanosníy, ñaupajtaña yachaspaka sumajta khawacuychej. Pajtataj Diosta mana casojcunaj llulla yachachinasnincuwan pantachiskas cawajchej. Pajtataj sinchꞌi sayacuyniyquichejmanta urmashawajchej. 18 Astawanpis Señorninchej Cacharichejninchej Jesucristoka cꞌacha causayta kosorkachej. Chay causayniyquichejpi sumajta wiñaychej astawan astawan payta rejsispa munayninta ruwanayquichejpaj. Payka cunanpis wiñaypajpis jatunchaska cachun. Ajina cachun.