Jesusta reparaychej sonkochaskas canayquichejpaj
12
Tucuy chay may ashqha runas Diospi japꞌicuspa paypa cꞌacha yanapayninmanta willacorkancu. Palabranpitaj Dioska paycunaj causaynincumanta willan nokanchejta sonkochanawanchejpaj. Chayraycu atipaskancumanta yuyaricuspa nokanchejpis tucuy sonkowan Diospi japꞌicuspapuni causanachej. Tucuy jarcꞌaj imastapis astawanraj muyuyninchejpi japꞌicoj juchata wijchꞌupunachej Diospi suyaspapunitaj muchunachej. 2 Jesustataj sumajta khawanachejpuni yuyayninchejwan. Payka mosoj causay kallariypi Diospi japꞌicuyta yachachiwarkanchej. Chaywanpis sumaj wiñaskas cananchejcama sonkonchejpi yanapawasunchej. Payka yacharka sumaj cusiywan Dios payta jatunchananta. Chayraycu paypi confiacuspa cruzpi muchorka; pꞌenkay wañuytataj manapis canmanjinata khawarka. Cunanka Dioswan cusca camachinanpaj janaj pachapi jatunchaskamin.3 Payta reparaychej. Yuyaricuychejtaj imaynatachus juchasapas paypa contranpi may sinchꞌita churacuskancuta. Payri tucuy cay imasta muchuspa Diospi confiacorka. Chayraycu payta sumajta reparaychej Diospi japꞌicuypi ama saycꞌunayquichejpaj nitaj llauchhuyanayquichejpaj. 4 Kancunaka juchata atipanapaj makanacuspa manaraj muchorkanquichejchu wañuycamaka. 5 Cunanri ichapis kancunaka konkapushanquichej Diospa sonkochaj niskanmanta. Payka wawasninmanjina palabranpi parlapayasorkachej:
Wawáy, chekanta purinapaj Señorpa yuyaychaskanta ama pisipaj khawaychu.
Juchamanta cꞌamisojtinpis ama llauchhuyaychu.
6 Señorka munacuskanta chekanta purinanpaj wanachinmin.
Sapa uj runata wawanpaj japꞌiskantapis muchuchin.
Muchuynejta wiñaychej
7 Mosoj causaypi sumaj wiñaskas canayquichejpaj Dioska wawasninwanjina kancunawan ruwan. Tataka wawanta yachachinanpaj wanachinpuni. 8 Diospa wawasnin cajcunaka wanachiskaspuni cancu. Sichus kancuna mana wanachiskaschu cawajchej chayka, wajcha wawaslla canquichej manataj paypa wawasninchu. 9 Nokanchejka cay pacha pantaypi wanachinawanchejpaj tatasniyoj carkanchej. Paycunatataj sumajpaj khawaj canchej. ¿Manachu may astawanraj janaj pachapi caj Tatanchejtaka casusun paywan causananchejpaj? 10 Cay pachapi tatasninchejka pisi pꞌunchaycunallata yuyaynincumanjina pantajtinchej wanachiwarkanchej. Janaj pachapi caj Tatanchejrí allinninchejpajpuni wanachiwanchej cheka cayninpi paywan ujchaskas cananchejpaj. 11 Wanachishawajtinchejka manamin cusiyka canchu, manachayrí phutiylla. Khepatarí wanachiyta muchojcunaka Diosman allinyachiskas cancu causaynincupi chekan ruwajcuna canancupaj.
12 Chayraycu Señorpa sumaj ruwanasninpi callpachanacuychej cꞌuchi canayquichejpaj. Sichus llauchhuyapunquichej chayka, sonkochanacuychej. 13 Chekan ñantapunitaj puriychej. Ajinapi kancunawan purejcunaka pisi callpayoj cashajcunapis mana urmankancuchu. Astawanrí callpachaskas cachuncu.
Diospa cꞌacha yanapayninmanta ama pisichicuychejchu
14 Tucuy hermanoswan allinpi causacuyta mascꞌaychej. Diosman tꞌakaska llimphu causayniyoj cayta tucuy sonkowan munaychej. Llimphu causayniyoj runalla Diostaka riconka. 15 Sumajta khawacuychej pajtataj kancunamanta maykenpis Diospa cꞌacha yanapayninmanta pisichicushanman. Chaymantataj millay jaya yuyayniyojman tucunman. Pajtataj chay millay jaya yuyayka saphijina paypa sonkonmanta llojsimunman. Ajinapi waj ashqha runasman chimpaspataj yuyaynincuta chincachinman. 16 Pajtataj kancunamanta mayken canman khenchachacoj chayrí Diosmanta cajta manacajpaj khawaj. Esaupis ajina carka. Payka uj miqhunallawan trocaporka chayakenta. Curaj wawa caspa chayta japꞌinan carka. 17 Yachanquichejjina khepata payka Diospa sumaj niskanmanjina chay chayake japꞌinanta wakaywan mayta mascꞌasharka. Diosrí payta khesachaspa yuyaskanmanjinapuni ruwarka.
Diosman kayllaycucunquichej
18 Ñaupa tiempopi Sinaí orkoman unay tatasninchejka kayllaycorkancu. Chay orkoka ricucojlla. Cunarí kancunaka mana chaymanchu kayllaycunquichej. [Chay chꞌin orkopi Dios riqhurerka paycunaman parlananpaj.]a Paypa atiyninmanta orkopi sinchꞌi nina laurasharka, kꞌoshñiwantaj lakhayaycusharka, loco wayrawantaj carka. 19 Cornetajinatataj uyarerkancu. Diostaj paycunaman sinchꞌita parlamorka. Uyarejcunari manchachicuskancuraycu mañacorkancu paycunaman amaña astawan parlananta. 20 Mana muchuyta aterkancuchu cay sinchꞌi camachiskanta. Chay nin: “Sichus qꞌita animal cajllapis orkota tuparinman chayka, rumiwan chꞌankaspa wañuchiska canan tiyan”, nispa. 21 Chay manchay imasta ricuspa quiquin Moisespis nerka: “Mayta manchachicuspa qharcatitishani”, nispa.
22 Astawanrí kancunaka Sion orkoman kayllaycunquichej. Cayka causaj Diospa llajtanmin, janaj pacha Jerusalén. Chaypi waranka waranka angeles Diosta yupaychanancupaj tantaska cancu. 23 Chaypitaj sutisniyquichej kelkaskas cancu Diospa wawasnin caskayquichejraycu. Chay janaj pachamantaj tantacunayquichejpajb rishanquichej. Tucuyta chekanchaj Diosman kayllaycucunquichej. Janaj pachapi caj Sionman yaycuspañaka chekan runaspa espiritusnincu Dioswan cuscaña cashancu. 24 Mosoj tratonmanjina allinyanachej Jesusman kayllaycucunquichej. Paypa yawarnenka sonkosniyquichejta llimphuchasunquichej. Aswan sumaj cashan Abelpa yawarninmanta niskaka. [Abelpa yawarnenka Cainta juchacharka. Jesuspatarí cꞌacha yanapayninnejta perdonasunquichej.]c
Diosta uyariychej
25 Khawaychej Dios parlashajtaka ama khesachaychejchu. Unay chꞌin pampapi cajcunaka Dios cay pachapi parlamuskanta mana uyariyta munarkancuchu. Nitaj cꞌajaj phiñacuyninmanta aykecuyta aterkancuchu. Cunanka janaj pachamanta Dioska parlamushawanchej. Sichus paymanta khepaman cutispa carunchacusunchej chayka, may astawanraj juchachaskas casunman. 26 Jakay pꞌunchaypi Diospa parlaynenka cay pachata cuyucherka. Cunanrí willawanchej: “Uj cutitawanraj cuyuchisaj mana cay pachallatachu astawanpis janaj pachatawan cuyuchisaj”, nispa. 27 “Uj cutitawanraj”, nispaka ricuchin cuyuska cajka, ruwaskalla caspa, khechuska cananta. Ajinapi chay mana cuyurej cajka wiñaypaj canka. 28 Chayraycu nokanchejka chay mana cuyurej pachapi camachinanchejpaj Dios atiyta kowaskanchejmanta graciasta konachej. Chaymanjinataj payta yupaychaspa cusichinachej manchachicuywan. 29 Yachanchej Diosninchejka laurashaj tucuchej ninajina caskanta.